Dræsueigendur stikkfrí ?

Grétar Már Þorkelsson reynir að snúa hreindýramálinu í landi Flateyjar upp í það að fjölmiðlaumfjöllun um það sé almenn árás á bændur. Hann segir: "Bændum er kennt um og þeir sagðir upp til hópa dýraníðingar".

Hvar hefur það verið sagt að bændur séu upp til hópa dýraníðingar?  Grétar verður að finna orðum sínum stað.

Hann réttlætir líka það ástand sem birtist í löngum ónýtum girðingadræsum með því að bena á að álftir fljúgi víða á háspennulínur og drepi sig.

Það er billeg leið að réttlæta eitthvað, sem aflaga fer með því að eitthvað svipað dæmi finnst annars staðar.

Ég hef sterkar taugar til Hornafjarðar og Hornfirðinga og bloggaði um það nýlega að leitt væri ef dauð hreindýr í girðingadræsum yrðu að táknmynd Hornafjarðar.

Hef séð þess stað að eiga skoðanasystkin eystra varðandi það að fjarlægja ónýtar girðingadræsur.

Ég hef hvergi séð í umfjölluninni um almenna árás á bændur sem séu upp til hópa sakaðir um að vera glæpamenn.  

Það sem sást í fréttum sjónvarps var einfalt mál:  Nokkur af þeim hreindýrum, sem hafa drepist við það að flækja sig í ónýtum girðingadræsum á víðavangi.

Einhverjir hljóta að eiga þessar dræsur og bera ábyrgð á þeim. Eða er eitthvað óklárt með það? 

Ég tók söguna um litlu gulu hænuna til hliðsjónar varðandi það að hver bendir á annan í þessu máli og sé ekki að í því hafi falist svívirðilega árás á bændur almennt.

Varpaði meira að segja fram þeirri spurningu hvort lofa ætti þessu að vera óbreyttu af því að ábyrgðin væri þeirra sem fluttu hreindýr inn til landsins á átjándu öld. Þeir eru löngu dauðir og því ekki hægt að leita til þeirra og á þann hátt er það kannski lausnin, - málið dautt eins og hinir dauðu.  

Í pistli Grétars er tilgreindur mikill kostnaður við girðingar og má af því ráða, að ekki sé neitt aflögu til að fjarlægja ónýtar girðingadræsur.

Er það virkilega talið í góðu lagi að ekkert sé gert í þessum málum og þau þögguð niður af því að umræðan skoðist sem ómakleg árás á bændur sem séu sagðir vera dýraníðingar upp til hópa?

Gagnrýnir umræðu um hreindýr við Flatey á Mýrum

Athugasemdir

[Ingi (IP-tala skráð) 5.11.2011 kl. 16:08]

Í bloggheimum hafa bændur verið kallaðir þessu öllu, þar eiga orðin stað. Reyndar sést það vel í bloggheimum hvað sauðsvartur almúginn er illa að sér þegar kemur að landbúnaði yfirleitt. Kannski afleiðing esb sinna og krata.

Kostnaðurinn sem Grétar telur er vegna viðhalds girðinga.

Sérðu virkilega ekkert athugavert við það að hreindýrin valdi þessum skaða? Skilurðu ekki að margar girðingar verði að dræsum einmitt vegna hreindýranna? Á bóndinn bara að brosa sínu og girða þetta upp hvað eftir annað?

Í síðasta sinn, dýrin eru einfaldlega of mörg og þá sérstaklega tarfarnir.

Verst af öllu er að margir geta ekki, einsog með svo ofboðslega margt annað, séð málin út frá báðum hliðum.

[Þorsteinn J Þorsteinsson, 5.11.2011 kl. 17:16]

En ætli stofnin tæki nu skada af tvi ad hreinlega farga dyrum,sem td festast a hornum hvors annars,eda i svokølludum dræsum,væri allavegana mannudlegra en ad lata taug sytja føst(sa reindar Bonda her i frettum tar sem var synt 3 ara gømul girding gjørsamlega i rust eftir hreindyrin),og tad seigir sig u sjalft ad audvitad getur madur ju ekki bara fjarlægt allar gyrdingar,tad hlitur ju ad vera astæda fyrir ad tær eru settar upp og audvitadkostar ad reisa nyjar girdingar ar eftir ar,og hver a ad borga vid neitendur natturulega annars stadar verda peningarnir ju ekki teknir,audvitad er ekkert ad bædi ad vernda dyr og halendi,en vid verdum to ad fa ad tryfast herna a tessum klaka

[Arna (IP-tala skráð) 5.11.2011 kl. 17:24]

Hvenær og hvernig verður girðing að girðingardræsu? Venjulega er það þegar girðingin er orðin gömul og úr sér gengin, en þannig er því ekki varið í þessu tilviki.

Mig langar til að ítreka það að þessar girðingardræsur eru nýjar og væru allar uppistandandi og myndu halda þeim gripum sem þær voru upphaflega ætlaðar fyrir ef hreindýrin væru ekki búin að brjóta þær niður.

Þegar hreindýrin stökkva yfir girðingar þá eru þau ekki eins og hástökkvarar sem reyna að fara sem hæst yfir heldur eru þau að svífa rétt fyrir ofan strenginn og það þarf ekki mikið til þess að þau reki fót í vír og fælist og þá byrjar ballið!

Dýrin á þessu svæði eru orðin allt of mörg og þau eru þarna allt árið þannig að ágangur þeirra er mikill.

[Ómar Ragnarsson, 5.11.2011 kl. 19:31]

Innlegg mitt um daginn var Litla gula hænan, "hundurinn sagði: ekki ég, kötturinn sagði: ekki ég...." o. s. frv.

