Að pissa í skóinn sinn.

Það þarf mikið til að Ferðafélag Íslands fari að skipta sér af virkjunum. En nú getur félagið ekki orða bundist varðandi svonefnda Hagavatnsvirkjun og er það að vonum.

Helstu rökin til að að fara í stórfellda röskun á þessu svæði eru þau að með því verði sökkt svæði sem valdi sandstormum, sem stundum kaffæri allt Suðurlandsundirlendið.

Ég spurði landgræðslustjóra fyrir mörgum árum hvers vegna ekki væri að hægt að græða aurana upp sem leirinn blési úr í norðan roki.

Hann svaraði því til að leirinn þarna væri þess eðlis að það þrifist ekki neitt líf í honum.

Ég fluttti á sínum tíma af því fjálglegar fréttir þegar farið var í það að stækka Sandvatn sem er vestar til þess að stöðva leirfok þaðan.

Nú sést glögglega að vatnið er á leið að fyllast af auri sem berst í það. Kominn er myndarleg aurkeila út í það að vestanverðu sem stækkar með hverju árinu.

Það er ekki spurning um hvort heldur hvenær vatnið verður fullt af auri og þá verður megin árangurinn af þessari framkvæmd sá, að leirurnar hafa stækkað og margfaldast frá því sem var áður en vatnið var stækkað.

Aðgerðin var sem sagt hliðstæð því þegar menn pissa í skóinn sinn í frosti til að halda á sér hita.

Sama mun gerast ef Hagavatn verður stækkað.  Aurfokið mun hverfa um sinn en á endanum munu börnin okkar og barnabörn taka við svæðinu eftir að aurburður í það hefur fyllt það svo að leirurnar, sem fýkur úr, verða margfalt stærri en nú er.

Í ofanálag mun þessi aurburður fylla þetta miðlunarlón upp svo að virkjunin verður ónýt.

 

Mótmæla virkjun við Hagavatn

Athugasemdir

[eir@si, 15.2.2012 kl. 00:17]

Þó ég hafi ekki kynnt mér þennan virkjanakost þá myndi ég halda ef eitthvert vit væri í að halda fram heftingu sandfoks með þessari virkjun að Hagavatn með væntanlega hækkuðu vatnsborði væri ekki miðlunarlón heldur einungis inntakslón með fasta vatnshæð og þá myndi það ekki hafa bein áhrif á virkjunina þegar það fylltist af auri.

Ef Hagavatn er hins vegar hugsað sem miðlunarlón, þá verður vatnsborðið breytilegt sem þýðir aö öllu jöfnu aukið sandfok þegar lítið er í lóninu.

[Ómar Ragnarsson, 15.2.2012 kl. 00:44]

Lónið fyllist samt upp af auri, þótt vatnshæðin sé stöðug. Hér gildir nefnilega öfugt lögmál við "eyðist það sem af er tekið", þ. e. "fyllist það sem hellt er í."

Vegna þess að straumurinn er enginn í vatninu sekkur aurinn til botns og fyllir að lokum "ílátið".

[Jón Logi (IP-tala skráð) 15.2.2012 kl. 08:45]

Bær er nefndur Reyðarvatn á Rangárvöllum. Reyður er bleikja, og vatn er vatn.

En þar er ekkert vatn. Það hvarf í sandstormi seint á 19. öld. Þar er annað hvort tún eða bara sandur í dag.

[Úrsúla Jünemann, 15.2.2012 kl. 09:44]

Þetta er enn eitt grátlegt dæmi um skyndilausn sem ber ekki árangur til langs tíma heldur gerir ástandið verra seinna.