Að standa á réttinum en beygja sig fyrir valdinu.

Ofangreind orð mælti íslenskur höfðingi fyrr á öldum við danskan valdsmann, sem lét hann finna fyrir valdinu. 

Þeim sem ráða á bak við tjöldin í hinu alþjóðlega fjármálakerfi nota ekki fallegar aðferðir til að ná sínu fram eins og Max Kaiser lýsti í viðtali Silfri Egils í dag. 

Kaiser sagði líka réttilega að þegar fólk setti fé sitt í vogunarsjóði eða sjóði sem gefa hæsta vexti fylgdi það venjulega að áhættan væri líka mest þar.

Hann sagði að enginn ætti að væla með fólkinu sem lagði fé sitt inn á Icesave reikningana erlendis.

Þar alhæfir hann hins vegar rétt eins og hann myndi gera ef hann sagði að enginn ætti að væla með Íslendingunum sem steyptu sér í skuldir himinhárra myntkörfulána.

Í heimildarmyndinni "Maybe I should have" sem ég hvet fólk til að sjá þegar þar að kemur, er rætt við grandalaust fólk á Guernsey, sem hafði verið innrætt það frá blautu barnsbeini að bankar væru traustustu stofnanir sem til væru.

"Save like in the Bank og England" var orðtakið. Þau létu glepjast af auglýsingu Landsbankans, sem sagðist vera svo traustur vegna þess að hann hefði starfað allt frá 19. öld. 

En auðvitað hefði meirihluti fólksins sem lagði inn á Icesave átt að vita að aukin áhætta hlyti að fylgja hærri innlánsvöxtum, rétt eins og Max Keiser heldur fram. 

Á sama hátt hefði meirihluti þeirra Íslendinga sem fjárfestu í myntkörfulánum og urðu til þess að skuldir íslensku heimilanna fjórfölduðust á örfáum árum átt að vera það ljóst að fáránlega hátt gengi íslensku krónunnar gæti ekki staðisti til lengdar og að verið væri að taka allt of mikla áhættu. 

Þetta hefði átt að blasa betur við Íslendingum með sína krónu heldur en útlendingum, sem lögðu inn á reikninga bankanna okkar erlendis.  

Þessar skuldir og fáránlega háar skuldir fyrirtækjanna nema næstum 90% af skuldabyrði þjóðarinnar og við verðum líka að horfa í eigin barm því annars lærum við ekki neitt af þessu.

Ef þessar skuldir væru ekki fyrir hendi væri Icesave ekki svona mikið mál. En með réttu má segja að Icesave sé ekki bætandi á allt annað skuldafargan sem nú lendir á þjóðinni.

Við munum ein ekki breyta fjármálakerfi heimsins né hafa afl til að gera heimsbyltingu á þeim vettvangi, því miður.

Framundan er löng og ströng barátta til að komast sem skaplegast út úr þessu ölluog neita ekki alfarið að bera neina ábyrgð á banka, sem var íslenskur í höndum manna sem íslenskir ráðamenn létu gott heita að eignuðust hann og gerðu það sem þeir gerðu.

En aðalatriðið verður að vera "Fair deal", sem felst í því að þjóðirnar þrjár sem tengjast Icesave axli byrðarnar í samræmi við stærðarhlutföllin á milli þjóðanna.  

Og feta verður afar vandfarinn veg milli þess annars vegar að breyta því sem við getum breytt og hins vegar að beygja sig fyrir því sem við getum ekki ráðið við.  

 

Segir Darling og Brown vera hryðjuverkamenn

Athugasemdir

[Friðrik Hansen Guðmundsson, 31.1.2010 kl. 23:20]

Höldum þessa þjóðaratkvæðagreiðslu og fellum þennan Icesave samning.

