Rannsóknar er þörf.

Gott er hve vel fór í þessu máli. En nú væri þarflegt að fara yfir sams konar leitir í gegnum árin og sjá við hvaða skilyrði svona gerðist og hvaða aðdragandi er að svona tilfellum. 

Mig grunar að í langflestum þeirra hafi legið fyrir dögum saman spá um afleitt veður eins og var í þetta skipti, spá, sem reyndist býsna nákvæm þegar hún rættist. 

Allt frá síðustu helgi var því spáð á hverjum einasta degi að bresta myndi á með miklum veðrabrigðum, norðan stormi og hríð á bilinu frá föstudagskvöldi til hádegis á laugardag.  

Veðrið skall að vísu aðeins seinna á en það munaði ekki mörgum klukkustundum og breytir ekki eðli málsins. Þegar búast má við að óveður dynji yfir er ekki boðlegt að vera á ferðinni rétt á undan eða á síðustu stundu á hálendi landsins áður en það brestur á því að ef eitthvað bregður út af, er ekkert svigrúm fyrir hendi.

Gaman væri að sjá í þessari rannsókn hve oft þetta hefur gerst á nákvæmlega sama hátt, því þá kæmi líka í ljós hve oft menn hafa ekki lært nokkurn skapaðan hlut áratugum saman.

Vísa að öðru leyti í bloggpistil minn á undan þessum um veðuraðstæður á þeim slóðum sem þetta atvik átti sér stað.  

Konan og drengurinn eru fundin

Athugasemdir

[Sigurður Haraldsson, 15.2.2010 kl. 09:56]

Rétt Ómar það þarf tafarlaust að taka á þessum málum svona gengur þetta ekki!

[Einar Þór Strand, 15.2.2010 kl. 10:11]

Ómar það þarf kannski ekki mikið að rannsaka þetta, því það er nokkuð vitað hvað er að og hvað þarf að gera, en hins vegar er spurning um að fá fólk til að nota heilbrigða skynsemi og þá sérstaklega þá sem eru að selja svona ferðir.  Til dæmis þá verður að vera einn sem rekur lestina þegar verið er með svona óvant fólk á sleðum til viðbótar við þanni sem leiðir hópinn.  Og svo er auðvitað þetta með veðrið.

[Sigurður Þór Guðjónsson, 15.2.2010 kl. 11:33]

Án nokkurrar skoðunnar þá hef ég það á tilfinningunni að margir skeyti aldrei neitt um veðurspár, hlusti ekki einu sinni á þær en ani bara áfram.

[Sævar Helgason, 15.2.2010 kl. 11:39]

Gott hvað þetta fór farsællega.  Björgunarsveitirnar okkar eru alveg frábærar og eiga mikinn heiður skilinn.

Ég dáist að þessari  konu frá Skotlandi sem sem lendir í þessum með 12 ára gömlun syni sínum. Hún bregst hárrétt við og sýnir adáunarverða stillingu. Kona frá öðru landi sem er alls ókunn íslensku veðri á jöklum.  En skipuleggjandi ferðarinnar fær lakari dóm....

Tek undir með þér Ómar varðandi greiningu á þessum jöklaferðum sem og hálendisferðum að vetri...

[Ingvi Rúnar Einarsson, 15.2.2010 kl. 11:57]

Sæll Ómar,ég tek undir það,að það er skandall,þegar fólk virðir ekki spár veðurfræðinga,þar sem að tæknin hefur gert þeim fært að spár þeirra eru áreiðanlegar í flestum tilfellum.

Ég hlýt að kalla eftir ábyrgð þeirra ferðafélaga,sem skipuleggja slíkar ferðir.Þeim á að vera ljóst,að þeir eru að senda fólk út í óvissuna,sem getur haft alvarlega afleiðinga.Þó það verði einhver fjárhagslegt tap viðkomandi ferðafélaga,ef fresta þurfi fyrirfram áhveðnum ferðum,þá er það smávegis ögn,miðað við hin mikla kostnað og fórnfýsi,sem björgunarfélögin þurfa leggja af hendi.Annað er þó en alvarlegra eru mannfórnir á meðal ferðamanna og björgunarmanna við slíkar aðstæður.Þær verða aldrei bættar.

Ég kalla til ábyrgðar alla þeirra,sem geta komið í veg fyrir að slíkt endurtaki sig.

