Bora meira að segja göt á bensíngeyma !

Bensínþjófnaðir verða æ algengari eftir því sem bensínið verður dýrara. Sjálfur hef ég orðið fyrir þremur tegundum af slíkum þjófnuðum á aðeins einum bíl, þeim sem stolið var í heilu lagi um jólin.

Áður en bílnum var þá stolið þar sem hann stóð á bílasölu hafði ytra bensínlokið verið brotið og hinu lokinu stolið auk þess sem bensíni var stolið þá leiðina af bílnum.

Ég ákvað þá að hafa lítið bensín á bílnum þótt vitað sé að það sé ekki gott að hafa það þannig að staðaldri..

Ég hreyfði þennan bíl reglulega til að halda honum við en undraðist hvað hann eyddi miklu bensínu.

Bíllinn fannst aftur lemstraður eftir stuldinn um jólin, búið að saga af honum stigbretti og taka af honum stór dekk og felgur, þurrkurnar, útvarpið og númerin.

Númerunum er stolið til þess að nota þau á aðra bíla sem er ekið inn á bensínstöðvar sem ekki hafa kortasala, geymirinn fylltur og brunað í burtu á röngum númerum sem torvelda það að finna þjófana.

Fyrir nokkrum dögum stóð til að nota bílinn yfir helgi og fylla hann af bensínu en allt frá því um jólin hafði ég undrast hvað bíllinn eyddi mikilu. Brá þá svo við að bensínið fossaði jafnharðan af bílnum.

Kom í ljós að borað hafði verið stórt gat ofarlega á bensíngeyminn til þess að geta stolið bensíni af honum með hraði og tæmt geyminn gersamlega !

Það er hættulegt að bora gat á bensíngeymi með borvél, - einn neisti nægir til að valda sprengingu.

En samt var þetta gert !  

Stálu bensíni af bílum

Athugasemdir

[Jón Logi (IP-tala skráð) 29.2.2012 kl. 11:32]

Fyrir nokkru voru olíuþjófnaðir á sveitabæjum nokkuð algengir. Þar sem ég bý var þá ekki búið nálægt útihúsum, og endaði það með því að ekki var höfð olía þar lengur, - það þýddi ekkert.

Bóndi nokkur hafði sinn tank niður við þjóðveg, - hann bjó nokkur hundruð metrum ofar. Oft var tæmt hjá honum, en einn góðan dag var mælirinn fullur. Hann setti slurk á tankinn og slípimassa saman við.

Nokkrum dögum síðar var kyrrstæður jeppi og yfirgefinn í vegkanti, svolítinn spotta frá afleggjaranum. Dýr jeppi, og að því er mér skilst, - úrbræddur :D

[Þorvaldur S (IP-tala skráð) 29.2.2012 kl. 14:15]

Sagan er góð; en getur ekki staðist; úrbræddur getur hann ekki verið vegna þess að dísilolía kemur hvergi nálægt legunum í mótornum.  Hins vegar er líklegt að olíuverkið í bílnum gæti verið illa farið.

[Jón Logi (IP-tala skráð) 29.2.2012 kl. 20:55]

Það er náttúrulega rétt. Ógeðið kemst hins vegar inn í sprengirými og spurning hvort það veldur tregðu á stimplum sem, svo pína stangir og sveifarás. og beygja kannski eitthvað, - líkt og vatn getur gert.

Annars er ekkert grín að eiga við olíuverk sem er í kássu.

Sagan er annars frá 9. áratugnum.