Bara græða, - engu kosta til.

Kurt Sperling, sem kom hingað til lands og varð undrandi á því að ferðamenn "væru út um allt" sá aðeins yfirborðið á ísjakanum. Hann sá ekki þá ótal staði á Íslandi þar sem enga ferðamenn er að sjá við staði sem gefa Gullfossi og Geysi ekkert eftir.

Hann sá engan við stórfossana þrjá í efri hluta Þjórsár, sem gefa Gullfossi ekkert eftir. Auðvitað ekki, það er kyrfilega fyrir því séð með því að þegja um þessa fossa og hafa svo afar óaðgengilega, að þangað komi helst enginn, en það leiðir af sér að þá er hægt að þurrka þá upp með virkjuninni Norðlingaölduveitu án þess að fólk sakni þeirra.

Hann sá enga við Hundafoss og nokkra aðra afar fallega fossa í Skaftá, af því að þeirra er hvergi getið, ekki einu sinni í skýrslu um mat á umhverfisáhrifum Búlandsvirkjunar sem mun þurrka þá upp.

Hann sá enga ferðamenn við hina einstæðu gígaröð Eldvörp, skammt frá Keflavíkurflugvelli, sem er með marga markverða staði rétt hjá, af því að Íslendingar sjálfir þekkja svæðið ekki nema þá aðeins sem fyrirhugað virkjanasvæði.

Hann sá enga ferðamenn vera að skoða Sogin, svo litfagurt gil í 10 mínútna akstursfjarlægð frá Reykjanesbraut, að fara þarf austur í Landmannalaugar til að sjá viðlíka fegurð. Af hverju?  Af því að komin er af stað umbylting svæðisins í virkjanasvæði og það er það eina sem menn hafa áhuga á. 

Svona er hægt að fara í kringum landið til sjá hvernig öllum ferðamönnunum er hrúgað á tiltölulega fáa staði og í stað þess að standa almennilega að því að stýra umferð þeirra á þessum svæðum, eins og sjá má dæmi um að gert er víða erlendis, tíma menn því ekki og mega ekki heyra nefnt að ferðafólkið borgi fyrir aðgang eins og tíðkast alls staðar á sambærilegum stöðum erlendis.

Þar má sjá viðkvæm svæði sem eru vel vernduð og eru þó með miklu meiri umferð en hinir íslensku.

Nei, nei, bara græða, - engu kosta til.

Á meðan þetta gengur svona hlakkar í virkjanafíklum, af því að þetta hentar þeim prýðilega í þeim áróðri sínum að ferðamenn séu meiri vá fyrir íslenska náttúru en virkjanir og að um að gera sé að virkja allt sundur og saman áður en ferðamennirnir eyðileggi allt.

Og samt halda þeir því fram að virkjanir og ferðamenn fari svo vel saman, að það muni verða mesti akkurinn fyrir stóraukna ferðamennsku að virkja allt sem hægt er að virkja.   

Ferðamenn úti um allt

Athugasemdir

[Jón Logi (IP-tala skráð) 26.3.2012 kl. 14:47]

Það eru nú orðnir nokkrir staðir á landinu sem eru eins og Piccadilly vissan hlut úr ári.

En, - þeir eru bara brotabrot af því sem mögulegt er. Það vantar bara vegatengingar og leggi, og sums staðar ekki mikið.

Kona mín er byrjuð að fara með fólk í gönguferðir hér í Rangárþingi. Þá er keyrt að upphafsstað og genginn hringur eða leggur, - kannski svona 4 tíma dæmi.

Fullt af fossum, giljum, og jarðmyndunum, og alger hending að rekast á nokkra hræðu.

Efri hluti Þjórsár væri rosa magnað dæmi. Og svo má skoða Suðurnesið meira. Og endalaust meira...

[S i g u r ð u r S i g u r ð a r s o n, 26.3.2012 kl. 15:15]

Landamannalaugar og Þórsmörk voru lengi svo til einu staðirnir sem innlendir ferðamenn heimsóttu. Smám saman hefur þetta verið að breytast. Fjöldi góðra ferðaþjónustuaðila fer með útlendinga um staði sem Íslendinga þekkja lítið sem ekkert. Enn er margt að skoða fyrir þá sem hafa áhugi á ferðalögum um landið. Vandinn er hins vegar sá að það þolir takmarkaðann ágang. Einhvern veginn virðast klaufir sauðfjár hafa farið betur með það en skór mannskeppnunnar. Skoðum Þverfellshorn í Esju, Fimmvörðuháls, Hengil og fleiri og fleiri staði. Smávægileg aukning á göngufólki verður hreinlega sjáanleg í gróðri víða um land. Svo er það hinn vandinn að aðrir ferðaþjónustaðilar þekkja ekki landið nógu vel. Hversu margir hafa til dæmis komið upp í Fróðárdal og séð stuðlabergshvelfingarnar og fossana og skoðað gilið fyrir ofan sem mosinn hefur nær vaxið yfir? Hversu margir hafa séð Vatnsdal sunnan Vatnajökuls, skoðað nyrstu byggð í Strandasýslu, séð Kolugil, Bláhvamm við Mývatn og svo framvegis. Stundum þarf hreinlega ekki að fara upp á hálendi landsins, fjölmargt á láglendi og við strendur heilla útlenda ferðamenn, það þekki ég að eigin raun. Kannski á maður bara að vera á kafi í ferðaþjónustunni og fara með útlendinga á staði sem fæstir þekkja. Á móti kemur að fólk vill endilega sjá það sem stóru aðilarnir auglýsa úti í heimi.

[Ari (IP-tala skráð) 26.3.2012 kl. 19:22]

Þessi Kurt hefur ekki hugsað mikið. Það er staðreynd að fólki er beint á ákveðna staði og að ákv. staðir eru þekktari en aðrir og þar flykkist fólkið  Það hentar mér reyndar ágætlega að túrhestunum skuli vera beint í á Þingvelli, Gullfossi og Geysi, þá heimsæki ég þá staði bara utan túristatímans og þá eru færri á öðrum stöðum sem ég get hugsað mér að skoða. (þetta er t.d. ekkert svo sem ólíkt öðrum löndum og svæðum og borgum, fólki er kynnt ákv. staðir, ef við tökum eitthvað svæði, segjum bara feneyjar, markúsartorgið þar, rialto brúin og aðalgöngugatan í feneyjum, utan þess svæðis fækkar fólki og enn lengra er enn færra fólk, þetta er sama prinsippið og skrýtið að þessi Kurt hafi ekki fattað samþjöppunina/túrista"áveiturnar").  p.s. Það er algert djók að einhver túristi þykist hafa séð það helsta á Íslandi ef það hefur skoðað þessa 3 staði + bláa lónið, því það eru virkilega túristar sem halda þetta.