Svipuð Heklu? 10 mín.flug frá Sauðárflugvelli.

Þrátt fyrir mjög miklar og nákvæmar mælingar með fullkomnustu nútímatækni í kringum Heklu,, fyrir, eftir og meðan á síðustu gosum hefur staðið,  verður fólk að sætta sig við það að vísindamenn geti aðeins  gefið aðvörun hálftíma fyrir gos. 

Hekla gæti þess vegna verið byrjuð að gjósa hálftíma eftir að þetta er skrifað. 

Engar GPS mælingar eða sambærilegt var hægt að nota við Öskjugosið 1961 og þess vegna vita menn áreiðanlega frekar lítið um það hvaða aðvörun, ef nokkra, verður að fá áður en gos byrjar á því svæði. 

Á efstu myndinni er horft yfir Öskjuvatn og í baksýn sést svæði þar sem skjálftar hafa verið síðustu misserin, norður í Herðubreið og Herðubreiðartögl, hægra megin við hana á myndinni.

Á næstu mynd er horft yfir Víti og Öskjuvatn fjær. Víti var sjóðandi heitt eftir gosið 1875 en hefur farið hægt kólnandi eftir það. Það verður fróðlegt að sjá, hvort það hafi hitnað eitthvað eins og vatnið. 

Skyndilegur vöxtur skjálftavirkni á þessum slóðum 2007 varð mér hvatning við það að fullgera og fá Sauðárflugvöll skráðan sem fullgildan og viðurkenndan fjögurra flugbrauta flugvöll hjá Flugmálastjórn, færan fyrir Fokker 50 og Dash 8, en Flugfélag Íslands og Landhelgisgæslan eiga slíkar vélar. 

Síðan þá hefur eitthvað óvenjulegt verið að gerast neðanjarðar á svæði, sem er aðeins í tíu mínútna flugfjarlægð frá vellinum.

Kvika hefur stigið þar upp frá meira en 10 km dýpi upp í aðeins rúmlega 2ja km dýpi. 

Að vísu er flugbraut í Herðubreiðarlindum, en hún er aðeins ein, mun styttri en tvær lengstu brautirnar á Sauðárflugvelli, og þegar vindur stendur af Herðubreið er brautin við Herðubreiðarlindir ófær vegna misvindis og sviptivinda. 

Sauðárflugvöllur er hins vegar þannig í sveit settur, að ef dreginn er hringur um stærstu fjöll norðausturhálendisins, Kverkfjöll, Öskju, Herðubreið og Snæfell, lendir flugvöllurinn inni í miðjunni, það langt frá þessum fjöllum, að þar er aldrei misvindi og alltaf hægt að lenda upp í vindinn, hver sem hann er, úr því að völ er á fjórum flugbrautum.  Hef raunar í huga að bæta þeirri fimmtu í sumar, - ekkert mál, bara merkja og valta.

100 kílómetra leið er frá malbikuðum hringveginum á Mývatnsöræfum inn í Öskju, en um 90 km leið í Öskju frá endanum á malbikaða veginum við Kárahnjúka. 

Næstneðsta myndin er tekin úr vestri og sést yfir Kollóttudyngju, Herðubreið og Herðubreiðartögl með Snæfell í fjarska. Krepputunga gengur inn í landið handan við Herðubreiðartögl.

 

Það má ekki gleyma því að síðustu fimm ár hefur verið sífelld skjálftavirkni á þessu svæði og aðeins sunnar í Krepputungu og þar eru eldfjöll, sem gusu undir jökli. Gos á þeim slóðum getur stíflað Jökulsá á Fjöllum og valdið flóðahættu við Herðubreiðarlindir.

Sauðárflugvöllur er hins vegar utar þessa hættusvæðis þótt ekki séu nema um 15 kílómetra akstur frá honum að Álftadalsdyngju, þar sem skalf talsvert á tímabili. 

Ef ég mætti velja gosstað og tegund goss á þessu svæði myndi ég velja dyngjugos í Álftanesdyngju, hægt og samfellt gos sem gæti enst sem túristagos í jafnvel einhver ár og byggt upp svipaða dyngju og Kollóttadyngja er. 

Slíkt gos yrði mun hættuminna og myndi valda minni röskun en á flestum öðrum stöðum á þessu svæði. 

Fyrir kunnugan og við hagstæðar aðstæður er hægt að lenda flugvél á svonefndum Vikrum við Dyngjuvatn, aðeins um 7 km fyrir sunnan skálann í Drekagili, og einnig á Dyngjusandi nokkrum kílómetrum þar fyrir sunnan.

Alls staðar á norðausturhálendinu er að finna góða útsýnisstaði. Á neðstu myndinni er staðið á enda NNV-SSA-flugbrautar Sauðárflugvallar og horft í áttina til Brúarjökuls og Kverkfjalla með kvíslar Sauðárí forgrunni. 

