Ekkert "sláandi" út af fyrir sig við síðustu kvöldmáltíðina.

Hótelgestur er í einrúmi í hótelherbergi sínu síðla dags og er að byrja á léttum málsverði.

Herbergisþerna er búin að taka til í herberginu fyrr um daginn og á þessum tíma dags er því ekkert óeðlilegt við það að eitthvað af munum, sem hótelgesturinn hefur undir höndum, sé á borðum, rúmum eða stólum, einkum þegar hótelgesturinn er einn síns liðs.

Hótelgesturinn er í miðjum málsverði en ákveður að gera hlé á honum og koma aftur til baka eftir skamma stund og klára hann.

Á borðinu er hálfkláruð máltið, bjórdós og flaska af léttu víni, sjón sem enginn myndi telja óeðlilega miðað við tímasetninguna og nokkuð, sem flestir kannast við.

Hótelgesturinn verður bráðkvaddur og kemur ekki til baka.

Sýnin sem blasir við er ekkert óeðlileg miðað við aðstæður og því ekkert sem er "sláandi" á ljósmyndum af borðunum, miðað við þá tímasetningu að hótelgesturinn hefur staðið upp frá miðju borðhaldi og ætlaði að koma aftur eftir smástund.

Eru hótelherbergi yfirleitt nýtiltekin síðla dags? Er yfirleitt búið að taka til á borðum og vaska upp í miðri máltíð? Come on, það væri óvenjulegt ef svo væri.

Það eina sem gerir þessa sýn og ljósmyndir af henni, sem smyglað hefur verið út af herberginu og gefið þeim, sem hafði þær undir höndum, gott tækifæri til að græða vel á harmleiknum, sem átti sér stað, sláandi, kemur því sem er á borðum út af fyrir sig ekkert við.

Athæfi handhafa ljósmyndanna finnst mér meira sláandi og tákn um okkar tíma en það hvort það var ein bjórdós og ein léttvínsflaska á borðum hinnar látnu söngstjörnu eða að einn kalkún biði efir því að vera snæddur.

Sá sem hafði yfir þessum ljósmyndum að ráða vissi að fjölmiðlar um allan heim myndu keppast um að kaupa þær dýru verði.

Hitt er líka víst að Whitney Houston keypti það dýru verði að hafa ekki fjarlægt bjórdósina og léttvínsflöskuna af borðinu í miðri máltíð, svo að það yrði ekki hægt að velta sér upp úr því, sem blasti við þeim sem komu á vettvang hennar hinstu stundar og var út af fyrir sig ekkert afbrigðilegt.    

Það er hins vegar allt annar handleggur og stærra mál ef Houston hefur látist eftir að hafa tekið inn lyf og drukkið of mikið vín á undan málverðinum og veiklað sig með með langvarandi og hættulega óhollu líferni fíkniefnaneytandans.

En þetta er nú veruleiki samtíma okkar og verður hins vegar að horfast í augu við það að andlát Elvis Presley, Marylin Monroe, Michael Jackson og fleiri stórstjarna verður fyrr eða síðar efni í kvikmyndir eða ítarlega umfjallanir fjölmiðla.

Sviðsetning síðustu stundar Whitney Houston mun í slíkri kvikmynd meðal annars samanstanda af því að raða því rétt á borð sem hún var með. Kannski er eigandi ljósmyndanna búinn að gera ráðstafanir til að geta grætt aukalega á því.

Svona er það, hefur verið og verður þegar frægt fólk á í hlut.

 

 

Sláandi myndir af hótelherbergi Whitney Houston

Athugasemdir

[Kjartan (IP-tala skráð) 14.2.2012 kl. 08:39]

Sorpblaðamennska á lægsta plani, ef eitthvað er sláandi við þessa frétt þá er það að hún skuli hafa verið birt. Mogganum til minnkunnar og Mörtu maríu til háðungar og skammar.

[Hrúturinn (IP-tala skráð) 14.2.2012 kl. 09:45]

 Það versta er að það er verið sífellt verið að reyna að sýna ímyndaðan óhroða til að selja. Mikið á meðan ekki er einhverju "fótósjoppað" inn á myndirnar! Hvað skyldi finnast hjá okkur þegar við deyjum? Kannski eitthvað meira krassandi en samloka og bjórdós?

[Jón Logi (IP-tala skráð) 14.2.2012 kl. 11:11]

Ómar, þú minnist á Monroe & Jackson. Bætum við Morrison og Joplin, og svo hinu nýskeða, - Winehouse!

(Reyndar er nafnið afar kaldhæðnisleg gráglettni örlaganna)

[Gunnar Th. Gunnarsson, 14.2.2012 kl. 11:26]

sammála Ómar. Ömurleg blaðamennska