Mikil aukning í því að fólk er að koma inn með orðið aukningu.

Síðasti sólarhringur hefur verið sérstakur fyrir það að orðið "aukning" hefur verið notað meira og verr en ég man að hafi áður gerst á einum degi.

Í hádeginu heyrði ég þessa setningu: "Það hefur orðið mikil aukning í því að fólk er að koma inn með minni tekjur..."  Notuð 16 orð í stað þess að segja einfaldlega: "Fólk hefur minni tekjur."  4 orð. 

Síðan  hefur í ofanálag blandast saman við þetta á köflum stanslaus notkun sagnarinnar "að vera" bæði í nútíð og þátíð og það gerðist einmitt í setningunni, sem var sögð í hádegisfréttunum. 

Í spjalli um EM í knattspyrnu 21. árs og yngri gerðu menn langtímum saman ekki neitt heldur voru þeir sífellt eða eru að gera það. "Liðið var að ná ekki upp samspili" og "þetta lið er ekki að halda boltanum"  og "er ekki að eiga góða daga" o. s. frv.

Fyrirsögn þessa pistils væri eins og að ofan greinir ef hann væri í þessum nútíma "kúl-" stíl sem þykir svo "töff".

Í stað þess að segja einfaldlega: "Orðið aukning æ meira notað".  En það er auðvitað alltof flatt og gamaldags. 

Margir vilja nema á Bifröst

Athugasemdir

[Kristinn Snævar Jónsson, 16.6.2011 kl. 23:58]

Já, Ómar. Þetta er óttalega þreytandi málalengingar.

Ég held að þetta tjái öðrum þræði óhreinskilni og sannleikshræðslu eða -fælni þeirra sem þannig mæla; Að koma sér ekki beint að efninu né segja hlutina eins og þeir eru. Þar má greina einhvern vott af meðvirkni og þöggun.
En, einnig getur þetta stafað að einhverju leyti af "ósjálfstæði" í málfari fólks er birtist í því að éta ambögur upp eftir öðrum umhugsunarlaust. Eða, "hvað sem er" (e. "whatever" eins og vinsælt er í að tjá það nú til dags), þegar ekki er nenna til að útskýra málið betur.

[Kristinn Snævar Jónsson, 16.6.2011 kl. 23:59]

Leiðrétt: "Þetta eru óttalega þreytandi málalengingar", vildi ég sagt hafa.