Allra neðsta myndin datt þarna óvart inn og á ekki að vera þarna, en ég kann ekki tökin á að fjarlægja hana.

 

P. S. Það er orðinn fastur liður þegar minnst er á flugbrautir á hálendinu að hneykslast sé yfir þeim í athugasemdum  og ekki klikkaði það heldur í kvöld.

Er eina ferðinna enn býsnast yfir einum af þeim sjö lendingarstöðum, sem skráðir eru á hálendinu, en 24 þúsund kílómetrar af vegarslóðum eru í náðinni.

Í tengslum við svar mitt í athugasemd ætla ég að birta hér nokkrar myndir af flugbrautinni í Veiðivötnum sem dæmi, en vegarslóði liggur meðfram henni.

Flugbrautin er vinstra megin, merkt með höttum, sem hægt er að rífa upp og fjarlægja, en hægra megin er niðurgrafinn vegarslóðinn. 

Flestir slóðarnir á þessu svæði, hafa grafist niður allt að hálfan metra vegna þess að bílarnir aka aftur og aftur í sömu förin. 

Þessi slóði er um 40 sm djúpur. 

Á 30 metra breiðri flugbraut lendir hins vegar aldrei nein flugvél í sömu förum og hinar. 

Næsta mynd er af höttum sem afmarka brautina. Og spurningin er: Hvorum megin við hattana er brautin?

Þriðja myndin er af fllugvélinni, sem ég var á, og nú er spurningin: Er flugvélin innan eða utan brautarinnar? 

Eins og sést, þarf ekki annað en að losa merkingarhattana og fjarlægja þá og hætta að valta brautina til þess að enginn sjái árið eftir að þar hafi nokkru sinni verið flugbraut, hvað þá hvað var utan brautar og hvað var innan hennar. 

Ef hins vegar ætti að jafna yfir vegarslóðana á svæðinu, sem víða skerast niður úr viðkvæmum gróðri, þyrfti stórfelldar framkvæmdir með vinnuvélum til þess,  og mikla og erfiða uppgræðslu sums staðar.

Vegna þess að menn geta ekki eða vilja ekki skilja muninn á vegarslóðum og völtuðum og merktum flugbrautum, sem eru eftir allt aðeins að finna á sjö stöðum á hálendinu, ætti þessar myndir kannski að útskýra eitthvað. 

Til dæmis það, að þegar ég kem í júní næstkomandi að Sauðárflugvelli, verður frostlyfting vetrarins búin að sjá til þess að ég sé alls engan mun á flugbrautunum og umhverfi þeirra. 

Sá munur sést ekki fyrr en völlurinn hefur verið valtaður og hverfur síðan aftur næsta vetur. 

Gosi spáð í Öskju árið 2010

Athugasemdir

[Gunnar Th. Gunnarsson, 6.4.2012 kl. 22:37]

Það er skelfilegt að sjá þessi strik í annars ósnortinni náttúrunni sem sjá má á þessum myndum

[Bjarki Sigurgeirsson (IP-tala skráð) 6.4.2012 kl. 23:10]

Reykjavík er líka skelfilegt lýti á náttúrunni ef út í það er farið Gunnar. Það eru merki um mannabyggð á þessari eyju, verðum að sætta okkur við það.

[Ómar Ragnarsson, 6.4.2012 kl. 23:17]

Já, hrikalegt! Og ennþá hrikalegra verður það þegar ég kem þarna í fyrsta skiptið í júní næstkomandi og sé ekki lengur flugvöllinn af því að frostlyftingin verður búin að afmá allan mismun á brautunum og svæðinu í kringum um þau! 

Og enn svakalegra er að gefa einu sinni enn skýrslu um málið hér á þessari síðu, því menn þreytast ekki á því að hneykslast aftur og aftur á þessu sama og það er eins og að klappa í stein að reyna að svara því.

Á hálendinu eru nú sjö skráðir flugvellir með alls um 8 kílómetra löngum flugbrautum. Það er alveg hræðilegt! 

Á sama svæði er talið að séu 24 þúsund kílómetrar af vegaslóðum. Vegaslóðarnir eru 3 þúsund sinnum lengri en flugbrautirnar. Það er í fínu lagi! 

Langflestir vegaslóðarnir grafast niður þegar ekið er í sömu förunum aftur og aftur.

Eitt besta dæmið er vegarslóðinn sem liggur við hliðina á flugbrautinni í Veiðivötnum.

Hann er sokkinn næstum hálfan metra niður í jörðina og þyrfti miklar jarðýtuframkvæmdir til að jafna það út. Þetta er hið besta mál!

Við hliðina er flugbrautin sem er þannig, að hún hefur ekki grafist niður um sentimetra í gegnum árin hvar sem á hana er litið. Af hverju ekki?  Af því að engar tvær flugvélar lenda á sama stað á 30 metra breiðri brautinni. Það ár sem hún er ekki völtuð er hún gersamlega horfin! Hræðilegt að horfa upp á þetta !   

