Hörmulegt slys á "Formúlu eitt flugsins".

Dökka hliðin á bíla- og flugíþróttum eru slysin, sem oft geta orðið hræðileg. Reno flugkeppnin er frægasta keppni af þessu tagi í heiminum og hefur verið það allt frá 1964.

Samkvæmt fréttum sendi flugmaðurinn út neyðarkall áður en hann missti stjórn á vélinni svo hún hrapaði nær lóðrétt niður rétt hjá áhorfendaskaranum við brautina. 

Sama flugvél missti afl í keppninni 1970 en þá tókst flugmaninnum að nauðlenda henni nær óskemmdri. 

Vafalaust verður allt fyrirkomulag og reglur keppninnar teknar til skoðunar eftir þetta hörmulega slys, en ólíklegt er að miklu sé hægt að breyta. 

Það er eðli allrar hreyfingar að henni fylgir hætta og oft því meiri hætta sem hraðinn er meiri.

Flugvélarnar sem att er kappi á í Reno ná allt að 800 kílómetra hraða á klukkustund, en samkvæmt þeim fréttum, sem boris hafa af þessu slysi, virðist það ekki hafa orðið vegna þess að flogið hafi verið of lágt eða hratt, heldur hrapaði vélin eftir ofris í kjölfar þess að hún varð stjórnlaus, hugsanlega vegna vélarbilunar. 

Það á hugsanlega eftir að koma betur í ljós við rannsókn. 

Það er skrýtin tilfinning og ekki beint þægileg að þurfa að bæta á atburði afmælisdags síns þessu slysi ofan á hið hörmulega slys, þegar franska rannsóknarskipið Pourqous pas? strandaði við Mýrar 16. september 1936. 

Hingað til hefur það slys verið eina athugasemdin í íslenskum minnisbókum við þennan dag og mér hefur alltaf fundist það óþægilegt, - hugsað til móður minnar, sem varð 15 ára daginn sem skipið fórst og.  

En svona vegast neikvæðir og jákvæðir hlutir á í lífinu. Við erum fæddir þennan dag, ég, Jón Ársæll Þórðarson (1950) og Artur Björgvin Bollason, - móðir mín hefði orðið níræð í gær og Dagur íslenskrar náttúru er þennan dag. 

Fyrir ári sendi maður mér þá vitneskju í tölvupósti, að 16. september hefðu átta Íslendingar fæðst, allt drengir og allir náðu sjötugsaldri fyrir réttu ári. Það er þó eitthvað til að hugga sig við. 

Þrennt ferst á flugsýningu

Athugasemdir

[Haukur Kristinsson (IP-tala skráð) 17.9.2011 kl. 17:57]

Eitt af verstu slysum “airshow” sögunnar varð í ágúst 1988, í Ramstein í Þýskalandi. 3 flugmenn og 67 áhorfendur létust. Ég man vel eftir þessu, en þá var ég búsettur ekki langt frá staðnum.  

 

[Þorvaldur Sigurðsson (IP-tala skráð) 17.9.2011 kl. 20:50]

„Fyrir ári sendi maður mér þá vitneskju í tölvupósti, að 16. september (og hér vantar ártalið en við gerum ráð fyrir að átt sé við 1940 en þessi tala sem hér kemur á eftir passar við það ár) hefðu átta Íslendingar fæðst, allt drengir og allir náðu sjötugsaldri fyrir réttu ári.“

Þetta er ekki rétt. Eiginlega bara þónokkuð ekkirétt. Þessir 8 drengir skriðu á áttræðisaldurinn fyrir réttu ári en höfðu þá verið á sjötugsaldri góða stund.  Fyrir ári komust hins vegar sex strákar og 4 stelpur á sjötugsaldurinn. 

[Ómar Ragnarsson, 17.9.2011 kl. 22:39]

Svona er að trúa öllu sem að manni er gaukað og ruglast síðan á því á hvaða "...ræðisaldri" maður er!