Að fara á taugum.

Það er vafalaut rétt hjá Alex Ferguson að allt of oft verða þjálfarar liða blórabögglar vegna slaks gengis þeirra og mjög oft hafa þeir alls ekki fengið þann tíma eða efnivið til að þróa.

Ég held að oftast sé þetta svona en hitt kemur líka fyrir að í því flókna sálfræðilega samspili, sem er á milli þjálfara liðs og liðsmanna sjálfra og síðan samspilinu við stjórnir íþróttafélaganna getur eina lausnin stundum verið að skipta um mannskap. 

Um þetta gildir hið sama og í öllum mannlegum samskiptum, allt frá hjónaböndum og við stjórn fyrirtækja og félagasamtaka upp í ríkisstjórnir. 

Ferlar margra þekktra þjálfara sýna, að þeim sjálfum gengur misvel. Sumir af þeim þjálfurum, sem hafa náð lengst, hafa fyrr á ferlinum orðið að taka pokann sinn eða gengið misvel. 

Stundum geta þjálfarar spilað ótrúlega vel úr efniviði sínum, samanber það þegar Guðjóni Þórðarsyni tókst að laða fram frábæra liðsheild hjá KA sem hampaði loks Íslandsmeistaratitli. 

Og síðan eru dæmi um hið gagnstæða, að jafnvel sami þjálfari og talinn var kraftaverkamaður hjá einu liði, mistekst alveg við að ná því besta fram úr liði, sem er skipað miklu betri einstaklingum. 

Mig grunar að það sé rétt hjá Ferguson að ekki hefði átt að reka Roy Hodgson núna úr því sem komið var heldur að gefa honum tækifæri út leiktíðina til að spila úr spilum sínum. 

Liverpool verður héðan af varla meðal efstu liða núna og varla í fallsæti heldur. Mig grunar að nú hafi stjórnendur félagsins einfaldlega farið á taugum.

Ferguson: Sorgleg niðurstaða

Athugasemdir

[Hörður Sigurðsson Diego, 9.1.2011 kl. 16:55]

Ja, stuðningsmenn Liverpool voru orðnir alveg brjálaðir og vildu losna við Hodgson strax. Þeir hefðu ekki tekið vel í að ekki væri hlustað á þá og úr því sem komið var lágu engin önnur úrræði á borðinu. Það var því rétt ákvörðun að láta Hodgson fara.

[Ómar Ragnarsson, 9.1.2011 kl. 18:23]

Kannski var þetta flóknara ástand en mér sýndist og mér yfirsást að taka stuðningsmannahópinn með.

Ef íþróttafélag á að geta ná árangri þarf meira en mennina í lðinu, og summan af getu þeirra getur orðið miklu minni en samanlagður árangur ef tengslin og baráttuandinn tengist ekki á jákvæðan hátt þjálfanum, aðstoðarmönnunum, stjórninni og félagsmönnum öllum. 

Allir verða að vera samtaka og þá getur samanlagður árangur orðið betri en summan af getu leikmanna. 

Ferguson var kannski aðeins að hugga Hodgson og veita honum samstöðu með því að beina orðum stuðningamannasöngs Liverpool til hans: "You´ll never walk alone".