Fræg síðustu vink.

Stundum er talað um "fræg síðustu orð" (famous last words) og má sjá nokkur slík í fornsögum okkar svo sem "hneit þar", "vel hefur konungurinn alið oss, - feitt er mér enn um hjartarætur" og "...Eigi veit ég hvort Gunnar (á Hlíðarenda) var heima, en hitt veit ég að atgeir hans var heima".

Svo er heyra að Costa Concordia hafi verið siglt svona nálægt landi til þess að yfirþjóninn og fleiri gætu veifað kunningjum sínum í landi, og má segja að þar hafi verið á ferðinni "fræg síðustu vink." 

Heyra mátti í gærkvöldi að skipstjórinn hefði sagt að skipið hefði verið 300 metra frá landi, en í sömu frétt kom fram að aðeins 70 metrar voru í land. 

Vonandi felur orðliðurinn "Concord.." ekki í sér álög hvað varðar stórslys, en eina hljóðfráa farþegaþota heims í rúmlega þrjátíu ár, hlaut váleg örlög sem og "Concordski", Tupulev 144, sem fórst á flugsýningu í París áður en hægt var að taka hana í notkun.

Hvað Tu-144 snertir var talið að flugstjórinn hafi ofmetið getu vélarinnar í viðleitni sinni til að heilla flugsýningargesti upp úr skónum líkt og yfirmenn Costa Concordia vildu heilla kunningja sina í landi.

Tvö af frægustu flugslysum veraldar gerðust þannig að flugstjórarnir fóru yfir getumörk flugvélanna.

24. júní 1994 ætlaði flugstjóri Boeing B-52 að sýna enn einu sinni frábært atriði sem fólst í því að fljúga í lítilli hæð í krappan hring í kringum flugturninn á flugsýningu í Alaska, - hafði áður fengið aðvaranir fyrir svipað án þess að því væri fylgt eftir.

Flugvélin hrapaði til jarðar og fórst.

Svipað gerðist fyrir nokkrum árum þegar C-17 risa-flutningaþotu (sama gerð og flutti Keiku til Eyja) var flogið á líkan hátt eftir flugtak, en beygjan var of kröpp fyrir hana miðað við flughraða.

Bæði þessi atriði má sjá á YouTube og auk þess lesa nánar um þau á Wikipeda.  

Að lokum má geta þess að enda þótt Titanic slysið sé illræmdasta sjóslys allra tíma var það langt í frá það mannskæðasta. 

Mannskæðasta slysið var þegar rúmlega 4200 manns á flótta frá herjum Rússa frá Austur-Prússlandi fórust á Eystrasalti vorið 1945, rétt fyrir lok Seinni heimsstyrjaldarinnar. 

Það slys varð hins vegar á þeim tíma þegar allt að 100 þúsund manns voru drepnir í einu í stærstu loftárásum stríðsins og vakti því hvergi nærri sömu athygli og svona slys gera á friðartímum. 

Skipstjórinn gerði mistök

Athugasemdir

[Haukur Kristinsson (IP-tala skráð) 16.1.2012 kl. 13:31]

Skoðaðu þetta Ómar.  

http://www.youtube.com/watch?v=-cv2ud1339E

[Jón Logi (IP-tala skráð) 16.1.2012 kl. 13:45]

Ef þú átt við Wilhelm Gustloff, þá fórust þar rúmlega 9.000 manns, og gerir það að stærsta manntjóni í skipsskaða í mannkynssögunni.

Það má geta þess að amma konu minnar átti miða með þessari ferð, ásamt barni sínu ungu. Hún hafði farið að kveðja mann sinn sem var í þýska flotanum í það sem hún taldi vera í síðasta sinn.

Örlögin tóku í taumana, - mannþröngin var svo mikil að hún komst ekki um borð. Bæði voru svo tekin af Rússum, hún sett í búðir, og hann hafður með hermönnum á aflokuðu svæði.

Henni var seinna sleppt, en sá gamli var búinn að plata sig í gegn í Vesturátt.

Bæði eru á lífi í hárri elli.

[Ómar Ragnarsson, 16.1.2012 kl. 21:18]

Takk, Haukur, ég var reyndar búinn að skoða þetta einstæða myndskeið.