Hvenær hefur maður drepist og hvenær ekki?

Ofangreind orð eru í svipuðum stíl og fræg ummæli Jóns Hreggviðssonar í Íslandsklukkunni þegar hann er inntur eftir því hvort hann hafi drepið böðul konungsins.

Hér á Íslandi höfum við dæmi um það að maður, sem hvarf í Ameríku fyrir um tuttugu árum var úrskurðaður og skráður látinn þangað til hann birtist allt í einu sprelllifandi hér uppi á klakanum að mig minnir tólf árum síðar. 

Ekki minnist ég þess að fjölmiðlar eða aðrir hefðu kafað ofan í það hvernig þetta mátti verða enda virðast aðstæður hafa verið þannig að það virtist vera einkamál þessa manns hvort hann væri lifandi eða dauður. 

Jarðneskt líf og dauði Jesú Krists vafðist eðlilega fyrir fólki, ekki aðeins vorið, sem hann var krossfestur, heldur vekur það mál enn spurningar hjá mörgum. 

Þrenn morðmál á árunum 1967 og 1975 vekja enn spurningar og efasemdir. Raunar voru tvö þessara morðmála þess eðlis að efast má um hvort hægt sé að kalla þau morðmál. 

Morðið á Gunnari Tryggvasyni var staðreynd og lík, morðvopn og jafnvel ástæða þóttu liggja fyrir en þó var hinn ákærði réttilega sýknaður. 

Þegar Guðmundur og Geirfinnur hurfu átta árum síðar lágu hvorki lík, morðvopn né ástæður fyrir en samt voru kveðnir upp þyngstu dómar yfir sakborningum í því máli.

Raunar er ekkert sem liggur óyggjandi fyrir um það að þessir menn hafi látist. 

Það er því enn ekki alveg óhugsandi að fjölmiðlamaður geti staðið í Leifsstöð í beinni útsendingu í sjónvarpinu og sagt: "Nei, sjáið þið hverjir koma hér með vélinni frá New York!  Guðmundur og Geirfinnur! Sælir, strákar, hvar hafið þið eiginlega verið í öll þessi ár? " 

Kona, sem taldi sig vera Anastasiu, dóttur Rússakeisara, sem bolsévikar myrtu, gat blekkt fjölmiðla og ýmsa mikilsmetna menn árum saman. 

Var meira að segja gerð um hana kvikmynd og lagið "Anastasia" var eitt vinsælasta dægurlagið hér og víðar um svipað leyti. 

Nú hefur loksins komið í ljós við DNA-rannsókn að keisaradóttirin var drepin í rússnesku byltingunni.

Löngum hafa komið upp kvittir um það að Elvis Presley sé lifandi og við góða heilsu.

Þannig mætti lengi telja og ekki eru þau fá málin, þar sem viðkomandi ætlaði að svíkja út fé úr tryggingafélagi á þeim forsendum að hann væri dauður.  

Dáinn maður sannar að hann sé á lífi

Athugasemdir

[Jón Logi (IP-tala skráð) 2.7.2010 kl. 09:45]

Ég veit hverra manna sá horfni er, kynntist stuttlega foreldrum hans.

Þetta var skrítið hvarf, og hann var fljótt talinn af,en sumir lifðu í voninni og einn góðan dag skilaði hann sér.

Hann hefur að því ég best veit aldrei útskýrt hvar hann var og hvað hann var að gera, en það hefur heyrst að hann hafi verið á einhverju trippi í Mexíkó.

En...ég leyfi mér nú að efast um að Guðmundur og Geirfinnur snúi aftur. Býst frekar við því að þeim hafi verið haganlega komið fyrir. Auðvelt á Reykjanesinu....

[Sigurður Haraldsson, 4.7.2010 kl. 10:47]

Við mannskepnunnar erum svo margar og erfitt að henda reiður á okkur öllum sem búum á hnettinum