Já, ef aðskilnaður er öruggur.

90 kílómetra hámarkshraði er leyfður á íslenskum vegum þar sem aðeins er ein akrein í hvora átt og bílar mætast á þessum hraða.

Fráleitt er að leyfa þennan hraða við þessar aðstæður ef ekki má aka hraðar á tvöföldum vegum þar sem umferðin úr gagnstæðum áttum er tryggilega aðskilin. 

Reynsla er fyrir hendi frá nágrannalöndunum. Í Noregi eru leyfður 100 km hraði á tvöföldum vegum með tryggum aðskilnaði og 110 km hraði í Svíþjóð. 

Slysatölurnar eru ekki hærri í Svíþjóð en í Noregi. 

Eins og er vantar vegrið á milli aðskildra brauta á Reykjanesbraut og víðar en þau eru forsenda fyrir því að leyfa hærri hraða. 

Talað hefur verið um að það myndi kosta 500 milljónir króna að gera þessi vegrið, en með ísköldum útreikningi er hægt að sjá að slysið sem varð á Hafnarfjarðarvegi í fyrra kostaði þjóðfélagið meira en þá upphæð. 

Þetta slys hefði aldrei orðið ef öflugt vegrið hefði verið á milli aðskildra akbrauta og hvað svona slys snertir skiptir 90, 100 eða 110 km hraði ekki máli. 

Eftir tugþúsunda kílómetra akstur um Skandinavíu allt frá syðsta odda Danmerkur til Alta nyrst í Noregi tel ég að vera eigi meiri sveigjanleiki í hraðatakmörkunum með tilliti til aðstæðna hér á landi og að við eigum að læra sem mest af frændum okkar í þessu efni.

110 km hraði leyfður á ákveðnum vegum?

Athugasemdir

[Gísli Sigurðsson, 6.4.2010 kl. 21:25]

Þessu er ég búinn að halda fram lengi. Að leyfa aðeins 90 km/klst hraða á tvöfaldri Reykjanesbraut, þegar sá sami hraði er leyfður á mjóum sveitavegum er bara brandari. Hámarkshraðinn er þvæla á öðrum hvorum veginum. Ég skrapp bíltúr um páskana um nýjan veg sem liggur frá Höfnum að Stafnesi. Vegur þessi liggur á stað sem enginn Íslendingur fékk að fara um meðan herinn var staðsettur í Keflavík. Þetta er mjór og á köflum hlykkjóttur vegur og þarna er skilti sem segir að það megi aka á 90 km hraða. Þessi vegur  ber engan veginn ennan hraða. En geri hann það þá ber tvöföld Reykjanesbraut 120 km hraða, fyrir utan það að þetta er svona ,,sunnudagsrúntvegur" þar sem maður fer og skoðar umhverfið, sem sumum finnst kannski ekki mikið til um, en þetta er Ísland og þarna er saga við hvert fótmál.

[Kristján Hilmarsson, 6.4.2010 kl. 21:31]

Góð pæling að vanda Ómar !

En það sem ég hef dálitlar áhyggjur af er þetta með öxlina eða þriðju akreinina ef vill, þar sem hægt er að setja bilaðann bíl, sbr. þetta blogg mitt frá því fyrr í dag.

Eftir að hafa ekið um góðann hluta N.Evrópu og England ásamt Skandinavíu á allskonar vegum, í yfir 20 ár, held ég að ekki finnist vegir á íslandi í dag sem æskilegt væri að leyfa mikið yfir 100 km hraða á, t,d, ef verið er að tala um 4 akreinar, er þá ein auka til hliðar ? til að setja bilaðann bíl á ? held ekki ennþá allavega.

Td. halda margir að þjóðverjar leyfi ótakmarkaðann hraða á sínum hraðbrautum, sem er ekki rétt, aðeins á þeim sem hafa 3 (í hvora átt) akreinar + "rabatt"rein fyrir bilaða bíla, ef það er eingöngu 2 +!rabatt" í hvora átt setja þeir niður í 130km.

Svo ég held að 100km á góðum 4 akreina vegum (án fullrar "rabatt"reinar) sé öryggis vegna meira en nóg, og 10km til eða frá breytir sáralitlu um hversu vel umferðin flýtur, en 10km geta haft mikið að segja þegar eitthvað ber útaf.

