"Þegiðu, Egill! Þetta er Valur!"

Óforbetranlegur Framari eins og ég getur átt það til að halda með öðru liði en Fram, eins og það væri hans eigið félag. 

Þannig er það með mig og marga aðra þegar KR er annars vegar. Hvernig stendur á þessuf? 

Þetta er orðin mjög gömul hefð, allt frá miðri síðustu öld þegar KR var öflugasta íþróttafélag landsins, einkum í vinsælustu íþróttunum, knattspyrnu og frjálsum íþróttum. 

Það er nefnilega kalt á toppnum og það fengu KR-ingar að reyna þegar Framarar, Valsarar og Víkingar héldu ákaft með Akurnesingum þegar þeir léku við KR. 

Það gátu allir aðrir en KR-ingar sameinast um að vera á móti KR og halda til dæmis ákaft með Akurnesingum. 

Ekki spillti fyrir að leikaðferð Akurnesinga, stuttar, hraðar sendingar, svonefnd meginlandsknattspyrna, gladdi augað meira en stórkarlalegur leikur KR sem byggðist á löngum spyrnum eins og oft voru notaðar í ensku knattspyrnunni. 

Háar spyrnur og langar voru kallaðar "KR-spörk". Á móti hafa KR-ingar löngum kallað leikaðferð Fram "dúkkuspil" og "miðjumoð." 

Gullaldarlið KR í kringum 1960 með Þórólf Beck, Ellert B. Schram, Garðar Árnason, Örn Steinsen og fleiri var að vísu svo glæsilegt og frábært að það var erfitt fyrir áhangendur annarra félaga að halda fast við að vera á móti KR. 

Á sjötta áratugnum átti Fram að vísu líka gott lið og á síðari hluta þess áratugar voru Fram, Valur og ÍBA með bestu liðin. 

Ég hef einu sinni hrópað "áfram KR" en það var þegar Jón með nefið (Jón Sigurðsson) og félagar hans í B-liði KR sló A-liðið út úr bikarkeppni á sjötta áratugnum.

Í laginu um Jóa útherja er Egill rakari látinn hrópa: "KR-ingar, þið eigið leikinn!" og honum er svarað: "Þegiðu, Egill, þetta er landsliðið!" 

Í gær hefði verið hægt að hrópa "KR-ingar, þið eigið leikinn!" og svarið hefði verið: "Þegiðu, Egill (Bjarni), þetta er Valur! 

Og í anda gamallar hefðar segi ég bara, þótt Framari sé: "Til hamingju, Valsmenn". 

 

Sigurganga Vals heldur áfram

Athugasemdir

[Helga Kristjánsdóttir, 8.6.2010 kl. 14:56]

Sæll! Ég átti heit samskipti við Egil í leik K.R. og Breiðabliks eitt sumar,man ekki einu sinni hvaða ár. Gæinn var búinn að gera meir en hvetja sína menn,mér fannst hann finna illilega að öllu sem mínir menn framkvæmdu. Svo ég hélt ég gæti þaggað niður í honum í eitt skipti fyrir öll og hreytti út úr mér; Þeguðu Egill eða ég sting bolta upp í kjaftinn á þér; Egill; þá sting ég honum einhversstaðar annarsstaðar í þig. Áheyrendur; þar fékkstu það;. Löngu hætt að láta svona,enda tími til kominn.

[KR-ingur (IP-tala skráð) 8.6.2010 kl. 21:59]

Þeim mun meira hatur og slæmt gengi það herðir okkur KR-inga, enda er stúkan alltaf full líka þegar illa gengur öfugt við Valsara og Framara stúkan full þegar velgengur en tóm þegar illa gengur.

[KR-ingur (IP-tala skráð) 10.6.2010 kl. 21:17]

Þegiðu Ómar þetta er KR!!!!!

http://www.mbl.is/mm/sport/efstadeild/2010/06/10/fyrsti_sigur_kr_i_fimm_marka_leik_gegn_fram/