Ein flugbraut á hálendinu er á Auðkúluheiði. Var á skrá hjá Flugmálastjórn en er það ekki lengur. Er þarna hins vegar enn og þarf stórvirk tæki til að jafna hana út, því að henni var upphaflega ýtt upp með vinnuvélum og síðan malbikað eftir miðju hennar endilangri. 

Þetta er að auðvita eini flugvöllurinn sem ætti rétt á sér á hálendinu og furðulegt að hann skuli ekki vera á skrá. Af hverju er þetta eina flugbrautin sem á rétt á sér á hálendinu?  Að sjálfsögðu af því að Landsvirkjun gerði hana í tengslum við Blönduvirkjun !

Við Sauðafell þar sem ekið er inn slóðann að Snæfellsskála var flugbraut á sléttum mel. 

Hræðilegt! 

Síðan komu stórvirkar vinnuvélar og afmáðu þessa forsmán og hafa nú skilið eftir breytt landslag með hólum og mishæðum í stað þess að standa við skilyrði, sem sett voru um það að skila landinu í sama horfi og það var. 

En það gerir ekkert til. Ef landið hefði verið skilið eftir í sama horfi og það var hefði sléttur melurinn verið hið versta mál af því að flugvélar gátu lent á honum og það varð að koma í veg fyrir slíka ósvinnu.

Þess vegnar er það hið besta mál að búið sé að umturna þessu landi. Af hverju?  Af því að það var gert fyrir Landsvirkjun ! 

[Sigurður Kristján Hjaltested (IP-tala skráð) 6.4.2012 kl. 23:38]

Góður Ómar..

Kveðja

[Halldór Ingvason (IP-tala skráð) 7.4.2012 kl. 01:07]

Ég ók um þennan flugvöll í fyrrahaustí leit að hreindýrum og satt best að segja var hann skemmtileg tilbreyting frá endalausum söndunum sem þarna eru.....en annað...þarna er gríðarlega fallegt landsvæði en flugvöllurinn er þannig staðsettur að þú sérð hann ekki fyrr en þú ert nánast kominn á hann, hann er í dálítilli lægð í landslaginu og það sjást ekki þessi "strik" nema úr lofti, á jörðu niðri sérðu bara hattana, Econoline-inn og súkkuna sem er lagt upp í brekku svo það sé hægt að láta hana renna í gang:)

[Nonni (IP-tala skráð) 7.4.2012 kl. 01:41]

Gunnar Th. vill mikið frekar hafa óafmáanlegar stíflur og lón sem sjást úr geimnum en svona flugbrautir sem hverfa ár hvert af náttúrunnar hendi!

[Markús Auðunn Viðarsson (IP-tala skráð) 7.4.2012 kl. 03:27]

Sæll Ómar.

Flott svar hjá þér. Það er alveg ótrúlegt að fólk skuli gera svakaleg mál úr smámálum eins og þessu þegar það er ekki búið að skoða heildarmyndina eins og með hálendisvegi landsinns og fleirra. Í samanburði eru þessar flugbrautir frímerki miðað við veginna á hálendinu.

Ég er náttúru unnandi og hefur þú verið sá sem ég lít upp til með það að gera.

Halltu áfram með gott verk Ómar.

[Gunnar Th. Gunnarsson, 7.4.2012 kl. 11:42]

Þetta var nú kaldhæðni hjá mér, því samkvæmt öfga náttúruverndarsinnum, þá eru öll ummerki mannsins í náttúrunni eins og glæpur. Ég er ekki þeirrar skoðunnar og tek undir athugasemd Bjarka #2.

En svar Ómars er hins vegar afar lélegt, þó jábræður hans haldi ekki vatni yfir því. Á veturna sést auðvitað ekkert vegna snjóa og fáir sem engir á ferli þarna. Á vorin er ófært inn á svæðið vegna aurbleytu. En um leið og snjóa leysir og frost fer úr jörðu, mætir Ómar með valtarann sinn.

[Nonni (IP-tala skráð) 7.4.2012 kl. 12:45]

Hvað gerist svo þegar Ómar er allur? Tekur þá einhver annar við með valtarann eða verður þetta einfaldlega í minningunni?

En stíflan við Kárahnúka og lónið, þau eru ævarandi lýti á landslaginu og sökktu einstökum náttúruminjum og gríðarlega fallegu landslagi. Það verður aldrei tekið til baka. Því miður.

Ég gekk í marga daga um þetta fallega svæði og skoðaði vel. Nú er þar bara risastór drullupollur sem engin leið er að losna við. Því miður.

[Ómar Ragnarsson, 7.4.2012 kl. 13:14]

Maður eins og ég, sem hef samþykkt 25 stærri virkjanir á Íslandi, getur varla verið "öfganáttúruverndarsinni!. Eða er það, Gunnar?

Ég "mæti ekkert með valtarann". Hann og gamli Econoline húsbíllinn eru þarna allt árið.