Og þó að 90/100/110 skifti kannski ekki miklu máli í "front/front" árekstri (gæti munað 40km), eins og þú bendir á Ómar, þá geta víst 10km. til eða frá skift töluverðum sköpum í viðbrögðum við óvæntri hindrun t.d. biluðum bíl.

[Kristján Hilmarsson, 6.4.2010 kl. 21:36]

Já vissulega eru miklar mótsagnir þarna.þ.e. að leyfa 90 á svona vegum eins og þú lýsir Gísli. en held að séu þá frekar rök fyrir því að lækka hraðann þar heldur en leyfa hlutfallslega hærri á þeim betri.

[Ómar Ragnarsson, 6.4.2010 kl. 22:37]

Ég hef áður bloggað um axlirnar á íslensku vegunum, einkum á Suðurlandsvegi austur að Selfossi. Axlirnar eru í svo misjöfnu ástandi og svo illa við haldið, ef nokkuð, að þær eru í raun ónothæfar.

[Anna Sigríður Guðmundsdóttir, 6.4.2010 kl. 22:41]

Ómar. Að keyra eftir aðstæðum er alltaf það besta.

Í Noregi vann ég með dreng sem kom frá Hollandi og bara reiði hans yfir hraðatakmörkum gat gert hann hættulegan í umferðinni, eðlilega!

Svona er þetta líka á Íslandi!

30-120 km, allt eftir aðstæðum er best!. M.b.kv. Anna

[Guðmundur St Ragnarsson, 7.4.2010 kl. 00:33]

Það er ekki enn komið vegrið á Hafnarfjarðarveginum. Það ætti að vera í forgangi að setja slík vegrið á alls staðar þar sem tvöföldun er, innan Reykjavíkur og utan. Þá er tvöföldun Suðuarlandsvegar sem og Kjalarnesvegar lífsnauðsynleg í orðsins fyllstu merkingu. Ég tel það mun mikilvægara heldur en t.d. Vaðlaheiðargöng. Ákveðið ráðuneyti er ekki sammála þessari forgangsröðun í samgöngumálum.

[Hörður Björgvinsson (IP-tala skráð) 7.4.2010 kl. 09:42]

Það sem er hættulegast á þjóðvegunum er framúrakstur.  Tvennt í umferðarlögunum ýtir undir hann.

Í fyrsta lagi of lítill hámarkshraði þar sem aðstæður eru góðar, og jafnvel hægt að bæta enn frekar með litlum tilkostnaði.

Í öðru lagi sú skelfilega regla að um bíla sem notast við einu og sömu akreinina gildi tvenns konar lög um hámarkshraða. Nú er rúmur mánuður í að ég haldi af stað með hjólhýsið mitt, og safni fyrir aftan mig löngum röðum af bílum. Þeir bílstjórar sem óku á eftir mér á 80 km hraða í fyrrasumar urðu hættulegri með hverjum kílómeter sem leið án þess að þeir kæmust framúr. Það er ekki skemmtilegt „skraut" á sumarfríið að fá svo þessa bílstjóra framúr sér við vafasamar aðstæður, liggjandi á flautunni og steytandi hnefann.

[Gunnar Heiðarsson, 7.4.2010 kl. 10:45]

Tvöfaldur hámarkshraði, á vegum með eina akrein í hvora átt, er alveg út úr kortinu. Ef bílar ráða ekki við að halda uppi sama hámarkshraða með aftanívagn, á ekki að leyfa þeim að fara út á þjóðvegina með þá. Það er eðlilegra að stjórna þessu með þeim hætti frekar en að stuðla að frammúrakstri.  

2+2 vegir eru forsemda fyrir því að hægt sé að auka hraðann upp í 110 km/klst. Slíkir vegir eru þó ekki 2+2 fyrr en búið er að setja örugg vegrið á milli gagnstæðra aksturshelminga. Víravegrið fellur ekki undir þá skilgreiningu, þau eru stórhættuleg. Ég kom að slysi fyrir nokkrum árum út í Danmörku þar sem svona vegrið var. Bíll hafði farið útaf og lennti á vírunum, neðri vírinn slitnaði og efri fór yfir húddið á bílnum og skar allt af sem ofar stóð. Það var ekki fögur sjón. Þarna var 110km hámarkshraði.