Á sögustað á grundvelli gagna.

Bidst velvirdingar a thvi ad geta ekki notad islenskt letur thar sem eg er nu staddur i Thyskalandi.

Það er því tæknilegum tilviljunum háð hvernig letrið verður.

Í gær komst ég á sögustað í Eifelfjöllum ekki fjarri þeim stað þar sem landamæri Belgíu, Lúxemborgar og Þýskaland mætast. 

Þar dvaldi Hitler frá mars fram í maí 1940 og stjórnaði þaðan innrás í Niðurlönd og Frakkland.

10. maí varð viðburðaríkur, því að þann dag hófst hin magnaða innrás en jafnframt bárust þær fregnir til foringjans að Bretar hefðu hernumið Ísland.

Samkvæmt gögnum sem Þór Whitehead fann mörgum áratugum síðar, fékk Hitler eitt af sínum frægu bræðisköstum við að heyra þetta, enda engin furða, því að hernám Íslands var tímamótaviðburður

Þetta var í fyrsta sinn sem Bandamenn höfðu frumkvæði en fram að því höfðu Öxulveldin ævinlega gert innrásir, -  Rínarlönd og Abbesínía 1936, Kína 1937, Austurríki og Súdetahéruð 1938, Tékkóslóvakía, Albanía og Pólland 1939 og Danmörk, Noregur, Holland, Belgía og Frakkland 1940. 

Hitler fékk eitt af sínum frægu bræðisköstum þegar hann frétti

Foringinn skipadi Raeder aðmíráli að gera áætlun um innrás í Ísland.

Reader gerði hana og samkvæmt henni hefðu Þjóðverjar auðveldlega getað tekið Ísland í september fyrir réttum 70 árum ef þeir gátu náð í upphafi yfirráðum í lofti yfir landinu eins og í innrásinni í Noreg.

Fyrir hreina heppni fann ég felustað Hitlers í gær inni í myrkvuðum skóginum nálægt þorpinu Rodert.

Það var magnað að standa þarna og upplifa í huganum þá stund þegar þá voldugasti maður heims ákvað að hrifsa Ísland undir hramm sinn.

Gögnin verða ekki birt

Athugasemdir

[Snorri Hreggviðsson (IP-tala skráð) 23.9.2010 kl. 09:07]

Heill þér Ómar,

þakka þér innilega fyrir þetta og allt sem þú hefur lagt af mörkum til að vernda land og þjóð.

Megi Ísland ala fleiri eins og þig og frúna þína!

........og hér er smá afmælisgjöf frá mér til þín :-)

Sjö fóru sætir tugir

sáust fyrr en þú hugðir.

Aldur berð útlit með prýði

þó andmæla árum ei þýði.

Fátt er það flestum að skapi

að fækki og árum þeir tapi.

Helst ei á hárum á vel

hættum, ei dýrar ég sel

því söguna sanna ég tel.

Baráttukveðja,

Snorri

[Vilhjálmur Örn Vilhjálmsson, 23.9.2010 kl. 11:02]

Sæll Ómar, 

Um hvaða innrásir er að ræða í heiti heimildarmyndarinnar "Brúarjökull og innrásirnar í Íslandi? Er forsetningin "á" ekki venjulega notuð á undan ínnrás, þegar innrásin er gerð á -land? Segir maður virkilega "innrásir í Ísland"? Ég er viss um að Eiður Svanberg myndi líka hvá.

Er annars hægt að tala um innrás ef hún hefur ekki heppnast, eða ef maður ætlar sér að "gera innrás". Annars er um tilraun til innrásar eða áætlun um innrás. Hernám Breta vilja sumir kalla innrás, en það er af og frá. Þeir komu í veg fyrir að nazistar gerðu innrás.

[Magnús Már Magnússon (IP-tala skráð) 23.9.2010 kl. 13:55]

Í eldra bloggi segir Ómar um Sauðárflugvöll norðan Brúarjökuls:

"Agnar Koefoed Hansen og Bergur Gíslason fundu þetta flugvallarstæði í september 1939 og það hefði getað gulltryggt Þjóðverjum að viðhalda yfirráðum yfir Íslandi eftir innrás ári síðar, sem áætlun var til um. 

En hvorki Agnar, Bergur né þýska vísindakonan Emmy Todtmann létu Þjóðverja vita um vallarstæðið, sem hafði algera sérstöðu varðandi stærð og notkunarmöguleika".

 Sjá nánar hér: Blogg 24.8.2009.

Reikna með að mynd Ómars hafi snertiflöt við þetta atriði, en Ómar væntanlega skýrir þetta betur.

