Lesa það sem stendur á umbúðunum!

Ég hef verið coffein-fíkill alla tíð, en vegna þess að mér finnst kaffi vont, hafa cola-drykkir orðið fyrir valinu.

Alla tíð hefur réttilega verið bent á hve mikill sykur er í þeim drykkjum og í gegnum áratugina hefur þetta nálgast heilaþvott, hve sérstaklega mikill þessi sykur sé.

Fyrir fjórum árum gerðist það að ég varð vegna veikinda að kynna mér rækilega hvað færi ofan í mig og þá kom í ljós, mér til mikillar undrunar, að aðrir gosdrykkir voru með álíka mikinn sykur og hann ekkert hollari en í coladrykkjunum.

En mest var undrun mín yfir því hve margfalt meiri orka er í súkkulaði af öllum gerðum en í gosdrykkjunum og niðurstaða mín er sú, að í stað þess að henda á lofti alls konar tal um innihald fæðutegunda, sem oft eru fólgnar í síendurteknum fullyrðingum, sé einfaldast að lesa þetta beint af umbúðunum sjálfum.

En síðan er það annað undrunarefni að svo virðist sem nokkrar tegundir sælgætis séu undanþegnar skyldum um það að greina frá innihaldi þess á umbúðunum.  

Vanmat á sykurmagni í „heilsudrykkjum“

Athugasemdir

[S i g u r ð u r S i g u r ð a r s o n, 18.4.2012 kl. 14:19]

Tek undir með þér. Kaffi finnst mér líka vont. Vandinn er hins vegar sá að kóla-drykkirnir eru vanabindandi og líklega er koffeinið haft í nægilega stórum skammti til að drykkurinn nái tangarhaldi á manni. Sem væri sosum ekki svo ýkja slæmt ef sykurinn væri minni eða enginn. Helda hann sykurfíknin sé verri en koffínfíkn.

[Ómar Ragnarsson, 18.4.2012 kl. 21:49]

Jónas Kristjánsson hefur rökstutt það manna best að hvítasykurfíkn nútímafólks sé ein lúmskasta og versta fíknin, ekki aðeins vegna þess að hún sé fitandi, heldur einnig hættan á áunninni sykursýki og fleiri kvillum.

Ég hef líka haft illan bifur á litarefninu í coladrykkjum, en kannski er það ekkert verra en efni með öðrum lit í öðrum sykurdrykkjum.

Hef einnig séð þá kenningu að neysla "sykurlausra" drykkja með sætuefnum í miklum mæli geti einnig valdið áunninni sykursýki.

Kenningin byggir á því að með því að innbyrða sætuefnið séu send skilaboð til heilans um framleiðslu insúlíns. Þegar slík fölsk skilaboð hafi dunið á heilanum áratugum saman hætti heilinn að taka mark á þeim.

Hef raunar tekið eftir því að margt af feitasta fólkin drekkur sykurskerta drykki og hef grun um að það bæti sér það upp með neyslu á öðru fitandi fæði eins og til dæmis súkkulaði, sem er 5-6 sinnum meira fitandi en jafnmikið magn af coladrykk.