Ekki aftur 1966!

Pele haltraði af leikvelli í heimsmeistarakeppninni 1966 eftir að hafa verið tæklaður linnulaust með leyfi lélegra dómara.

Aðrir leikmenn Brasilíu fengu að kenna á svipuðu og liðið féll úr keppni. 

Miklar umræður fóru fram um þetta þá og gert var átak í dómgæslunni sem lagaði ástandið í næstu heimsmeistarakeppni þar sem Brasilíumenn urðu heimsmeistarar. 

Íþróttir snúast oft um það að mönnum eða liðum er refsað fyrir mistök, beint eða óbeint. 

Varnarmaður, sem gerir þau mistök að ná ekki til boltans þegar hann reynir að sparka í hann og afleiðingin verður að sóknarmaðurinn, sem ná átti boltanum af, verður fyrir sparkinu og er felldur, - þessi varnarmaður á að fá refsingu fyrir atferli sitt. 

Gengi knattspyrnunnar og vinsældir hennar eiga mikið undir því að góðir sóknarmenn séu ekki beittir ódrengskap sem kemur í veg fyrir að þeir fái notið sín. 

Þetta má ekki fara aftur í sama far og á HM 1966 þar sem menn voru verðlaunaðir í raun fyrir tuddaskap í stað þess að vera refsað fyrir hann.

Maradona: Meðferðin á Messi er hneyksli

Athugasemdir

[Gísli Gíslason, 28.6.2010 kl. 12:30]

Góð athugasemd og þetta á vel við því þetta var dapurlegt.  Pele varð heimsmeistari 1958,1962 og aftur 1970.  Ekki ólíklegt að þeir hefður líka unnið 66 ef dómgæsla hefði verið í lagi.

En Maradonna ætti nú líka að vita það að hönd guðs var dómaramistök. Afdrifarík mistök og í framhaldinu varð hann heimsmeistari.  En hann var aðeins einu sinni heimsmeistari en Pele var 3 sinnum heimsmeistari.  Mikill munur þar á.

[Ómar Ragnarsson, 28.6.2010 kl. 13:06]

Munurinn var nú kannski líka fólginn í því að brasilíska liðið var á blómaskeiðinu 1958 til 1970 skipað svo mörgum afburða góðum knattspyrnumönnum, en segja má að aldrei hafi sigur í HM byggst jafn mikið á einum manni og sigur Argentínu 1986.

Það er erfitt að velja á milli Pele og Maradona ef velja á besta knattspyrnumann allra tíma. 

Minnir á það þegar blaðamaður spurði Helga Tómasson að því hver væri besti ballettdansari heims. 

Helgi svaraði af sinni alkunnu hógværð og rósemi: "Þetta er spurning sem er ekki hægt að svara, - við erum fjórir." 

[Kári Örn (IP-tala skráð) 29.6.2010 kl. 01:25]

Hahaha snilld, en hins vegar er ekki spurning um hver er besti knattspyrnumaður allra tíma í mínum bókum

Pele good
Maradonna better
George Best :)

[Gísli Gíslason, 29.6.2010 kl. 11:02]

Þetta er alveg rétt.

Ég held að Maradonna hafi verið betri knattspyrnumaður enda voru menn almennt meira þjálfaðir og betri þegar hann var upp. Samt skarðaði hann fram úr.

Ég held aftur á móti að Pele sé mesti snillingur sem knattspyrninan hefur átt.

Þannig að mín niðurstaða í þessu hefur verið að Pele sé mestur en Maradonna kannski bestur.