[Ómar Ragnarsson, 23.9.2010 kl. 19:00]

Hugmynd mín og fyrirlestur um þetta efni sem ég hélt hjá Sagnfræðifélaginu fyrir tveimur árum nefnist "alternate history" á fræðimálinu og hafa ýmsar slíkar bækur verið ritaðar, svo sem "Föðurland" sem mér sýnist byggja á veikari hernaðarlegum forsendum en þær forsendur sem ég byggi mína hugmynd á.

[Þorvaldur Sigurðsson cand.mag (IP-tala skráð) 23.9.2010 kl. 19:02]

„Er forsetningin "á" ekki venjulega notuð á undan ínnrás, þegar innrásin er gerð á -land? Segir maður virkilega "innrásir í Ísland"? Ég er viss um að Eiður Svanberg myndi líka hvá.“

Þannig spyr Vilhjálmur.  Og þá mætti svara:  Dytti einhvurjum í hug að tala um innrásina á Normandí?  Innrásina á Noreg?  Og ætlaði Hitler heitinn ekki að gera innrás í England?  Ætli gegni ekki sama máli um Ísland?  Innrás er nebbnilega ekki alveg það sama og árás. Og það held ég nú, algerlega burtséð frá því hvað Eiður gerir og segir.

[Vilhjálmur Örn Vilhjálmsson, 24.9.2010 kl. 14:39]

Handa Þorvaldi og þeim sem eru að gera myndina með Ómari:

Normandí endar ekki á -land og heldur ekki Noregur. Noregur og Normandí eru heldur ekki eyjur. Við segjum einfaldlega ekki víkingarnir gerðu innrás í Hjaltland, eða innrás í Írland, Þjóðverjar gerður ekki innrás í Madagaskar en gerðu hins vega innrás í Pólland, enda er Pólland ekki er eyja. Gerð landsins skiptir hér máli. Forsetningin með innrás er á, þegar um eyju er að ræða!

Víð segjum líka: Á Bretlandseyjum, á Írlandi, og á Íslandi (eyjur), en í Noregi og í Normandí. Hins vegar heimtum við af Norðurlandaþjóðum að þær segi i Island, þótt við segjum á Íslandi (þ.e.a.s. på Island).

Ég hef nú þessi fræði frá Kristjáni Eldjárn og hann skrifaði ávallt på Island, en ekki i Island, eins og sumir með málfræðilega þjóðarrembu, eins og t.d. þú Þorvaldur.

Innrásir á Íslandi er það heillin. En þær hafa sem betur fer verið frekar fáar, ef nokkrar...

[Vilhjálmur Örn Vilhjálmsson, 24.9.2010 kl. 14:50]

Og ég er viss um, Þorvaldur, að Eiður Svanberg sé mér sammála í þessu. En gaman væri að heyra um það.

Annars hef ég upplýsingar um þetta Brúarjökulsflugvallamál, sem ekki hafa komið fram í bókum Þórs Whitehead. Danskur cand.mag. og síðar prófessor í norrænum fræðum, sem var á Íslandi á 4. áratugnum, sagði einnig syni sínum frá því er hann kom fram á Þjóðverja í afskekktum stað á Íslandi, þar sem þeir voru að aka um á farartæki, sem hann hafði aldrei séð áður.

Danir höfðu miklar áhyggjur af því að Íslendingar væru að leyfa Þjóðverjum meir brambolt á Íslandi en eðlilegt gat talist.

[Jón Logi (IP-tala skráð) 24.9.2010 kl. 19:36]

Síðast þegar ég vissi var Bretland(ið) eyja, og alltaf hef ég séð það nefnt sem innrás í Bretland. Tengist ekki "í-ið" innrás frekar en hinu? Ég er ekki ákafi í málfræði, en fjandanum minnugari, og íslenskan er stútfull af undantekningum eins og við vitum.

Annars er þetta aukaatriði og dregur athyglina frá aðalatriðinu, - áætluninni sjálfri.

Raeder var yfirmaður Kriegsmarine, - þýska flotans í heild. Hann mat það svo, að Þjóðverjar myndu geta hrifsað Ísland til sín, en myndi ekki haldast á því til lengdar vegna yfirburða Breska flotans. Vandamál með birgðaflutninga yrði of mikið.

Ég hef tilhneigingu til að telja þetta rétt metið hjá honum, en Ómar er líkast til ósammála. Við eigum eftir að skemmta okkur konunglega í rökræðum um þetta, og þá koma kannski fram hlutir sem nýtast í myndina. Eigum við ekki að nýta þessa bloggsíðu í slíkt frekar en þras um á og í?