Hin lúmska, hægfara sókn.

Offita er ákaflega lúmskur og hægfara sjúkdómur. Þarf ekki annað en að skoða algengar tölur í því sambandi.

Hjá langflestum er þetta hægfara og jöfn þróun, sem stendur yfir í marga áratugi. 

Algengt er að þyngingin hefjist um þrítugt og gerist svo hægt að fæstir verða hennar varir. Hver tekur eftir því þótt manneskja, sem maður þekkir og hittir oft og jafnaðarlega, þyngist um eitt kíló á einu ári? 

Breytingin, sem verður á hverju ári þegar þetta gerist svona rólega, nemur ekki nema innan við 100 grömmum á hverjum mánuði og dreifist um líkamann, þannig að hún er allt annars eðlis en til dæmis ef farið er til Kanaríeyja eða Flórída að vetrarlagi og komið heim kaffibrúnn eftir að hafa verið fölur og fár í skammdeginu hér heima.

En ef þyngingin nemur að jafnaði 100 grömmum á hverjum mánuði og byrjar um þrítugt, er hún orðin samtals tæplega 50 kíló um sjötugt !

Best er að gera sér grein fyrir þróuninni nógu snemma og setja fram langtímamarkmið.

Setjum sem svo að aðgerðir gegn þyngingunni hefjist um fimmtugt þegar hún nemur alls um 25 kílóum, er aðalatriðið að fara ekki á taugum og vaða í harðan megrunarkúr, sem oft ber takmarkaðan árangur til langframa eins og dæmin sanna, heldur vinna á þyngingunni jafnt og þétt. 

Ef það takmark er sett að léttingin verði tvisvar sinnum hraðari en þyngingin var, eða 200 grömm á mánuði, verður léttingin 2,4 kíló á ári og fyrri þungi næst eftir tíu ár. 

Raunar er það eðlilegt að fólk þyngist um nokkur kíló með aldrinum, þannig að í þessu tilfelli væri æskilegum árangri náð á nokkrum árum.

Lífið er langhlaup og flest viðfangsefni þess einnig.  

Langar þig að vinna bókina Hvers vegna fitnum við?

Athugasemdir

[K.H.S., 2.12.2011 kl. 11:58]

Best væri nú að setja  kolefnis og kaloriuskatt á gömlu fituhlunkana með hjálp  Hindriða og Íþróttafréttaálfsins. Þeir kunna sko að skatta til bætingar. Allir þeirra skattar eru gerðir fyrir þig. þér til bóta. Samanber sikurskatturinn.

Sjá svo hvort renni ekki af þeim spikið eins og dollarar af virkjunum.

[DoctorE (IP-tala skráð) 2.12.2011 kl. 14:13]

Ég er enn jafn nettur og fínn og þegar ég var 20 ára. Alltaf í kjörþyngd, algerlega án þess að reyna.

Verðið að kunna ykkur hóf græðgispúkar :)

[Sævar Helgason, 2.12.2011 kl. 17:16]

Þetta er eins og syndin -lævís og lipur. Lenti í þessu síðsumars að öll föt voru orðin of þröng. Sjálfur taldi ég að ég væri smávegis yfir kjörþyngd minni sem er um 80 kg. Ég steig á vigt -eitthvað sem ég hafði ekki gert í mörg ár. 97.5 kg sagði skalinn á vigtinni. Þetta var áfall. Bara 17.5 kg í yfirþyngd. Nú hófst talsvert skipulagt átak. Markmiðið var að losna við þessa yfirvigt á næstu fimm mánuðum. Um 65% átti að  fara við aukna hreyfingu-restin við breytt mataræði -einkum flaug sykur, gos og sætindi-burt. Og nú rúmum 4 mánuðum síðar á ég eftir að losna við 1.5 kg og þá er 80 kg kjörþyngd náð. Þetta hefur verið alveg bráðskemmtilegt-einkum hinar löngu gönguferðið hér og þar.... Góða skemmtun.