Svar við gátunni um nakta manninn á puttanum.

Vangaveltur og getgátur hafa verið á kreiki um furðufréttina af nakta manninum "á puttanum" á Suðurlandsvegi.

Ef maðurinn hefur fengið far er skýringin á þessu líkast til þessi: 

 

Um nakinn mann á ferð ég frétti

og finn við gátu svarið:

Einn hann lim sinn upp þar rétti

og út á hann fékk farið. 

Tilkynnt um nakinn mann á puttanum

Athugasemdir

[Þorvaldur Sigurðsson (IP-tala skráð) 4.7.2010 kl. 21:53]

Var ekki óþarfi að hafa þetta aukastuðlapar í síðustu línunni í annars ágætri vísu?

[nicejerk (IP-tala skráð) 5.7.2010 kl. 01:09]

Stuðlar og höfuðstaðir mega fara lönd og leið, því þetta er skemmtilega góð staka. Skemmtileg tvíræðni.

[Þorgils Hlynur Þorbergsson (IP-tala skráð) 5.7.2010 kl. 01:26]

Um nakinn mann á ferð ég frétti

og finn við gátu svarið:

Einn hann lim sinn upp þar rétti

svo út á hann tók farið.

Tillaga að neðstu línunni — annars snilldarkveðskapur. :-)

Bestu kveðjur,

[Sigurður Þorsteinsson, 5.7.2010 kl. 07:01]

[Ómar Ragnarsson, 5.7.2010 kl. 09:24]

Orðið og er gersamlega áherslulaust en orðið út með þungri áherslu kemur beint á eftir því og yfirgnæfir það algerlega. Orðið og fellur því utan reglna um hljóðstafi að mínu mati svipað og sóknarleikmaður í knattspyrnu sem hefur ekki áhrif á leikinn og telst því ekki rangstæður þótt hann sé innsti maður.

Hljóðstafir eru tónlist og hljómfall ljóðanna og dásamleg íslensk hefð sem ekki má glatast. 

Eitt af því merkasta sem Megas hefur gert er að leggja sitt af mörkum til bjargar þessari hefð. 

[Þorvaldur Sigurðsson (IP-tala skráð) 5.7.2010 kl. 09:58]

Nú hefur komist misskilningur að hjá skáldinu. Ég var alls ekki að fetta fingur út í hugsanlega ofstuðlun í upphafi línunnar og er skáldinu sammála um að þar er ekki braggalli á ferð. Hitt fer ekki vel að segja: „og út á það fékk farið.“ Þetta fyrirbæri er kallað aukastuðlar og telst ekki til einkenna vandaðs kveðskapar og hefðu hvorki Egill Jónasson, Lúðvík Kemp né Sveinbjörn Beinteinsson látið slíkt frá sér fara.

[Þorgils Hlynur Þorbergsson (IP-tala skráð) 5.7.2010 kl. 14:32]

Neðsta línan gæti samkvæmt því verið;

og út á hann tók farið.

Ég skal samsinna þessu með fyrsta orðið — það mun vera áherslulaus forliður. En sögnin að taka fer hér tvímælalaust betur í þátíð en sögnin að fá — sé litið til stuðlafalls. Þetta er nefnilega alveg rétt athugað hjá þér, Þorvaldur. Bestu kveðjur,

[Ómar Ragnarsson, 5.7.2010 kl. 19:12]

Samþykki þetta með lokaorðin og þá erum við allir sammála.

[Jóhann (IP-tala skráð) 5.7.2010 kl. 21:36]

Skemmtileg vísa Ómar. Veikleiki hennar er, ef einhver, síðasta línan.  Hér er tillaga:

umsvifalaust fékk farið