Brandarinn "hagræn sjálfbærni til lengri tíma litið."

Sérkennilegt er að 20 árum eftir að Íslendingar undirrituðu skuldbindingu sína í alþjóðasáttmála á ráðstefnu í Ríó de Janero um að hafa sjálfbæra þróun að leiðarljósi í nýtingu auðlinda skuli vera rekin hér orkunýtingarstefna varðandi jarðvarma og um vatnsföll sem gerir þessa undirritun marklausa og gerir sömuleiðis marklausa þá setningu í skýrslu um heildstæða orkustefnu Íslands sem kveður á um að orkunýting skuli fela í sér "hagræna sjálfbærni til lengri tíma litið."

Orðalagið "til lengri tíma litið" sem viðbót við orðið "sjálfbærni" ber vitni um þá skammsýni, sem er landlæg hjá okkur þegar við látum það nægja sem sjálfbærni að auðlindin endist í nokkur ár eða í mesta lagi nokkra áratugi.

Þannig virkjum við hiklaust jarðvarma ef talið er fullnægt því skilyrði að orkan endist í 50 ár og ypptum öxlum þótt vísindamenn greini á um hvort sumir þessara kosti endist jafnvel enn skemmri tíma.

Alþjóðlega skilgreiningin á hugtakinu "sjálfbær þróun" felur í sér kynslóðir framtíðarinnar verði ekki fyrir barðinu á rányrkju, en með 50 ára endingartíma eða styttri eru það í mesta lagi tvær kynslóðir sem njóta munu jarðvarmans á Reykjanesskaganum, okkar kynslóð og sú næsta.

Nesjavallavirkjun og Svartsengisvirkjun hafa verið í notkun í áratug þannig að barnabörn mín verða að meðaltali um fertugt þegar þau verða að verða því viðbúin að þessi virkjanasvæði verði ónýt og eftir það víðbúin því að standa uppi á Hellisheiði eða á Suðurnesjum og spyrja: Hvar eigum við nú að fá þau 8-900 megavött sem nú hefur verið sóað?  Með hverju eigum við nú að hita upp húsin okkar?

Hugtökin frelsi og jafnrétti eru fótum troðin gagnvart komandi kynslóðum með svona framferði því að við ætlum í græðgi okkar að keyra þessa rányrkjustefnu í botn á kostnað þeirra.  

Nú segja menn kannski að ekki sé hægt að nýta jarðvarma öðruvísi. En ég hef áður rakið það hér á blogginu að samkvæmt þeim rannsóknum íslenskra vísindamanna, sem fyrir liggja, er hægt að nýta jarðvarmann þannig að hann endist á sjálfbæran hátt með því að fara um það bil þrisvar sinnum vægara í sakirnar en nú er.  

En það má ekki heyra nefnt. Margt af því fólki sem flaggar orðunum "sjálfbærni til lengri tíma litið" samþykkir eða stendur að stefnu sem byggir á því að ráðstafa orku Reykjanesskagans þannig að "hagræn sjálfbærni til lengri tíma litið" er í besta falli brandari, - brandari sem á eftir að verða afkomendum okkar dýrkeypt.

Orðið "hagræn..." er síðan notað til að undanskilja mikið af þeirri óafturkræfu eyðileggngu náttúruverðmæta sem felst í því að ryðjast um hraun og jarðhitasvæði.

En slíkt framferði er líka í andstöðu við hugtakið "sjálfbær þróun."

Auðlindir eign þjóðarinnar

Athugasemdir

[Úrsúla Jünemann, 14.2.2012 kl. 22:18]

Sjálfbærni er líklega það hugtak sem mest misnotað og mest misskilið.

[Haraldur Haraldsson, 14.2.2012 kl. 22:29]

Hvað verður þá Ómar minn um hitaveitu Rvíkur og nágreni,ef hún er ekki sjalfbær?????

[Ómar Ragnarsson, 14.2.2012 kl. 23:47]

Þá verður kannski vaðið í Kerlingarfjöll eða á Torfajökulssvæðið eftir heitu vatni þótt varmatapið verði miklu meira. Ef það verður þá ekki þegar búið að virkja þessi svæði eða taka þau frá til þess að geta haldið stóriðjnni áfram gangandi.

Því að með því að keyra stóriðjuna í botn er nefnilega verið að leggja allt undir, líka það sem menn vildu kannski núna þyrma.