Afastrákarnir að koma inn.

Það er gaman að fylgjast með því hvernig afastrákarnir eru að koma inn í knattspyrnuna, þeir Rúrik Andri Þorfinnsson (19) með Fylki, Sigurður Kristján Friðriksson (16 ) með Aftureldingu og Olgeir Óskarsson (22) með Fjölni.

Strákarnir hafa verið á æfingum með landsliðunum í aldursflokkum sínum og lofa góðu.

Rúrik Andri er fljótur eins og afinn var og leikinn eins og pabbinn, skæður sóknarmaður. Ragnar föðurbróðir hans var valinn efnilegasti leikmaðurinn í sínum aldurflokki í Fram á sínum tíma og Ragnar langafi hans var sömuleiðis valinn efnilegasti leikmaðurinn í Íslandsmeistaraliði Fram 1939 þegar hann var 17 ára.

Ragnar og Þorfinnur voru hörkuleikmenn á sínum yngri árum og mátti varla á milli sjá, hvor var betri.  

Sigurður Kristján Friðriksson var fyrir 16 árum skírður í höfuðið á afa sinum, sem var í gullaldarliði Fram á sinum tíma.

Ég var úti á landi í dag og missti af því að sjá Rúrik Andra leika með Fylki gegn ÍBV og eiga skot í stöng. "Þetta kemur!" hefði ég kallað ef ég hefði verið á vellinum og veit að það hefði verið eitthvað á bak við það, því að strákurinn var iðinn við að skora í yngri flokkum Fram meðan hann var það, en hann fór yfir í Fylki fyrir þetta leiktímabil.

Næsta laugardag leikur Fylkir við Fram og það verður erfitt fyrir mig að fara á þann leik og þurfa að hvetja sonarson minn til dáða á sama tíma og hann leikur gegn hinu gamla félagi okkar beggja.

Strákarnir kynnast bæði súru og sætu í íþróttunum. Rúrik Andri kom upp úr meiðslum í vor og Olgeir varð fyrir glórulausri taklingu í leik með liði sínu og sumarið var eyðilagt fyrir honum.

En þessir strákar eru ungir, eiga lífið framundan og mótlætið herðir þá bara.  

P.S. Nú heyri ég að Íslenski boltinn byrji í Sjónvarpinu klukkan 00:20 eftir miðnætti í kvöld. Það er fullt af ungu fólki og vinnandi fólki sem horfir á þetta efni og furðulegt að hafa þetta á dagskrá um miðjar nætur.

En svona er nú fótboltinn!  

Eiður Aron kvaddi ÍBV með sigri í Árbæ

Athugasemdir

[Helga Kristjánsdóttir, 4.8.2011 kl. 00:02]

  Svona var þetta hjá vinkonu minni Huldu Péturs og eiginmanni hennar Þórhalli Einarssyni fyrst,eftir að þau fluttu í Kópavog. Mágur minn  gamall Frammari á Hvammstanga Einar Jónsson (1933),þarf ekki að hafa áhyggjur af hlutdrægni,ekkert af afabörnum hans leikur fótbolta. En dóttir hans sá um byggingu knattspyrnuvallar staðarins.Þetta sýndi hann mér um leið og hann dvaldi við minningar á knattspyrnuferli sínum. Sagðist hafa verið kallaður poti-pot, ég gleymi alltaf að skila kveðju til Frammara frá honum og spyrja hvort þeir muni eftir þessu viðurnefni. Minnir þó að ég hafi skilað því til Reynis Karlssonar.      Það verður allt svo stórfenglegt í minningunni,hjá okkur gömlu.

[Sigurður Þorsteinsson, 4.8.2011 kl. 06:22]

Í byrjun sumars fór ég til Evrópu og kom að við hjá einum af stóru klúbbunum. Það sem ég fæ á tilfinninguna að meiri áhersla sé nú lögð á að rækta leikmenn frá 17-21 árs, leikmenn uppalda hjá félögunum. Fylgja uppbyggingunni eftir. Þetta finnst mér við geta gert betur hér heima. Ræktun kalla þeir þetta, ekki hætta á síðustu metrunum og ákveða fyrir uppskeru hvort hún verði góð eða ekki. Hér heima er þetta kallað ungmennafélagsandi. Að allir fái álag miðað við hæfi.

 Með því að koma að mörgum félögum, áttar maður sig á því að það eru mörg hólf í hjartanu og þá er ekkert mál að horfa á leik ,,sinna" liða. Með aldrinum verður maður enn ruglaðri og ég á til að klappa fyrir góðum tilburðum hjá andstæðingunum. Uppáhaldsliðin eru ekki lengur. Fótboltinn verður eins og góð skák. Fótboltinn verður einn eftir. 

Rúrik og Olgeir hef ég séð, en Sigurð ekki, maður fer ekki oft á leiki ,,úti á landi". Vonandi fá þessir ungu leikmenn ræktun við hæfi. Árangur 21 árs liðsins mun gefa ungum leikmönnum meiri tækifæri á næstunni. 

[Guðmundur Ásgeirsson, 4.8.2011 kl. 13:02]

Ekki hafði ég hugmynd um að þeir væru afkomendur þínir. Það vill svo skemmtilega til að Rúrik er aðstoðarþjálfari sonar míns í 7. fl. Fylkis.

Áfram Fylkir!