Blettur á knattspyrnunni.

Knattspyrna er vinsælasta íþrótt í heimi þegar tekið er tillit til allra þátta samanlegt, áhorfs í sjónvarpi, aðsókn á leiki, umfjöllun fjölmiðla og almennings og þátttaka hans.

Það sem skyggir helst á er ruddaleg framkoma áhorfenda og oft á tíðum leikmanna líka. 

Þetta á ekki aðeins við um erlendu fótboltabullurnar heldur ættum við Íslendingar líka að líta í eigin barm. 

Orðbragð áhorfenda hér heima er oft ekki hægt að hafa eftir og til hreinnar skammar og mikilla leiðinda. 

Þetta getur gengið svo langt að þegar krakkarnir eru að spila, til dæmis á stórum pollamótum, missa foreldrarnir alveg stjórn á sér, bölva og ragna og láta öllum illum látum. 

 Gera þarf alþjóðlegt átak til þess að bæta úr þessu því að svona lætur fólk ekki í flestum öðrum íþróttagreinum eins og til dæmis á frjálsíþróttamótum. 

Hvað snertir atvikið í leik Ajax og AZ held ég að gera verði meiri kröfur til leikmanna en verstu bullanna meðal áhorfenda. 

Að sjálfsögðu ber að virða rétt markvarðar AZ til sjálfsvarnar gegn lúalegri og forkastanlegri árás áhorfandans. 

Á hinn bóginn er eitt alveg kristaltært í mínum huga: Þú sparkar ekki í liggjandi mann! 

Ég get ekki séð hvernig dómarinn gat brugðist öðru vísi við slíkri framkomu leikmanns. 

 

P. S. Síðar í dag:

Við nánari íhugun held ég að ég verði að draga úr þessum harða dómi mínum gagnvart markmanninum og sýna honum skilning.

Þetta gerist mjög hratt og enginn tími til þess að vera að neinu tvínóni og dunda við að velja sér viðbrögð. 

Markmaðurinn sparkaði fyrst í fætur árásarmannsins og hefði kannski átt að láta nægja að gera sparka aðeins í fæturna til þess halda honum á jörðinni.

Spörkin á skrokk manns orkuðu frekar tvímælis en með spörkum í höfuðið hefði verið farið yfir strikið nema maðurinn tæki upp hníf.

Um dóm dómarans gildir hið sama og um annað sem þarna gerðist í hraða og hita augnabliksins.  

 

„Hann lenti á röngum manni“

Athugasemdir

[Hallur Magnússon (IP-tala skráð) 23.12.2011 kl. 10:47]

Mikið rétt!

Þetta hefur verið vandamál óralengi eins og sjá má á pistlum "Bennó" í Skinfaxa árið 1916 - en ég hef verið að birta þá einn af öðrum á blogginu mínu.  Þar segir ma.:

"Annars er best að ofstopamenn og þeir sem baldnir eru viðureignar, væru aldrei þátttakendur á kappmótum, því að þeim mönnum er enginn sómi í leiknum,  þó þeir séu  annars mjög duglegir. Þeir fæla frá — þessa fáu áhorfendur sem leikmótin sækja."

Þessi tilvitnun er úr pistli Bennó sem fjallar um dómarann og mikilvægi hans:

http://blog.eyjan.is/hallurm/2011/12/19/domarinn-er-madurinn/

[Gunnar Th. Gunnarsson, 23.12.2011 kl. 12:39]

Það verður að líta til ferils markmannsins en ekki dæma hann út frá þessu eina atviki. Það var ráðist á hann með spörkum og offorsi og hann sýndi varnar og hræðsluviðbrögð. Hann vildi gera árásarmanninn óvígan strax, frekar en að eiga á hættu meiðsli. Líkamlega heilsa markmannsins er lifibrauð hans.

Ef markmaðurinn er ekki þekktur af ofbeldi þá finnst mér að refsing hans eigi að vera í algjöru lágmarki.

[Ari (IP-tala skráð) 23.12.2011 kl. 14:51]

Þarna í þessu atviki var réttlætanlegt að sparka í liggjandi manninn á þann háttinn sem þetta gerðist, þ.e. að sparka bara í fæturna á honum til að halda honum á jörðinni þangað til fleiri kæmu til að yfirbuga hann. Hvað á markmaðurinn með heita blóðið að vita um fyrirætlanir bullufávita sem kemur askvaðandi í vímu og með offorsi til að ráðast á leikmann? Hann gæti verið geðbilaður og með hníf á sér. Hollenska fótboltasambandið er enda sammála mér og hefur fellt niður rauðaspjaldið. http://www.mbl.is/sport/fotbolti/2011/12/22/rauda_spjaldid_dregid_til_baka/