Frá vellinum að Hálslóni, mesta umhverfishervirki allra tíma á Íslandi, eru fimm kílómetrar og ég er því nágranni þess á sumrin. 

Á þeim tíma, sem ég er að valta og fram eftir júlí er meirihluti lónstæðis Hálslóns þurrar leirur eftir aurburð fyrra árs og í þurrum og björtum veðrum þegar vind hreyfir, er þar varla verandi vegna leirstorma úr lónstæðinu. 

En þessu afneitar Gunnar að sjálfsögðu á sömu forsendum og strúturinn, af því að hann er þarna ekki og þar með er það ekki til sem hann sjálfur sér ekki eða býr ekki við.

[Haukur Kristinsson (IP-tala skráð) 7.4.2012 kl. 13:16]

Þegar Alcan (áður Alusuisse) hætti árið 2006 allri álframleiðslu í Steg í hinum gullfallega alpadal Valais (Wallis) í Sviss, voru mikil hátiðarhöld í öllum sveitum þar.   

[Gunnar Th. Gunnarsson, 7.4.2012 kl. 14:28]

"Einstakar náttúruperlur" er hver þúfa og hver laut, að mati öfgamanna í náttúruvernd. Margir þeirra sem þekkja svæðið best sem fór undir lón, eru ekki sammála um að þarna hafi einhverju einstöku og ómetanlegu verið fórnað. Vissulega fórn þó, en ávinningurinn réttlætir fórnina.

Meira að segja Hjörleifur Guttormsson sagði í grein sem birtist í riti Ferðafélags Íslands, laust eftir 1980, sagði að þetta svæði væri frekar ómerkilegt og mörg önnur í nágrenninu mun áhugaverðari. Seinna breytti þessi tækifærissinni um skoðun og barðist með kjafti og klóm gegn framkvæmdunum. Það gerði hann líka gegn álverinu í Straumsvík á sínum tíma, á þeirri forsendu að um erlendan auðhring væri að ræða og því stórhættulegur gagnvart íslensku samfélagi.

Eins og flestir vita fóstraði A-þýski kommúnistaflokkurinn Hjörleif á námsárum hans.

[Nonni (IP-tala skráð) 7.4.2012 kl. 15:20]

Mér finnst alltaf athyglivert en þó sorglega kómískt þegar menn þurfa að grípa til uppnefna til að reyna að hafa einhverja vikt í máli sínu því rök þeirra þrýtur. „Öfgamenn“, „tækifærissinni“, „ öfga náttúruverndarsinnar“, „jábræður“ ásamt því að brigsla mönnum þess að þeir séu verri eftir því hvar þeir sóttu nám. Ég hef ekki trú á öðru en því að Hjörleifur megi rétt eins og hver annar endurskoða afstöðu sína á því hvað honum þyki ómerkilegt og hvað áhugavert. Kannski skoðaði hann svæðið betur og komst að því að það væri stór-merkilegt eða að aukinn þroski sem fylgdi aldri sagði honum annað? Mátti hann þá ekki skipta um skoðun? Verða menn tækifærissinnar við það að breyta skoðun sinni? hummm...

Fórn þjóðfélagsins sem fylgdi auknu gjaldeyrisflæði, flæði erlends vinnuafls til landsins, skuldsetningu Landsvirkjunar, kostnaður við hvert starf í verksmiðjunum og sú staðreynd að álverið gerði lítið sem ekkert til að stöðva fólksflóttann frá Austurlandi* eru/voru of mikil fórn burtséð frá náttúrufórninni. Það er sér kapituli.

*Það hlýtur að vera fólksflótti ef stöðugt þarf að auglýsa eftir fólki með reglulegu millibili til að vinna í álverinu. Hver ætli starfsmannaveltan sé miðað við Straumsvík og Grundartanga...?

[Þórir Kjartansson, 7.4.2012 kl. 15:54]

Ég myndi alls ekki kalla Ómar ,,öfga umhverfissinna".  Hann veit réttilega að það er allt í lagi að gera flugbraut og keyra á bílum um þá staði þar sem öll ummerki eru horfin eftir einn vetur. En því miður er orðinn til talsverður hópur fólks sem kalla mætti þessu nafni og er á góðri leið með að koma óorði á eðlilega og sjálfsagða umhverfisvernd. Flest á þetta fólk það sammerkt að eiga heima á stór-Reykjavíkursvæðinu og skreytir sig gjarnan með einhverri sérfræðingsnafnbót. Það telur sig vita  allt betur en þeir sem búa nær ósnortinni náttúrunni og þekkja þar af leiðandi miklu betur hennar þolmörk. Það er mikið talað um að helstu ferðamannastaðir okkar séu farnir að láta á sjá undan of miklum ágangi. Ef það er stefnan að loka alltaf stærri og stærri svæðum landsins fyrir öllum, nema þeim örfáu sem nenna og geta lagt á sig margra daga gönguferðir með bakpoka og tjald, þá er það ekki til þess fallið að dreifa álaginu.

