"Er að aka - við akstur að vaka!"

Niðurstöður rannsóknarinnar á afleiðingum þess að ökumenn tali í farsíma meðan á akstri stendur ætti að hvetja frameiðendur símanna og símafyrirtækin til þess að nota tæknina til að ökumenn geti látið þá, sem hringja í þá í akstri, vita af því að þeir séu uppteknir við akstur.

Það gæti til dæmis falist í því að ökumaðurinn ýti þrisvar á sama takann, til dæmis miðjutakkann, og þá fara í gang sjálfvirkur símsvari þar sem sagt er: "Er að aka - hringi til baka", - eða "er að aka - við akstur að vaka". 

Raunar eigum við ekkert að fara á límingunum þótt hringt sé í okkur þegar við erum að aka. 

Flestar ökuferðir taka aðeins fáeinar mínútur hvort eð er og við getum yfirleitt séð á símanum úr hvaða númeri er hringt. 

Þetta minnir líka á þann mikla ósið og dónaskap sem við sýnum ef við erum í samtali við fólk og förum síðan skyndilega að svara símtali og tala við allt aðra manneskju. 

Það þarf að búa til nýjar og hagkvæmar aðferðir og reglur sem símnotendur temja sér til þæginda og öryggis fyrir alla. 

 

Ekið án bílbelta og talað í síma undir stýri

Athugasemdir

[Einar Steinsson, 9.11.2010 kl. 12:47]

Ég hef aldrei skilið hvers vegna fólk virðis líta á það sem heilaga skyldu sína að svara í símann hvernig sem aðstæður eru. Í mínum huga er það eðlilegur valkostur að svara ekki ef aðstæður eru óhagstæðar.

Eins og þú segir sér maður oftast hver hringdi og getur hringt til baka og þeir sem koma í veg fyrir að númerið þeirra birtist geta sjálfum sér um kennt.

Maður sér reglulega þessa kenningu um að samtalið dreifi athyglinni frekar en það að halda á símanum og það getur svo sem alveg verið rétt en þá fer ég að velta fyrir mér hvaða áhrif hefur samtal við farþegana í bílnum?

[Ómar Ragnarsson, 9.11.2010 kl. 20:06]

Örugglega alveg sömu áhrif enda hefur maður séð til ökumanna, sem eru svo uppteknir í samtali við farþega að þeir eru "úti að aka" og bæði til tafa og hættu.