Veðrið hætt "að vera svo mikið erlendis."

Jafnvel þótt síðustu dagar ágústmánaðar verði frekar svalir stefnir í að sumarið í heild verði það hlýjasta síðan mælingar hófust."

Svo ég vitni enn einu sinni í skemmtilegt orðfæri Björgvins Halldórssonar hefur veðrið "verið svo mikið erlendis" í sumar, hvað eftir annað 15 til 20 stiga hiti um nær allt land í norðanátt. 

En nú er veðrið aftur orðið eðlilegt og íslenskt, og viðbrigðin eru mikil. En þrátt fyrir það eigum við að vera þakklát fyrir það mikla góðviðrissumar sem þegar er að baki. 

Það er bara ósköp venjulegt og hefðbundið sumarveður sem nú er komið og við getum eftir sem áður verið í sumarskapi. 

Varað við hvössum vindstrengjum

Athugasemdir

[Sigurður Þór Guðjónsson, 22.8.2010 kl. 16:45]

Það er ekki endilega rétt að segja að veðrið sé orðið ''eðlilegt''. Svona kuldakast getur alltaf komið og er ekki utan við það sem búast má við. En það er samt í harðara lagi miðað við árstíma og ekki hægt að segja að það sé t.d. ''venjulegt og hefðbundið'' þegar ekki er nema 22. águst. Svona veður er ekki hið dæmigerða veður 22. ágúst. Sem betur fer. Hlýindin sem voru eru líka íslensk, þau slógu reyndar sums staðar meðalhitamet en alls ekki alls staðar, þau voru líka eitthvað sem búast má við stöku sinnum.  Loks er engan veginn útilokað að aftur komi hlýir dagar, með yfir 20 stiga hita jafnvel. Það er oft snemmt að segja að sumarið sé að baki.

[Haukur Kristinsson (IP-tala skráð) 22.8.2010 kl. 18:30]

Veðrið hefur "verið svo mikið erlendis".

Getur einhver sagt mér hvað þetta merkir? Ég skil ekki setninguna.

[Ómar Ragnarsson, 22.8.2010 kl. 23:58]

Þú þarft að þekkja svolítið sérstæða orðabók Bo eða Björgvins Halldórssonar.

Oftast hefur verið sagt að eitthvað sé á heimsmælikvarða þegar íslensk fyrirbæri hafa þolað samanburð við það mesta eða besta erlendis. 

Ef Björgvin sér eða heyrir eitthvað íslenskt sem er af þessum toga á hann til að segja að það sé svo mikið erlendis. 

Dæmi: Íslenskur fatahönnuður hannar kjól sem stenst samanburð við það besta frá París. Þá myndi Bo kannski segja: "Þessi kjóll er svo mikið erlendis." 

Setningin "veðrið hefur verið svo mikið erlendis" þýðir: "Veðrið hér heima í sumar hefur líkst sumarveðrinu í útlöndum." 

[Haukur Kristinsson (IP-tala skráð) 23.8.2010 kl. 08:08]

Takk fyrir útskýringu á texta. Áttaði mig ekki á orðalaginu. Hef aldrei séð Björgvin, veit ekkert um manninn, mundi ekki þekkja röddina, þótt heyrði í útvarpi.