[Jón Logi (IP-tala skráð) 7.4.2012 kl. 16:02]

Það er alskelfilegt að slíta mel með flugvéladekkjum af og til ekki satt,hvað þá að dreifa skipulega heilli kerrufylli af höttum til merkingja. Þæð væri kannski í lagi ef það væru vegastikur?

Ég þekki þetta úr graslendi Suðurlands, hvar hann Ómar taxeraði, tók upp og lenti margfalt sumarið í fyrra og hitteðfyrra á við melinn góða. Þetta var nefnilega á spari-túninu mínu. Og niðurstaðan eftir margra mánaða flug var sú, að fyrir þjálfað auga var hægt að sjá að þarnavoru einhver "hjólböruför", en vorin eftir sést ekkert.

Hjólböruförin sú eru velkomin aftur Ómar.  Og vonandi má lenda aftur, - jafnvel, - á melnum Húsadalsmeginn í Þórsmörk.

Duhhh!

[Haukur Kristinsson (IP-tala skráð) 7.4.2012 kl. 16:39]

Sviss er ríkasta land í heimi, með sterkan og stöðugan gjaldmiðil, lítið atvinnuleysi, nær enga verðbólgu og meira en 20% íbúa eru útlendingar. Enginn þungaiðnaður (heavy industry, Schwerindustrie), engar bílaverksmiðjur og enginn "orkufrekur iðnaður". Auðvitað ekki, hver vill orkufrekann iðnað. Einnig kjánalegt orðalag, nær væri að tala um t.d. orkuháðan iðnað. Þjóðgarður Svisslendinga var einn sá fyrsti í Evrópu, stofnaður 1. ágúst 1914. En þar eru strangar reglur í gildi: “In the park, one is not allowed to leave the road, make fire or sleep outside the Chamanna Cluozza: the mountain hut located in the park. It is also forbidden to disturb the animals or the plants, or to take home anything found in the park. Dogs are not allowed, not even on a leash.”

Allir sætta sig við þessar reglur, engin umræða um þær. Stórkostlegt svæði.

[Gunnar Th. Gunnarsson, 7.4.2012 kl. 17:05]

Nonni segir: " ... skuldsetningu Landsvirkjunar, kostnaður við hvert starf í verksmiðjunum og sú staðreynd að álverið gerði lítið sem ekkert til að stöðva fólksflóttann frá Austurlandi* "

Merkilegt að sjá svona fullyrðingar út í loftið, en á þessu virðist andstæðingar framkvæmdanna við Kárahnjúka nærast. Blákaldar staðreyndir skiptir þetta fólk engu máli en við það þurfa þeir sem ekki eru sammála þeim að búa. 

Það er hins vegar rétt að starfsmannaveltu hefur verið meiri en æskilegt er og mun meiri en í Straumsvík. Ástæðan getur hugsanlega legið í vaktakerfinu og verið er að skoða það mál.

[Jón Logi (IP-tala skráð) 7.4.2012 kl. 18:05]

Það má ekki vanmeta fjölda starfsmanna í grunnstörfum sem urðu til við reisingu álversins.

Það má bara ekki heldur vanmeta hvað hvert kostaði, og ber að hugsa út í hvaðan það var tekið....

[Gunnar Th. Gunnarsson, 7.4.2012 kl. 19:13]

Það er einmitt málið, Jón Logi, fjármagnið var ekki tekið frá neinum öðrum verkefnum. Verkefnið fjármagnar sig sjálft og því er út í hött að tala um að hvert starf hafi kostað svo og svo mikið.

[Olgeir Engilbertsson (IP-tala skráð) 7.4.2012 kl. 20:29]

Mér finnst bara í góðu lagi að hafa flugbrautina inn við Veiðivötn og sé ekkert að því að hafa veginn við hliðina þó að hann sé aðeins niðurgrafinn. Það er talsvert vega/slóðakerfi á svæðinu og heyrir til algerra undantekninga að keyrt sé utan vega. Svo eru að vísu gamlar slóðir sem er löngu búið að lokaa víða með vötnunum bæði eftir bíla og hesta . Þarna með vötnunum eru víða mjög þykkar mosabreiður og förin sjást áratugum saman. Á leiðinni inn í Vötn má svo sjá hvað virkjanir Landsvirkjunar fara vel í landslaginu og allur frágangur til fyrirmyndar.

[Anna Sigríður Guðmundsdóttir, 7.4.2012 kl. 20:40]

Ómar. Takk fyrir fræðsluna. Ef einhver hefur vit á flugi, og því sem viðkemur flugi, þá ert það þú. Þú hefur líka heimildir í kollinum um eldgos á Íslandi, sem ekki nokkur starfandi fréttamaður á Íslandi hefur í dag.