Í þessu tilfelli þarf greinilega samræmt átak fleiri en eins aðila til þess að leysa málið.

Einn aðilinn er sá, sem hefur yfirsýn yfir fjölda hreindýra á svæðinu og vitneskju um það hvernig og hvort sé hægt að fækka þeim.

Annar aðilinn gæti verið sá opinberi, sem getur styrkt eigendur girðinganna fjárhagslega svo að þeir geti betur haldið þeim við.

En einn aðilinn hlýtur þó að vera girðingaeigendurnir sjálfir. Ég finnst ekki rétt að brigsla fjölmiðlum um aðför að "bændum upp til hópa sem séu dýraníðingar" þótt aðild eigenda girðingadræsanna að þessu vandamáli sé nefnd.

[Gunnar Th. Gunnarsson, 5.11.2011 kl. 19:35]

"Er það virkilega talið í góðu lagi að ekkert sé gert í þessum málum og þau þögguð niður af því að umræðan skoðist sem ómakleg árás á bændur .." segir Ómar.

Ég fæ ómögulega séð að bændur vilja þagga umræðuna niður

[Olgeir (IP-tala skráð) 5.11.2011 kl. 21:02]

Ég setti saman limru í dag í tilefni hreindýraumræðunnar og eftirlits

Þau fylgjast með dýrum með vírum

og fara eftir reglunum skýrum.

En girðingar góðar

tæta hreindýrin óðar

um túnin á Flatey á Mýrum.

[Helga (IP-tala skráð) 6.11.2011 kl. 00:37]

Ef þú hefðir lesið greinina hans Grétars þá hefðirðu séð að þessi mál hafa ekki verið þögguð niður og bændur hafa nú þegar brugðist við með því að fjarlægja eða laga girðingarnar, á eigin kostnað eins og þeir hafa þurft að gera á hverju ári hingað til.
Bændurnir komu þessum girðingarflækjum ekki fyrir að ásettu ráði og þeir standa ekki og hlæja að dýrum sem hafa fest sig í þeim. Það er verulega ósanngjarnt að bæði fjölmiðlar og þú Ómar, segið frá því að bændur firri sig ábyrgð og hyggist ekki aðhafast neitt. Sumir myndu kalla það haugalygi.

Málið snýst um það (enn og aftur) að hreindýrastofninn á þessu svæði er orðinn alltof stór, svo stór að hann getur ekki séð sér fyrir æti nema að leita inn á ræktuð lönd bænda, sem verða í kjölfarið fyrir tjóni á girðingum, tjóni á ræktuðu landi og tjóni vegna uppskerutaps. Þeir eru einfaldlega að gefast upp á því að vera með þessi dýr í fóðrun stærsta hluta ársins á eigin kostnað og kalla eftir því að stofninn verði grisjaður þannig að hann beri sig.

Öll þau meiðyrði og uppnefni sem fram koma í greininni hafa verið látin falla og meira til, bæði í bloggheimum og á Facebook, sérstaklega á síðum þeirra dýraverndunarsinna sem höfðu hvað hæst í fjölmiðlum og stýrðu umfjöllun þeirra framan af. Þann sorahaug ætti enginn að þurfa að lesa.

[Jón Logi (IP-tala skráð) 6.11.2011 kl. 13:25]

Tja, nú þykir mér týra á tíkinni, því ég var of seinn með að orða það sem Gunnar lagði hér inn. Sem sagt sammála kallinum.

Ómar, - ég þekki til Grétars, og hef aldrei heyrt hann vera að fara með eitthvert bull, hann er bæði lífsreyndur og flugskarpur skratti. Minnir mig að sumu leyti á....þig ;)

Þetta með girðingar(dræsurnar) er nokkuð sem ég þekki vel og er ekki saklaus af að hafa fóstrað þær einhverjar. En það vill nú bara svo til að girðingar eru til að halda fénaði frá einhverju, eða fénaði í sundur. Þekki það allt of vel þegar vargfénaður liggur á girðingum til þess að komast í gott æti, og eins þegar náttúran er að störfum. Það er og ekkert grín að halda fullkomlega upp á fullkomnar girðingar á sæmilegu lögbýli,  - gæti fundist ársverk í því sumstaðar. En bændabýli eru nú til dags ekkert að sligast af ónýttu vinnuafli, og verður mér þá hugsað til ritstjórans Jónasar Kristjánssonar, sem hélt á lofti þeirri kenningu að við fækkun bænda, t.d. niður í ca 500, þá væru eftir stöndug bú með allt í pottþéttu. En veruleiki stéttar minnar er blóðugri en það þrátt fyrir helmings fækkun á ca 25 árum, þá standa eftir hálfdauðar sveitir með skuldaklafa á flestum stöðum og mannfáa bæi sem enn er búið á.

Ekki öfunda ég stéttarbræður mína að austan að þurfa að girða sig frá þessum hreindýraskröttum. Kvikindið er í raun þindarlaus smábelja, vel hyrnd, og hraðskreiðari en hross. Og stærsti skandallinn finnst mér nú vera sá að umráðamenn kvikindanna skuli ekki sjálfir sjá til þess að halda upp á merkjargirðingar, en hverjir eru umráðamenn? Ríkið eða ein af þess stofnunum líkast til.

Það er því stærsti skandallinn að umráðamenn þessara kvikinda sjái ekki til þess að þau séu ekki valsandi um allt. Mæli með skipuritaðri skilgreiningu á því dæmi, og svo í framhaldi af því sleppingu á 1000 stykkjum á Hellisheiði