Haldi Bretar málinu samt til streitu, þá verða þeir að koma til okkar og biðja íslensk stjórnvöld um peninga og að skattgreiðendur á Íslandi borgi tap þess fólks sem gamblaði með fé sitt og lagði það inn á eina mestu hávaxta reikninga sem Evrópubúum hefur staðið til boða frá lokum seinni heimstyrjaldarinnar.

Þá á að byrja á því að semja um það tjón sem hér varð þegar Bretar settu á okkur hryðjuverkalög og lýstu því yfir að Ísland væri gjaldþrota. Þegar búið er að semja um bætur fyrir þetta tjón, þá geta menn farið að ræða aftur þetta Icesave mál. Ekki fyrr.

[Árni Gunnarsson, 31.1.2010 kl. 23:59]

Staðarhóls Páll hlaut ekki náð hjá ríkisstjórnarflokkunum þegar stjórnin var mynduð.

[Sigurður Þórðarson, 1.2.2010 kl. 00:51]

Sérlega góður pistill.

Ég hef lengi haft mikið og gott álit á Ómari Ragnarssyni, en eitt af því fáa sem hann  virðist vera lélegur í er að vera samfylkingarmaður.  (Þetta er ekki illa meint ef einhver skyldi halda það)

[B.N. (IP-tala skráð) 1.2.2010 kl. 01:37]

Sæll Ómar

Það er mun betri speki sem Adolf Ingi Erlendsson kom með í kappleik Íslands og Póllands í EM í sjónvarpinu í dag. Hann áréttaði að allur munur er á að bogna eða brotna. Egill Helgason er vaxandi maður bæði að stærð og umfangi Ég dáist að vilja hans til að gera góða hluti í þáttum sínum hjá Sjónvarpinu. Það hefði verið fróðlegt að leggja meira af þessa fjármálaspekinga hagfræðinga,viðskiftaskiftafræðinga og lögmenn og leyfa heimsspekingum og jafnvel guðfræðingum að þenja út kassann.Á þessum tímum tímum óvissuum alla hluti er dýrmætt að fá nýja sjónarhóla. Og rétt sem dæmi teljum við peninga frá einum og upp úr en heimspekingurinn getur aldrei sætt sig við að telja eina krónu . Hann telur ef hann á að telja krónu og meira. Fleirri dæmi eru þekkt og stórmerkileg og fær vanalega Jón til þess að verða undrandi, Tónsmiðurinn lagahöfundurinn segir að laglínan skapi verkið en heimspekingurinn segir það sé ekki laglínan heldur þagnirnar sem skapa réttan blæ.

Ég var að frétta að þú ættir að vera í viðtali hjá Bubba í Færibandinu annað kvöld hjá Rúv. Ég sakna stemmingarinnar sem Bubbi náði upp í þættum sínum með því að leyfa fólki að tjá hug sinn að líðandi stund. Ég mun seint trúa því eins og góðu flugi sem Bubbi náði í samtölum við fólk að hann hafi beygt sig undir valdið.

Baldvin Nielsen Reyjanesbæ

[Guðmundur Pálsson, 1.2.2010 kl. 10:37]

Ég held við ættum að halda á lofti hugtakinu "Fair Deal" og nota það sem okkar fána erlendis í þessu máli. Alls ekki "Við borgum ekki" því það skilur enginn

[Jón Lárusson, 1.2.2010 kl. 13:07]

  Við munum ein ekki breyta fjármálakerfi heimsins né hafa afl til að gera heimsbyltingu á þeim vettvangi, því miður

Það er engin ástæða að ætla að breyta fjármálakerfi heimsins, eða leita eftir að bylta því kerfi sem þar er. Hins vegar eigum við að líta til kerfisins hér heima og bylta því, en í því sambandi vil ég benda á þær hugmyndir sem koma fram hjá www.umbot.org . Við erum ekki bundin því að vinna eftir ómannúðlegu kerfi ef við yfir höfuð viljum það ekki.

Við þurfum að sýna þann dug, sem vissulega býr í okkur, og vinna að framtíð sem er okkur til hagsbóta.