Mér finnst sumir snúa staðreyndum á haus, í athugasemdum hér að ofan, en aðrir eru raunveruleika-tengdir í sambandi við það sem þú varst að skrifa um hér. Kárahnjúkavirkjun og allt sem henni tilheyrir, orsakaði meðal margra annarra afglapa yfirvalda, hrun íslenska fjármálakerfisins. Þeir sem afneita því, eru ekki raunveruleikatengdir, og skilja ekki hvers konar svikamylla stjórnar íslenskum stjórnvöldum, bæði nú og fyrr.

Þeir sem tengjast inn í stjórnmála-klíkur landsins hafa sérréttinda-stuðningsbakland, og hinir sem ekki hlýða yfirboðurunum eru rakkaðir niður, og þræla fyrir afglöpum og afleiðingum stjórnmála-embættismanna-kerfisins.

Hvernig væri að þú endurvektir Íslandshreyfinguna Ómar? Hún átti fullan rétt á sér, en fékk samt ekki almennilegt fylgi, og það var óréttlátt vanmat kjósenda, að mínu mati.

M.b.kv.

[Ómar Ragnarsson, 7.4.2012 kl. 21:52]

Hvorki Hjörleifur Guttormsson né ég höfðum gengið um Hjalladal 1980.

Hjörleifur vann einstakt stórvirki með göngum sínum og könnunum á erfiðustu og óaðgengilegustu svæðum landsins og skrifum sínum um þau.

Hann komst að sjálfsögðu ekki yfir allt og því síður ég þrátt fyrir allt mitt flug og akstur.

Svæðið vestan við Hálslón ber samheitið Brúardalir og það sem nú er ofan lóns og flestir fóru um áður, til dæmis á leið í Grágæsadal, er ekkert sérstaklega merkilegt.

Þó var ég að uppgötva frábæran útsýnisstað, sem Völundur Jóhannesson kallar Prestahæð, fyrir aðeins örfáum árum.

En það sem vantaði hjá mér og líka hjá Hjörleifi, var að komast niður að Jöklu í botni Hjalladals og ganga upp og niður með henni báðum megin.

Ég kom ekki niður í botninni, á hjallann Sandkeið, né heldur niður meðfram Sauðá, eða að Stöpunum, Gljúfrabúa og Rauðuflúð fyrr en árið 2000 og hafði fram að því ekki hugmynd um náttúruundur á botni þessa dýpsta, skjólsælasta og gróðursælasta dals á norðausturhálendinu.

Aðeins tíu dögum áður en dalnum var sökkt fékk ég að vita það að Jökla hafði grafið gljúfrin við Stapana, Arnarhvol og Rauðuflúð á innan við öld og að það eitt, þessi óhemju afköst, var algerlega einstakt.

Ég kom ekki að hinni volgu laug, Lindunum, fyrr en þær sukku haustið 2007.

Ég fór ekki inn eftir fjölbreytilegum hjöllunum beggja vegna fyrr en 2002.

Ég skoðaði gljúfur Kringilsár, Stuðlagáttina og fjölmargt annað ekki fyrr en ég sigldi um þetta drukknandi land þegar lónið gleypti það í drullu sína.

Samkvæmt kenningu Gunnars var allt það sem ég og Hjörleifur hefðum getað sagt um þetta svæði árið 1980 sannleikurinn og ekkert nema sannleikurinn. Og ekki lugum við Hjörleifur á þessum tíma.

Tökum hliðstæðu: Fremstu og færustu vísindamenn heims fyrir 500 árum komust að þeirri niðurstöðu að jörðin væri flöt og að sólin og stjörnurnar snerust í kringum hana.

Úr því að færustu vísindamenn veraldar komust að þessari niðurstöðu þá hlýtur það að vera rétt en ekki það sem menn hafa uppgötvað síðar.

Ekki

[Ómar Ragnarsson, 7.4.2012 kl. 22:07]

Ég get bætt einu við til fróðleiks. Ég hafði ekki hugmynd um melinn stóra sem ég hafði þó oft flogið yfir, fyrr en ég heyrði það hjá Kolbeini Arasyni, flugstjóra, sem flogið hafði fyrir Flugfélag Austurlands á sínum tíma, og var í sveit á Jökuldal, að þarna væri melur sem hægt væri að lenda á og að þar hefðu fundist hlaðnar vörður í smölun 1940 sem Jökuldælingar rifu niður, af því að þá grunaði að annað hvort Emmy Todtmann, þýskur jarðfræðingur, eða Agnar Koefoed-Hansen, íslenskur brautryjandi í flugi í leit að hugsanlegum flugvallarstæðum á þýskri flugvél, hefðu hlaðið vörðurnar, annað hvort þeirra eða jafnvel bæði.

Bæði voru tortryggð á þessum tíma og Jökuldælingar höfðu fulla ástæðu til þess, vegna þess að þetta var eina flugvallarstæðið á hálendi Ísland, þar sem Þjóðverjar hefðu getað gert hernaðarflugvöll í algerum friði fyrir umferð, sem var engin þarna nema í smölun um mánaðamótin september-október hvert ár.