[Sigurlaugur Þorsteinsson, 15.2.2010 kl. 14:10]

Hjá okkur í ferðaklúbbnum 4x4 er starfandi nefnd sem stendur fyrir dagsferðum mánaðarlega inn á hálendi og jökla,í þeim ferðum er lögð mikil áhersla á öryggi,þáttakendum skipt upp í hópa og tveir hópstjórar með hverjum hóp svo er einn aðalfarstjóri sem leiðir hópana og velur leiðir ásamt því að vera í stöðugu sambandi við hópstjórana,síðan eru eftir atvikum einn eða fleirri öryggisbílar sem reka lestina og sjá til þess að engin verði eftir,með þessu fyrirkomulagi næst mikið öryggi,hver hópur er sjálfstæð eining sem auðveldar farastjórn,hægt er að senda einn eða fl hópa áfram eða til baka eftir aðstæðum og taka þá hópstjórarnir við fararstjórn í sínum hóp.

Fjarskiptatæki eru í hverjum staff bíl og gps ásamt öðrum búnaði til fjallaferða og þáttakendur læra að takast á við aðstæður og nota búnað og tæki undir leiðsögn,fyrir hverja ferð er kynningarfundur þar sem farið yfir yfir leiðarval og farastjórar kynntir,Artic trucks leggur til efni um notkun og búnað jeppa,klúbburinn hefur 6 handvhf sem lánað er ef þarf og innan klúbbsins er starfandi hjálparsveit sem kemur ef þarf.Þetta er framlag f4x4 ásamt miklu öðru efni til öruggrar jeppa og fjallamennsku,það má bæta því við að eftir hverja ferð fer nefndin yfir og leitar að eitthverju sem má laga eða fara betur.  

[Baldvin Jónsson, 15.2.2010 kl. 14:51]

Ég var þarna í gær og lýsi hér aðstæðum: http://baldvinj.blog.is/blog/baldvinj/entry/1018630

Út frá okkar reynslu sem þarna störfum voru aðstæður ekki þess eðlis að aflýsa bæri ferðinni.

[Jón Þórðarson (IP-tala skráð) 15.2.2010 kl. 15:42]

Ég er algerlega sammála þér, Ómar.  Það er rannsóknarefni hvers vegna menn hunsa góðar veðurspár.  Líka þakkarvert að hundruðir manna eru stöðugt tilbúnir að bregðast við svona fíflagangi.

[Þorfinnur (IP-tala skráð) 15.2.2010 kl. 17:06]

Þetta er með miklum ólíkindum. Ég hef séð fréttir af svona löguðu frá því ég man eftir mér, alltaf er hneykslast og spurt hvers vegna ekki eru neinar reglur, en ekkert breytist. Þetta gerist bara aftur og aftur.

Þeir segjast ekki hafa búist við vondu veðri fyrr en um kvöldið. Það er samt fráleitt að taka sénsinn á því. Strax í gærmorgun var spáð aftakaveðri síðar um daginn, vonlaust að vita nákvæmlega hvenær það kemur svo.

Ég sjálfur var á Laugarvatni, þar var strax um morguninn hávaðarok uppí skjólsælli hlíð. Ég gat rétt staulast útí heita pottinn í rokinu og kuldanum. Aldrei hefði mér dottið í hug að fara á jökul, hvað þá á vélsleða.

Nei, veðrið kom engum á óvart. Menn voru bara að taka sénsa með líf annarra. Svei!

[Haukur Kristinsson (IP-tala skráð) 15.2.2010 kl. 20:02]

Þessir menn þyrftu að fara á námskeið í veðurfræði og kynna sér einnig "weather briefing", sem flugmenn þekkja manna best.

Veðustofa Íslands er mjög góð.

Að segja; út frá okkar reynslu", ljóstrar upp um mikla vankunnáttu í veðurfræði.

[Kristín (IP-tala skráð) 15.2.2010 kl. 20:11]

 OG eitt enn .

Af hverju ber sjóvarpsstöðvum og veðurspá fólki ALDREI saman .

Þetta skoða ég allt sumarið og hlusta og leita .

En..... það fást aldrei sömu svörin ,sömu spárnar .Þessu fólki sem segir frá veðri , ber ekki saman .Samanber lognið einn dag í fyrra og ég spurði Einar á veðurstofu e-ð , hvort þeir tækju vindspána INNANDYRA !