Snúið mál og þarf að kryfja til mergjar.

Það þarf að gera eitthvað til þess að tryggja að mál á borð við ráðningu skrifstofustjóra í forsætisráðuneytinu komi ekki aftur upp.

Í hliðstæðum álitamálum áður varðandi ráðningar hafa ráðherrar gengið á svig við álit matsaðila og farið sínu fram, en svo var ekki í þessu máli. Hvernig gat matsnefndin í þessu máli komist að allt annarri niðurstöðu en kærunefnd jafnréttismála? 

Ef komast á hjá svona uppákomum, ættu ráðherrar þá að fela kærunefndinni fyrirfram að úrskurða í málum af þessu tagi, ef einstaklingar af báðum kynjum sækja um? 

Eitthvað þarf að gera. Þetta gengur ekki svona, hverjum sem um er að kenna. 

 

Gat ekki sniðgengið matið

Athugasemdir

[Eyþór Örn Óskarsson, 24.3.2011 kl. 14:52]

Sæll Ómar - að mínu viti er lausnin sáraeinföld, það þarf að búa til matsreglur sem standast lög og samþykkja sem lög frá alþingi - þar með væri búið að lögfesta ferlið sem slíkt og taka af allan vafa.........

þetta á að vísu eingöngu við um opinberar ráðningar, en mætti vera til viðmiðunar í einkageiranum....

[Marinó G. Njálsson, 24.3.2011 kl. 15:17]

Ómar, mér finnst alltaf betra þegar menn kryfja inn að beini og brjóta til mergjar, enda held ég að hitt sé ekki hægt.

Varðandi efnið, þá er ekkert sem bendir til þess að aðferðafræðin hafi verið röng.  Deilt er um hvort matið á hverjum lið sé rétt.  Hvernig hægt er að komast að þeirri niðurstöðu að eitt mat sé öðru rétthærra og leiði þar með til þess að lög hafi verið brotin, skil ég ekki, en ég hef ekki allar staðreyndir málsins fyrir framan mig.  Eina leiðin til að komast að þeirri niðurstöðu er að skoða alla umsækjendur og setja þessa nýju stiku á þá alla.  Kærunefndin kemst að því að kærandi og sá sem var ráðinn hafi verið jafn hæfir, en ekki var skoðað hvernig ný matsaðferð breytti stöðu annarra.

Annars er merkilegt, að ráðgjafi forsætisráðuneytisins í þessu máli er kona sem að auki virðist hafa lagt metnað sinn í að hafa hlutina rétta.  Henni sárna greinilega aðfinnslur kærunefndarinnar, eins og berlega kemur fram í yfirlýsingu hennar.

[Ómar Ragnarsson, 24.3.2011 kl. 20:17]

Þakka kærlega fyrir ábendingarnar um ruglið varðandi "að kryfja til mergjar." Svona lagað á ekki að geta komið fyrir mann á mínum aldri.

Þetta er næstum því eins slæmt og þegar Páll Zóphaníasson átti að hafa sagt að einhver hefði komið "eins og þjófur úr heiðskíru lofti" og ruglaði saman "að koma eins og þjófur að nóttu" eða að eitthvað "komi eins og þruma úr heiðskíru lofti." 

Vaxandi rugl hrjáir fjölmiðlafólk varðandi meðferð málshátta og orðatiltækja og eftir að hafa röflað um þetta dettur maður sjálfur í einn pyttinn!