Það var ekki fyrr en árið 2007 sem mér var sagt frá því að í munni gamalla Jökuldælinga hefði þessi staður verið kallaður "flugvöllur" allt frá árinu 1940 og því elsta og eina örnefnið á Íslandi með þessu stutta nafni.

Um "flugvöll" lá þá og liggur enn gömul Brúardalaleið. Það var ekki fyrr en 2009 sem ég fann undirstöður af gömlu vörðunum, sem Jökuldælingar rifu niður og benda til þess að hugsanleg flugbraut hefði legið aðeins öðruvísi en varð síðar hjá mér.

Aðein 3,5 kílómetra fyrir innan flugvöllinn er hluti af Hraukunum, einstæðri hólaröð, sem annars eru óaðgengilegir í Kringilsárrana. Þetta fyrirbæri er hvergi til í heiminum nema á Íslandi.

En allt ofangreint er auðvitað einskis virði af því að Hjörleifur Guttormsson komst ekki að þessu fyrir 1980 og af því að ég hef verið að uppgötva staðinn á allra síðustu árum.

[Gunnar Th. Gunnarsson, 7.4.2012 kl. 23:59]

Sumum finnst allt einstakt og ómetanlegt, en þeir eru þó í minnihluta. Frekjan í þessum minnihluta er yfirgengileg.

[Ómar Ragnarsson, 8.4.2012 kl. 00:31]

Enn og aftur minni ég þig á, Gunnar minn, að ég var samþykkur 25 af þeim 30 meiriháttar virkjunum, sem hafa risið á landinu og ég hygg að svipað megi segja um obbann af þeim sem eru skoðanasystkin mín.

Það hefði ég ekki gert ef mér hefði fundist allt svo einstak og ómetanlegt sem fórnað var vegna þessara virkjana.

[Bergþóra Sigurðardóttir (IP-tala skráð) 8.4.2012 kl. 08:38]

Fyrst vil ég þakka þér Ómar fyrir myndina af Herðubreið með Kollóttdyngju í forgrunni.

Því miður töldust bæði Þorvaldur Thoroddsen og Pálmi Hannesson og þeirra fyldarlið sem "Enginn" í mati á Brúaröræfum. Sérstaklega er skemmtileg lýsing Þ.Th. af Hraukunum : "næst hefir svörðurinn vafist upp einsog risavaxnar pönnukökur og er sandur og möl innan í." Harðar undir tönn þær pönnukökur. Það var hinsvegar "Frá Óbyggðum" eftir Pálma sem gerði mig forvitna um Brúaröræfi. Kannski var það förunaeytinu að þakka að mér fannst gaman að koma í Grágæsadal !975 og ganga í kringum vatnið, en Völundur Jóhannesson var fararstjóri í ferð FÍ. Pálmi lýsir ekki aðeins fegurð Fagradals fjálglega en sér fegurðina í jaðri Brúarjökuls:"Raunar voru það jökulásar, svo fagrir sem verða mátti, þótt litlir væru". Þeir félagar voru þá búnir að mæla ótrúlega hæð Hraukanna 10-15 m og tjalda í víðikjarri norður af þeim.

"Víða lá góðgresið í legum líkt og í oftöddu túni, enda voru hestarnir hagspakir."

[Bergþóra Sigurðardóttir (IP-tala skráð) 8.4.2012 kl. 08:57]

Mun skrifa með stærra letri næst svo ég sjá betur letrið. Fyrirgefið villurnar.

Það hafa orðið 39 skjálftar á svæði Vatnajökuls í morgun.

[Guðjón Sigþór Jensson, 8.4.2012 kl. 23:00]

Mikil er trú afdalamanna á borð við Gunnar sem telur allt vera umhverfisspjöll nema það sé til að virkja sem kemur ungum að gagni nema stóriðjunni! Stóriðjan gleypir um 80% alls rafmagns sem framleitt er á Íslandi en hverjar eru tekjurnar? Eru þær kannski einungis 20% af heildartekjum Landsvirkjunar? Það kæmi efasemdarmönnum eins og mér ekki á óvart enda hafa þessi mál verið sveipuð þvílikri dul að ótrúlegt er.

Getur stóriðjumaður eins og Gunnar sem allt þykist vita upplýst okkur fáviskan almúga um staðreyndir sem þessar?

Eftrir því sem hann hugsar og leyfir sér að leggja fram HLÝTUR hann að vita meira en hann gefur í skyn. Hann virðist eftir öllum sólarmerkjum að vera innanhandar stóriðjubransanum á Auaturlandi sem telur allt vera meira meira virði en álbræðslan á Austurlandi. Eins og önnur atvinnustarfsemi komi þeim ekkert við.

Hvert einasta starf í áliðnaði er margfalt dýrara en hvert annað starf. Það er eins og ekki sé nokkur möguleiki á að viðurkenna þá einföldu staðreynd.

