"...njóttu þess heldur að berjast!"

Fanney Þorbjörg Guðmundsdóttir var í fremstu röð íslensks skíðafólks. Fólk kemst ekki svona langt nema eitthvað sé í það spunnið.

En sannur meistari er eftir sem áður aðeins sá sem sýnir hvað í honum býr, þegar mótlætið er mest. 

Þá fyrst kemur styrkurinn í ljós, styrkur sem ræður úrslitum. 

Fanney er nú með jákvæðni sinni og baráttuvilja að takast á við miklu erfiðara verkefni en að verða besta íþróttakona landsins á sínu sviði. 

Fram til þessa hefur hún með fordæmi sínu gefið okkur hinum miklu meira en hún gerði með íþróttaferli sínum. 

Fyrir það ber að þakka og láta hana vita, að hún á hug okkar allra í baráttu sinni og að við sendum henni hvatningarorð:

 

Láttu´ekki mótlætið buga þig, heldur brýna ! 

Birtuna má aldrei vanta í sálu þína ! 

Ef hart ertu leikin svo þú átt í vök að verjast

vertu´ekki hnuggin, njóttu þess heldur að berjast ! 

 

Með baráttu sinni sendir Fanney til okkar allra þessa áskorun:

 

Látum ei mótlætið buga´okkur, heldur brýna ! 

Brosum og elskum og látum ljós okkar skína ! 

Fanney stendur í fæturna

Athugasemdir

[Helga Jónsdóttir25 (IP-tala skráð) 10.1.2012 kl. 23:04]

Mikill sannleikur fólginn í þessum orðum. Hún og fleiri í hennar sporum eru okkur hvatning til þess að taka til í okkar ranni og takast á við erfiðleika og áskoranir í okkar lífi.