Umskipti frá þurrkunum í fyrra.

Í fyrra var vatnsstaðan í Rauðavatni einhver hin lægsta í manna minnum. Síðustu tvö sumur hefur Kaldá við Kaldársel verið þurr.

Hin raunverulega Kaldá sem rennur undir hrauninu út í Straumsvík er hins vegar langstærsta ferskvatnsá Reykjanesskagans og þornar aldrei. En afl hennar er það mikið að forðum gátu sjómenn ausið vatni upp í fötur úr sjónum í báta sína við Straum og Straumsvík án þess að fara í land.

Kaldá sú sem rennur á yfirborðinu má hins vegar muna sinn fífil fegri frá þeim árum sem ég var þar þrjú sumur í sumarbúðum KFUM.

Eitt af helstu verkefnum félagsins Hraunavinir í Hafnarfirði og Garðabæ ætti að vera að fá því til leiðar komið að komist verði frá ofnýtingu vatnsins við Kaldárhöfða því að Kaldá er einstök og sjaldgæf perla.

Hvað hefur það bjargað mér þegar erlendir gestir, fjölmiðla- og kvikmyndagerðamenn, hafa í tímahraki spurt mig hvort ég geti bjargað þeim um gott myndefni eða bakgrunn við viðtal á innan við hálftíma, að geta skutlast aðeins 6 kílómetra leið frá Hafnarfirði suður að Kaldá.

Útsýnið til suðvestur yfir ána rétt austan við Kaldársel hrífur þetta fólk.

En síðustu sumur hefur þetta verið ómögulegt þegar árfarvegurinn hefur verið þurr.  

Rauðavatn flæðir yfir bakka sína