Má ekki dragast mikið lengur.

Nú eru 35 ár síðan Guðmundar- og Geirfinnnsmálin voru í hámarki og það má ekki dragast mikið lengur að fram fari sú nauðsynlega og ítarlega rannsókn, sem verður að framkvæma.

Því miður hefur það virst svo sem ekki yrði hægt að hreinsa þessi mál fyrr en að allir, sem tengjast þeim, eru farnir, þeirra á meðal sú kynslóð, sem því tengdist, því að þetta var mál allrar þjóðarinnar.

Já, hagsmunaaðilarnir eru ekki fáir, því að það var þjóðarkrafa, nánast heróp á sínum tíma, að þessi mál yrðu upplýst refjalaust, enda lýsti öflugasti stjórnmálamaður þess tíma, Ólafur Jóhannesson því yfir, þegar dómar voru kveðnir upp: "Þetta er mikill léttir fyrir þjóðina."

Þá voru að baki einhverjar dæmalausustu pólitísku sviptingar sem hér hafa orðið, af því að þessum"morðmáuml" var blandað inn í pólitík.

Margt vekur athygli nú, þegar málið er vakið upp. Til dæmis það atriði, að af mikilli samviskusemi hafi það verið fært til bókar í Síðumúlafangelsinu að keyptar hafi verið getnaðarvarnarpillur á sama tíma og þar dvaldi kona í algerri einangrun.

Þetta er aðeins eitt af hreint ótrúlega mörgum atriðum, smáum og stórum, þar sem þessi mál ganga alls ekki upp.

Þjóðin verður að taka á sig rögg og hreinsa burtu ljótustu nornaveiðar síðari tíma í eitt skipti fyrir öll.

Vill rannsóknarnefnd um Geirfinnsmálið

Athugasemdir

[Jóhanna (IP-tala skráð) 4.10.2011 kl. 10:32]

Við hvern á að ræða? Sumir eru dánir af þeim sakfelldu. Margir af þeim sem bornir voru þungum sökum og voru saklausir, hafa verið allt sitt líf að endurbyggja sálina og reyna að treysta á samfélagið, þótt það sé næstum ógerlegt. Hvað á að vinnast með þessu? Skapa vinnu fyrir lögfræðinga sem sjá nú að enginn einstaklingur getur tekið þá í vinnu vegna ofurhárra launa. Hver er þeirra taxti per.klukkustund.

Þá verður nátturlega að láta reyna á það. Ríkið taki upp málið aftur eftir þrjátíuogfimm ár!!!! Smjattið á því!!!! Hver á að borga brúsann? Aðstandendur? Skattborgarar? Hættið þessu röfli, þetta var nógu sorglegt á sínum tíma. Engum, ég skrifa engum heilvita manni á að detta það í hug að eyða fjármunum í það að koma nokkrum lögfræðistofum á ríkisjötuna svo og svo lengi. Ef við lítum á svía með sitt Palmemorð þá eru þeir ennþá með fullt af fólki á launum við að leita að morðingjanum. Ég held að nú séu komnar upp háværar raddir um að loka fyrir þessa leit. kannske er það þegar búið, ég hef nú ekki fylgst með því í seinni tíð. En Svíþjóð er nú svolítið stærra land, og þeir geta kannske leyft sér að leika með peninga.

Við getum ekki og höfum ekki efni á að láta einhverja vælandi lögfræðinga sem sjá fram á atvinnuleysi ýta okkur útí eitthvert forað sem enginn sér fyrir endann á, ekki einusinni þeir sem heimta þetta...Ef einhverjar nornaveiðar voru í gangi þá... þá höfum við fullt af nornum núna í dag sem liggja betur við höggi en þessar fyrir þrjátíuogfimm árum síðan, og vonandi ódýrari að koma þeim frá.

[Jón Logi (IP-tala skráð) 4.10.2011 kl. 10:52]

Obb obb obb, Ómar, þú þarft að lesa þér aðeins meira til um P-Pilluna ;)

Það þarf meira til að skekkja málið heldur en það.

Það eru reyndar til einhverjar upplýsingar um málið sem enn eru undir leynd/trúnaði. T.d. þagnarskylda talsímavarða á þeim tíma.

Svo eru sverari hlutir alveg augljósir, líkt og styttugerðin, - "Leirfinnur".

[Anna Sigríður Guðmundsdóttir, 4.10.2011 kl. 14:32]

Ómar. Takk fyrir góðan, þarfan og réttlátan pistil.

Erlu Bolladóttur var nauðgað af valdamönnum, í fangelsinu í Síðumúla, og það eitt og sér ætti að vera mikið baráttumál almennings á Íslandi, að fá endurskoðað og upplýst í nafni mannréttinda og réttlætis.

Svo er öll hin lygaþvælan líka tómt rugl, um að einhver hafi verið drepinn, án nokkurra sannana, morðvopna eða líkfundar, heldur einungis með kúgaðar játningar yfirvalda á verknaði sem aldrei var framinn.

Geirfinnur er að öllum líkindum lifandi og býr erlendis, og þetta dóms-svikamál var allt sviðsett til að fela afbrot hættulegra afbrota-embættismanna. Ég fullyrði þetta, og þessi orð mín standa þar til annað hefur verið sannað af réttlátu dómskerfi.

Gjörspillt dómskerfið er alls ekki yfir gagnrýni hafið.

Afkomendur þessara saklausu aðila, sem dæmd voru fyrir verknað sem þau frömdu ekki, eiga rétt á að vita sannleikann, ásamt saklaust dæmdum aðilum sem enn eru á lífi.

Rétt skal vera rétt.

Þannig skulu lög og réttur undanþágulaust virka fyrir alla jafnt.

M.b.kv.

[Jóhanna (IP-tala skráð) 4.10.2011 kl. 19:10]

Anna Sigríður 14.32

Hver gerði það að verkum að Sigurbjörn, Valdimar og Einar Bollason sátu inni í yfir 100 daga í einangrun? Eigum við að biðja Erlu systir Einars B. að svara því? Hafi henni verið nauðgað, hvaða vitni eru að því? Ef þau finnast, sem ég er stórlega efins um, hvaða rök eru fyrir því að taka þetta upp núna eftir þrjátíuogfimm ár. Ég skil ekki þetta helv.... rugl.

Ég sem skattborgari á Íslandi tek ekki þátt í svona endemis þvælu.