Herðubreiðarlindir hafa sérstöðu.

Það er rétt að sýna varkárni við að opna hálendisvegi. Bara það að ákveðinn hálendisvegur sé viðkvæmur á tiltölulega litlum kafla réttlætir það að hann sé ekki opnaður.

Ég hef flogið þvers og kruss yfir hálendið í vor og eins og undanfarin vor sker einn hálendisvegur sig úr, en það er leiðin inn í Herðubreiðarlindir. 

Þessi leið hefur orðið snjólaus undanfarin vor og líka í vor langt á undan öðrum leiðum. Því miður virðist ekki hafa verið tekið tillit til þessa undanfarin ár, heldur beðið eftir því að hægt væri að opna alla leiðina upp í Öskju i einu lagi. 

Ein af ástæðunum fyrir þessu hefur mér heyrst vera sú, að það sé ódýrara og hagkvæmari að gera þetta í einu lagi í stað þess að fara tvær opnunarferðir, aðra til að opna inn í Herðubreiðarlindir og hina síðari til að opna alla leið upp í Öskju. 

Það er gríðarlega mikið hagsmunamál fyrir ferðaþjónustuna, sem sífellt er verið að hvetja til að lengja ferðamannatímann, að vinsælum leiðum sé ekki að óþörfu haldið lokuðum.

Miðað við heildarávinninginn af því að opna leið jafnskjótt og unnt er, skýtur skökku við að mun minni peningarlegir hagsmuni Vegagerðarinnar ráði hér för. 

Hálendið enn lokað fyrir umferð

Athugasemdir

[Óskar Andri (IP-tala skráð) 15.6.2011 kl. 11:04]

Sælir

Ég er ansi hræddur um að þetta gerist víðar en bara í Herðubreiðarlindum. Kanski ekki akkurat þetta vor en mér þykir það orðið ansi algeng, því miður, að lokanirnar fari eftir dagatalinu frekar en raunverulegum aðstæðum. Þetta er aðeins farið að valda því að Vegagerðin er farin að missa trúverðugleika þegar kemur að lokunum fjallvega og slík þróun er alls ekki góð.

Kv.

Óskar Andri