Var ekki víti.

Norski leikmaðurinn Bjarte Myrhol sneri baki í markið þau sekúndubrot sem skipta máli varðandi hið umdeilda atvik í lok leiks Íslendinga og Norðmanna og komst því aldrei í viðurkennt skotfæri. 

Á því augnabliki sem boltinn er sendur til hans stendur Vignir Svavarsson fyrir aftan hann rétt utan línunnar. 

Myrhol bakkar á Vigni og ryður honum yfir línuna um leið og Vignir fellur á hnén og Norðmaðurinn reynir að skjóta aftur fyrir sig á markið, nokkuð sem Róbert Gunnarsson hefur stundum gert af snilld, en Myrhol tókst ekki. 

Ef eitthvað var hefði frekar átt að dæma ruðning á Myrhol heldur en línu á Vigni. 

Allt gerðist þetta svo hratt að mjög erfitt er að sjá það nákvæmlega upp á sekúndubrot eða sentimetra.

Dómararnir voru í afar erfiðri aðstöðu og brugðust að mínu viti rétt við eftir því sem ég fæ best séð eftir að hafa nú um miðnæturskeið, spilað myndskeiðið sem sýnir þetta margsinnis.

 

P. S. Nú, á hádegi daginn eftir liggur fyrir einróma álit kunnáttumanna um að dómararnir gerðu ekkert rangt. 

Norski þulurinn missti sig

Athugasemdir

[Sigurður Þorsteinsson, 19.1.2012 kl. 07:00]

Ómar í svona lýsingum er þetta oft spurning um valskynjun. Við sjáum það sem við viljum sjá. Líka við og Norðmenn. Þjálfaði einu sinni markmann. Hjá honum var aldrei mark, aldrei, nema boltinn væri kominn meira en einn meter inn fyrir línuna, og hann trúði því alltaf sjálfur.

En þessu  tilfelli, þá er ég alveg sammála þér. 

[Ómar Ragnarsson, 19.1.2012 kl. 12:25]

Í dag, hálfum sólarhring síðar, liggur fyrir að kunnáttumenn eru sammála um það að dómararnir gerðu engin mistök.

[Guðni Karl Harðarson, 19.1.2012 kl. 17:24]

Búinn að skoða þetta aftur og aftur. Það var greinilega snerting rétt sekúndubroti áður en að Norðmaðurinn fékk boltann. En honum var sleppt áður en hann skaut. Fékk því algjörlega frítt skot og ótruflaður við það.