Því lengur sem maður lifir, því meiri líkur...

Þegar Berlusconi segir vilja lifa að eilífu er kannski ekki víst við hvaða líf hann á, þetta jarðneska eða eitthvað annað. 

Eigi hann við hið jarðneska líf ætti hann að íhuga hvort ósk hans sé raunhæf.

Að minnsta kosti þurfti ég að komast á áttræðisaldur til að átta mig á þeim sannindum, sem ég hef formað í eftirfarandi spakmæli: ´

"Því lengur sem maður lifir, því meiri líkur eru á að maður drepist."

Með öðrum orðum: Við fáum öll að gjöf þrenns konar daga, fæðingardag, lífdaga og dauðadag.

Því fleiri sem lífdagarnir verða, því meiri líkur eru á því að einhver þeirra verði að dauðadegi.

Svo einfalt er það.

 

P. S.  Ég hitti séra Hjálmar Jónsson í kvöld og minntist á þetta og þá varð til annað spakmæli um svipað viðfangsefni:

"Afmæli lengja lífið.  Því fleiri afmæli, sem menn eiga, því langlífari verða þeir."

Berlusconi vill lifa að eilífu

Athugasemdir

[Haukur Kristinsson (IP-tala skráð) 29.9.2011 kl. 21:13]

Ég held að það sé nokkuð skýrt við hvaða líf hann Berlusconi eigi við. Nefnilega það jarðneska. Sú ósk að lífa hið jarðneska líf að eilífu, er nefnilega miklu raunhæfari en það að lifa að eilífu í “einhverju öðru”.  

[drilli, 29.9.2011 kl. 23:06]

Það verður nú fljótlega farið að húkka í hæklana á þessu skoffíni. Bókstaflega , eða ekki. Er þessi lúði annars ekki fjarskyldur afkomandi Mussolini ?

[Ómar Ragnarsson, 29.9.2011 kl. 23:21]

Ekki veit ég það, en Mussolini var djarftækur til kvenna alla tíð og varð hjákona hans, Clara Petacci að gjald fyrir það með lífi sínu í lokin.