"Those other countries".

Það voru fleiri en sonur Ronalds Reagans sem fannst einkennilegt hvernig hann "datt út" oft á tíðum í orðræðu sinni en það var yfirleitt skrifað á háan aldur hans og það að forseti Bandaríkjanna á við að glíma ofgnótt staðreynda og upplýsinga og getur ekki munað það allt.

Allir þekkja það fyrirbæri þegar nafn eða orð virðist gersamlega týnt þegar á þarf að halda og þetta ágerist oft með árunum án þess að um Alzheimer sé að ræða. 

Ég hef líkt heilabúi okkar gamlingjanna við harðan disk, sem er orðinn fullur af ofgnótt atriða og forrit hans byrjar að henda út orðum og atriðum eins og sjálfvirkt án þess að ráðfæra sig við okkur. 

Þetta komi sjaldnar fyrir ungt fólk þar sem ekki væri ekki eins mikið inni á harða diskinum. 

Gagnvart okkur Íslendingum kom þetta einu sinni fram við athöfn í Washington, þar sem Reagan ætlaði að nefna Ísland og Norðurlandaþjóðirnar en mundi greinilega ekki eftir orðunum "Skandinavía" eða "Nordic Countries heldur sagði "...Iceland and...eh, ..those other countries." 

Íslendingar minnast líka þess, þegar forsetinn var að vandræðast með minnismiða í vasa sínum í boði sem hann var í í tengslum við leiðtogafundinn, og var að fálma eftir honum til að muna eftir loftferðasamningnum við Bandaríkin sem honum hafði verið sagt að væri mikilvægt málefni fyrir Íslendinga. 

Ég held að ekki verði með nokkru móti sagt að Alzheimer-sjúkdómurinn hafi á nokkurn hátt valdið því að Reagan hafi orðið á sérstök mistök hans vegna, og raunar er leitun að ráðamanni sem gengur 100% heill til skógar á öllum sviðum. 

Kostir Reagans vógu það upp og vel það, þótt vandræði fjármálakerfisins 2008 hafi varpað skugga á og leitt í ljós veikleika þeirrar efnahagsstefnu sem margir kenna við Reagan og Thatcher.

Raunar finnst mér upplýsingarnar um sjúkdóm Reagans frekar stækka hann en minnka líkt og mér finnst áfengisböl og annar krankleiki Jónasar Hallgrímssonar stækka hann frekar en minnka. 

Verk og afrek manna, sem eiga við slíka bölvalda að eiga, verða einmitt merkilegri þegar þess er gætt við hvaða aðstæður þau urðu til.  

Of enginn getur tekið í burtu þá staðreynd að Reagan var forseti þau ár þegar straumhvörf urðu í samskiptum risaveldanna og í Kalda stríðinu, þótt múrinn hafi falllið einu ári eftir að Reagan fór frá völdum. 

 

Með Alzheimer í forsetastóli

Athugasemdir

[Bjarne Örn Hansen (IP-tala skráð) 15.1.2011 kl. 14:16]

Ætli Ronald Reagan hafi ekki gætt sín mun betur, vegna þeirra aðstæðna sem hann bjó við. Er ekki oft talað um það í biblíunni, að raunirnar styrki mennina ...

[Bjarki Hilmarsson (IP-tala skráð) 15.1.2011 kl. 15:48]

Anyone who is capable of getting themselves made President should on no account be allowed to do the job.
   Douglas Adams (1952 - 2001), The Hitchhiker's Guide to the Galaxy

[Sigurður Þór Guðjónsson, 15.1.2011 kl. 18:51]

Ef alkóhólisminn stækkaði Jónas þá hlýtur hann líka að stækka alla aðra alka. Segðu aðstandendum virkra alkóhólista það.

[Sævar Helgason, 15.1.2011 kl. 22:03]

Að verða gleyminn á efri árum ? Er vegakerfi heilans ekki bara orðið lúið og ógreiðfært ? Það skilar sér ekki allt alltaf á leiðarenda.

[DoctorE (IP-tala skráð) 15.1.2011 kl. 22:15]

RR var snargeggjaður, fyrir og eftir sjúkdóminn.

[Eiður Svanberg Guðnason, 16.1.2011 kl. 00:10]

Og Mogginn talar um 100 ára  ártíð Reagans! Þeir  klikka ekki Moggamenn.

[Ómar Ragnarsson, 16.1.2011 kl. 05:19]

Ekki misskilja mig, Sigurður Þór. Áfengið er nú talið eitthvert skaðlegasta fíkniefnið og ég er ekki í vafa um að án hinna slæmu afleiðinga þess fyrir Jónas hefði þessi afburðamaður afkastað miklu meira en hann gerði.

En það, hve miklu hann afkastaði samt, fyllir mann aðdáun á því hvað honum tókst þó að koma í verk og enn meiri depurðar vegna örlaga hans. 

Ég hafna þeirri kenningu, sem sumir halda fram, að fólk þurfi helst fyrst að fara alveg niður á botn til þess að gera sér grein fyrir því hve lífið er dásamleg gjöf. 

Ég tel að kennsla í "lífsleikni" og þekkingu á siðfræði og mannlegu eðli, styrkleikum þess og veikleikum,  eigi að fá nýtt og stóraukið vægi í menntun grunnskólans svo að nemendur hans séu betur undir það búnir að fara út í lífið og takast á við viðfangsefni lífs síns og samborgara sinna. 

Að sá lærdómur sem kenndur er með æðruleysibæninni og öðrum góðum sjálfsræktarráðum á borð við tólf spora kerfið sé kynntur ungu fólki áður en það heldur út í lífið. 

[Ómar Ragnarsson, 16.1.2011 kl. 05:20]

Leiðrétting: "...depurð..."  á það að vera, ekki "...depurðar..."

[Ómar Ragnarsson, 16.1.2011 kl. 05:22]

Samlíking mín varðandi harða diskinn er að sjálfsögðu gálgahúmor. Auðvitað hrörnar heili okkar með árunum eins og aðrir líkamshlutar.