Hvet eindregið Gunnar áliðjutalsmann að leggja spilin á borðið:

Að upplýsa alþjóð um ágóða sem og útgjöld við hvert meðalstarf áliðnaðar á Austurlandi.

Á móti HLÝTUR að reiknast ýms kostnaður sem og fórnir við að eyðileggja ýmsar náttúruperlur sem Austfirðingar hafa orðið af þ. á m. um 30 fossar.

Fróðlegt væri að heyra álit hans um þau mál öll.

Kárahnjúkavirkjun hefði að öllum líkindum verið betur óbyggð en byggð. Hún er dýrust allra virkjana í rekstri Landsvirkjunar en virðist hafa minnsta hagrænns ávinnings.

Góðar stundir!

[Gunnar Th. Gunnarsson, 9.4.2012 kl. 00:31]

Guðjæón, hvert einasta atriði sem þú dregur fram í athugasemd þinni er ýmist byggt á misskilningi og fáfræði, eða sleggjudómum um persónu mína. Ég mæli með að þú kynnir þér málin.

[Jón Logi (IP-tala skráð) 9.4.2012 kl. 22:01]

Tjahh:

"Stóriðjan gleypir um 80% alls rafmagns sem framleitt er á Íslandi"

Hélt að það væri bara tölulega rétt.

"Eru þær kannski einungis 20% af heildartekjum Landsvirkjunar"

Hugsanlega spurning um tímabil og tímalengd viðmiðunar hvenær það gætti átt við, en er líkast til óþægilega nærri sanni á stundum. Sumar tölurnar eru háðar leynd og sveiflur miklar í verði. Tækifæri fyrir báða deiluaðila að koma með tölur.

"Hvert einasta starf í áliðnaði er margfalt dýrara en hvert annað starf."

Þarna eru tölur klárari, og þetta myndi vera nærri sanni, eða bara al-satt.

[Gunnar Th. Gunnarsson, 10.4.2012 kl. 02:10]

Enn og aftur þessi barnalegi misskilningur um að störf í áliðnaði "kosti" meira en önnur störf. Þið eruð eins og fávísir krakkar.

Guðjón segir: "Stóriðjan gleypir um 80% alls rafmagns sem framleitt er á Íslandi en hverjar eru tekjurnar? Eru þær kannski einungis 20% af heildartekjum Landsvirkjunar?"

Algjörlega út í loftið og tóm vitleysa eins og annað sem andstæðingar virkjana og stóriðju halda fram.

Ef tekin er raforkusala til stóriðju þar sem orkuverðið er tengt heimsmarkaðsverði á áli, þá fer 69% af heildar raforkuframleiðslunni til hennar. Þessi 69% standa undir 64% af heildar tekjum Landsvirkjunar. 

[Gunnar Th. Gunnarsson, 10.4.2012 kl. 02:17]

Stóriðjan tekur í heild sinni um 85% af raforkuframleiðslu Íslendinga og nema tekjur af henni 81% af heildar tekjunum.

Hagnaður Landsvirkjunar eftir skatta árið 2010 var 9,2 miljarðar

[Jón Logi (IP-tala skráð) 10.4.2012 kl. 10:54]

Sé það að 80% eru gömul tala, en alla vega ca rétt.

Tímabil? bara 2010? prófaðu 2007....

[Gunnar Th. Gunnarsson, 10.4.2012 kl. 11:15]

Hagnaður eftir skatta árið 2009 var 24,3 miljarðar og árið 2008 var hann 43,5 miljarðar. Hreinn hagnaður!

En það er varhugavert að skoða einstök ár... þetta er langhlaup en ekki spretthlaup og sveiflur eru miklar hjá okkur vegna óstöðugs gengis.

Það er sjálfsagt mál að gagnrýna raforkuverð til stóriðju en það verður þá að vera á vitrænum grunni. Aðstæður í dag eru t.d. allt aðrar en fyrir 10 árum síðan og munu halda áfram að breytast á næstu árum. Raforkusamningar eru endurskoðaðir á samningstíma og orkuverðið mun hækka.

[Jón Logi (IP-tala skráð) 10.4.2012 kl. 16:44]

Langhlaup er rétta orðið. Þetta var lélegt lengi vel, en lagaðist við krónufallið. Lagast við álhækkun ogdollarahækkun, en versnar svo ef þessu er snúið á hvolf.

Þegar krónan stóð hátt var þetta annað,- ég man of glöggt að þótti gott að Helguvík fengið Kwst á 1 kr.

Skoðaði úr ársskýrslum LV áðan, en fann aldrei heildartölu sölu aðgreinda. Annað hvort hef ég klikkað á því að sjá það, eða það er ekki þar. Notkunin var hins vegar sundurgreind.

Alla vega fann ég ekki hlutfall heildartekna. Sources?

[Gunnar Th. Gunnarsson, 10.4.2012 kl. 17:14]

http://www.landsvirkjun.com/media/enska/about-us/Landsvirkjun_fact_sheet.pdf