Meistara smápistlanna þakkað.

Það hefur vantað punktinn yfir i-ið í 60 minutes síðan Andy Rooney hætti að fara með pistla sína þar í lok þáttanna.

Þegar litið er til baka er það merkilegt, að maður skuli ekki minnast eins einasta lélegs pistils frá honum, heldur hafa þeir ævinlega sett sitt ómissandi mark á frægasta sjónarpsfréttaskýringaþátt heims.

Það er af mörgu að taka ef minnast ætti á einhvern einn pistil sem hefur verið eftirminnilegri en aðrir, en þeir hafa verið um stórt og smátt, allt frá alvarlegum atriðum í heimspólitík til smæstu smáhluta.

Mér er til dæmis lengi í minni pistillinn sem hann flutti um það, hve erfitt væri að opna margar umbúðir um hluti og sýndi dæmi um það. 

Pistli af þessu tagi er ekki hægt að gleyma því að hvað eftir annað rekst maður á þetta fyrirbæri og stundum er engu líkara, þegar um tiltölulegan ódýran smáhlut að ræða eins og tölvulykil, að verið sé að koma í veg fyrir stórþjófar reyni að brjóta sér leið inn í umbúðirnar, sem engin leið er að opna nema með verkfærum.

Rooney endaði pistilinn á ógleymanlegan hátt með því að sýna og kynna handbók, sem gefin hafði verið út til þess að leiðbeina fólki við að opna rammgerar umbúðir. Í ljós kom að handbókin var í svo rammgerum umbúðum að það kostaði hið mesta basl að opna þær !

Rooney sannaði það með löngu og farsælu ævistarfi að fólk þarf ekki að vera deginum eldra en það vill ef andinn og lífsgleðin ráða för.

Aðeins mjög klárt, hugmyndaríkt og afkastamikið fólk getur haft á hendi yfirstjórn á þætti eins og 60 minutes en það hefur ekki verið frágangssök hjá þessum fræga þætti að manni, komnum hátt á áttræðisaldur, sé falið það starf.

Þótt mikilvægt sé að hafa ungt og frískt fólk í fjölmiðlastörfum, samanber máltækið nýir vendir sópa best  má æskudýrkunin ekki vera svo mikil að litið sé á fólk eins og úr sér gengið og útbrunnið, þótt það sé komið yfir fimmtugt. Það er afar persónubundið hvernig fólk eldist.

Í Hruninu var fækkað geigvænlega hjá íslenskum fjölmiðlum og því miður sagt upp of mörgu reyndu fólki.

Í hraða fréttamennskunnar gefst oft ekki tími til að fara að "gúggla" til þess að glöggva sig á eðli mála og sjá til dæmis strax hvort eitthvað svipað hafi gerst áður og finna það, til að átta sig á mikilvægi hinnar nýju fréttar og tengslum við annað .

Þá geta gömlu brýnin verið mikilvæg.

Sagt er að maður komi í manns stað og vonandi kemur jafnoki Andy Rooney fram.

En það er mikill söknuður að þessum meistara smápistlanna og full ástæða til að þakka honum fyrir langt og gefandi ævistarf.

Andy Rooney látinn

Athugasemdir

[Elvar Másson (IP-tala skráð) 5.11.2011 kl. 19:32]

Falleg orð, að vanda.

[Ólafur Sveinsson (IP-tala skráð) 5.11.2011 kl. 19:58]

Hann var snillingur kaldhæðninar.

[Sigurður Antonsson, 5.11.2011 kl. 20:28]

70 ára rithöfundaferli lokið. "Að segja sannleikann í gegnum útvarp og sjónvarp." Eftirtektarvert er að hann leit á sig sem rithöfund, fyrst og fremst. Það tók Andy 50 ára að verða frægur að hans eigin sögn. Eftir það reyndist erfitt að forðast frægðina. Maðurinn var með eindæmum orðheppinn. Í Ameríku eru eldri menn sem vilja vinna ekki settir til hliðar á hvíldarmannabekk. Allt of margir fullfrískir hætta of snemma og því miður deyja löngu fyrir tímann. Rooney var á tíræðisaldri.

[Brjánn Guðjónsson, 5.11.2011 kl. 21:17]

aldur er bara tala á blaði.

meðan maður lokar sig ekki af í skáp ellinnar, heldur lifir lífinu og tekst á við uppátæki þess, er maður ungur.

[Ómar Ragnarsson, 6.11.2011 kl. 00:59]

Ellin er það að finna einhvers staðar til á hverjum og degi og gleðjast yfir því, vegna þess að ef maður vaknar einhvern morguninn án þess að finna til, er maður dauður.

Stundum þýða orð, sem eiga að vera niðrandi hvað aldurinn varðar, hið mesta hól. Að minnsta kosti upplifði ég ekki meira hól hér í gamla daga, þegar ég var að keppa við ungu strákana í rallinu, heldur en þegar ég heyrði þá segja hvor við annan og áttu þá við mig: "Helvítis kallinn, það er engin leið að ráða við hann".  

Ellin færir manni tvö einföld "spakmæli":

1. Því lengur sem maður lifir, því meiri líkur eru á að maður drepist. Öll eigum við þrjár tegundir lífdaga: Fæðingardag, einhverja lífdaga og dauðadægur. Því fleiri sem lífdagarnir verða, því meiri líkur eru á því að einhver þeirra verði dauðadægur.

2. Tvennt lengir lífið, hlátur og afmæli. Hláturinn af viðurkenndum ástæðum, - afmælin vegna þess að því fleiri sem þau verða því lengur lifir maður.

Séra Hjálmar Jónsson kom með fyrri hluta síðara spakmælisins, þar sem við sátum saman í kvikmyndahúsi nýlega og ég prjónaði síðan seinni hlutann við.

[Jón Logi (IP-tala skráð) 6.11.2011 kl. 16:30]

Kalli biskup kom með skýringuna á afmæli. Það er AF-MÆLI, eins og að mæla af, og er þá verið að vitna til þess að mæla af ævinni. En hve stór talan er, það fylgdi ekki.