Þekkt fyrirbæri varðandi "neysluna."

Það er þekkt fyrirbæri í tengslum við vandamál fíkniefnaneytenda, þar með taldir áfengisfíklar, að bætt aðgengi að efnunum og meiri nálægð þeirra eykur neysluna.

Fíkill, sem er að reyna að komast á réttan kjöl, fær eftir meðferðina hjálparmann (sponsor), sem fíkillinn felur alræðisvald hvað þetta snertir og hvaðeina sem kemur fíkninni við. 

Ef fíkillinn vill til dæmis fara á samkomu, sem lítur sakleysislega út, kannski bara afmæli eða slíkt, gerir hann hjálparmanni sínum grein fyrir því hvernig samkoman muni verða, hverjir verði þar og hvers verði líklega neytt. 

Komist hjálparmaðurinn að þeirri niðurstöðu að líklega verði of mikil neysla eða of mikið af vímuefnaneytendum bannar hann fíklinum harðlega að fara á samkomuna. 

Það kann að virðast fúlt en hér er venjulega um líf eða dauða að tefla fyrir fíkilinn sem beygir sig undir þá staðreynd. 

Britney Spears virðist vera í aðstöðu, sem líkist þessu, og þá duga engin vettlingatök, - allt verður að leggjast á eitt um að halda freistingunni og fíkninni frá. 

Ekkert áfengi og engin eiturlyf

Athugasemdir

[Páll (IP-tala skráð) 21.3.2011 kl. 01:35]

Aðeins að "leiðrétta". Uppsetningin hjá þér gæti valdið misskilningi.

Fólki er ekki útvegaður hjálparmaður "sponsor" eftir meðferð. Það fólk sem kýs að fara í AA eða önnur 12-sporasamtök er í sjálfs vald sett hvort það fær sér sponsor innan þeirra samtaka eða ekki. Sponsorakerfið kemur meðferðinni yfirleitt ekkert við. Sponsorinn er svo ekki alræðisvald nema hann sé andlega lasinn því 12 sporaleiðin gengur ekki út á það. Hins vegar er ekki óalgengt að fíkill ráðfæri sig við sponsor um ýmislegt sem gengur á í sínu lífi. Hverjum og einum er þó algerlega frjálst að hunsa þau ráð ef hann vill.

Í tilfelli Britneyjar er þetta ósköp borðleggjandi. Vímuefni og vímuefnanotkun getur kveikt fíkn hjá fíklum í upphafi batans og því mjög eðlilegt að gera ráðstafanir sem stuðla að því að lágmarka hættuna á slíku.