Gildi einstaklingsins. Gleðilegt ár!

Val hlustendar Rásar tvö á Þórði Guðnasyni sem manni ársins 2010 sem og hlustenda Bylgjunnar sýnir, að almenningur metur það þegar einstaklingar vinna hetjuleg afrek og hika ekki þótt það setji þá sjálfa í hættu.

Bæði Þórður og Edda Heiðrún Backman, sem valin var í fyrra, eru vel að þessu komin. 

Eins og nú háttar þarf íslenska þjóðin á uppörvun að halda og þetta val, bæði nú og í fyrra, sýnir hug þjóðarinnar í því efni. 

Raunar hefur svona val líka löngum birst í því að velja þá persónu, sem mest bar og setti mestan svip á árið eða áorkaði mestu yfir heildina litið, burtséð frá því hvort það var til góðs eða ills.

Þannig valdi tímaritið Time Adolf Hitler sem mann ársins 1938 og Jósef Stalín sem mann ársins eitt heimsstyrjaldarárið, og tel ég að enda þótt þetta væru tveir af þremur verstu harðstjórum aldarinnar, að valið hafi út af fyrir sig verið rétt í bæði skiptin. 

Ekki þarf annað en að setja sig inn í samtímann 1938 til að sjá að á því ári hafði Hitler meiri áhrif á framvindu mála og söguna en nokkur annar, raunar langtum meiri. 

Hann fór sigurför inn í Austurríki og sameinaði það Þýskalandi og vafði síðan forystumönnum Breta og Frakka um fingur sé í Munchenarsamningum sem um áramótin 1938-39 sýndist á yfirborðinu vera friðarsamningur af því tagi sem orð Chamberlains vitna um þegar hann veifaði blaði með samningnum við heimkomuna til Bretlands og hrópaði: "Friður um okkar daga!" 

Á árunum 1941-44 báru Sovétmenn, leiddir af einvaldinum og harðstjóranum Stalín, hitann og þungann af stríði bandamanna við Hitler og þrátt fyrir mislagðar hendur í upphafi stríðs, var Stalín á þeim tíma óumdeilanlega maður ársins, "for good og worse" eins og sagt er. 

Time valdi borgarstjóra New York borgar mann ársins 2001 en í raun var enginn einn einstaklingur í heiminum, sem jafn mikið mark hafði sett á það ár og Osama bin Laden. 

Þegar við íhugum það hverju kaldrifjaðir harðstjórar hafa getað komið til leiðar verður það enn skýrara hve miklu hver einstaklingur getur komið til leiðar, ef hann sýnir hugrekki og fórnarlund.

Það ætti kannski að verða brýning fyrir okkur öll á nýju ári. 

Með þeim orðum óska ég öllum árs og friðar með kærri þökk fyrir ómetanlegan stuðning við verk mín og viðfangsefni á liðnu ári. 

Þórður Guðnason maður ársins á Rás 2

Athugasemdir

[Njörður Helgason, 31.12.2010 kl. 17:23]

Gleðilegt ár Ómar.

[Haraldur Haraldsson, 31.12.2010 kl. 22:19]

Gleðilegt ár Ómar og fjölsk.Kveðja

[Haraldur Bjarnason, 1.1.2011 kl. 09:54]

Þetta var ótrúlegt afrek sem drengurinn vann. Ég er viss um að afi hans,knattsprnumaðurinn og rútubílstjórinn hefði verið stoltur. kveðja til þín um áramót Ómar.

[Davíð Kristjánsson (IP-tala skráð) 2.1.2011 kl. 04:04]

Gleðilegt ár Ómar, og takk fyrir öll skemmtilegu stundirnar sem ég hef átt um dagana við að hlusta á tónlistagjörning þinn og horfa á fréttir og skemmtiefni í sjónvarpi.