Fleiri tifandi tímasprengjur.

1000 lítra olíutankurinn, sem liggur í Mývatn, er ekki eina tifandi tímasprengjan í og við vatnið.

Set hér inn tvær myndir af Mývatni með sínum heiðbláa tæra lit svona til augnayndis.  

Þótt Bjarnarflagsvirkjun sé aðeins 3 megavött rennur þegar affallsvatn frá henni til vesturs eftir hallandanum í átt að vatninu, sem er í aðeins 4 kílómetra fjarlægð.

Tjarnirnar, sem nú sjást á yfirborðinu, segja aðeins hluta af sögunni, því að neðanjarðar er gruggið komið í Grjótagjá.

Síðan hafa þeir, sem ganga að því sem gefnum hlut að gera virkjunina 30 sinnum stærri, sett í gang tímasprengjuna, sem felst í því að framkvæma þessi áform.

Þeir vinna að því hörðum höndum að lofa með orkusölusamningum til stóriðju á Bakka í 60 kílómetra fjralægð upp í ermina á sér varðandi það að sprengja þessa manngerðu tímasprengju í raun eftir að hún er búin að tifa í áætlunum um þessi ósköp.

Menn þykjast fyrirfram vera búnir að leysa málin varðandi affallsvatnið þótt það hafi hvergi annars staðar verið leyst fram að þessu.

Hendi hér inn nýjum myndum af sívaxandi lónunum við Svartsengisvirkjun. Virkjunin er fjær á myndunum, en Bláa lónið næst okkur, aðeins hægra megin við miðju, en verður æ minni og minni hluti af heildarlóninu sem ekkert ræðst við.

Mönnum kann kannski að standa á sama um þetta á þessum stað, en öðru máli á eftir að gegna um svona vatn, sem rennur út í Mývatn.  

Fyrirfram segja menn að tilraunir með niðurdælingu muni heppnast og ganga upp.

Þær hafa ekki komið í veg fyrir að tjarnir affallsvatns eru byrjaðar að myndast fyrir norðvestan Hellisheiðarvirkjun og niðurdælingin þar að valda manngerðum sjálftum sem engin leið virðist að koma í veg fyrir og ónáða fólk í 15 kílómetra fjarlægð, fjórum sinnum meiri fjarlægð en er frá Bjarnaflagi í aðal byggðina við Mývatn.

Þar er komin enn ein tifandi tímasprengjan sem á að láta tifa þangað til hún springur og ekki verður aftur snúið.

Bæti síðan við mynd af Reykjanesvirkjun, sem er aðeins fárra ára gömul.

  

Tifandi tímasprengja í Mývatni

Athugasemdir

[sæmundur (IP-tala skráð) 10.5.2012 kl. 09:27]

Nú um helgina fór fólk sem ég þekki í grjótagjá það varð ekki vart við annað en að gjáin sé eðlilegt

var þetta að bresta á nú í vikunni þetta með gruggið

[Ómar Ragnarsson, 10.5.2012 kl. 09:38]

Nei, þetta var mér sagt síðastliðið sumar og ekki veit ég hvort þetta sveiflast eitthvað til.

En skoðaðu bara myndirnar að norðan og sunnan frá Svartsengi, sem nú eru komnar inn á pistilinn.

Lónin við Svartsengi eru orðin svona stór þótt sú virkjun sé aðeins búin að starfa af núverandi afli í hluta þess tíma, sem hún á að starfa. Enn er eftir að dæla upp um 75% af því sem renna á út í hraunið.

Settu þetta niður við Mývatn og margfaldaðu það með þremur eða jafnvel meira en þremur, því að þegar landið hefur mettast af vatninu, eykst hraðinn á myndun þess á yfirborðinu.

Þetta hefur verið mjög áberandi í myndun affallslónsins suður af Kröflu í 10 kílómetra fjarlægð frá virkjuninni.

Fyrst nú, 30 árum eftir að virkjunin var gangsett, bólgnar þetta lón út. Og Kröfluvirkjun er 60 megavött en Bjarnarflagsvirkjun á að verða 90 megavött.

"Mene mene tekel", þetta er skriftin á veggnum.

[V.Jóhannsson (IP-tala skráð) 10.5.2012 kl. 10:54]

Mengun og siðlausir íslendingar.

Fyrir mörgum árum fékk frystihús í litlu sjáfarþorpi kæru vegna mengunar í jarðvegi í kring um húsið. Aflógavatn og grútur var orsökin og ekki talið boðlegt annað en að skipta um jarðveg.

Þetta er jú mengun.

Ekki veit ég hversu mörg frystihús hafa fengið athugasemdir út af sama eða svipaðri mengun í gegn um tíðina, en þetta sýnir umgengni íslendinga og virðingarleysi við umhverfið og almenning.

Því miður er þetta landlægt og þarf mikið átak til að breyta.

[Guðjón Sigþór Jensson, 10.5.2012 kl. 11:24]

Því miður eru til öfgamenn sem vilja grafa undan sem hraðast undan allri vernd á náttúru landsins. Ekki ætti að komi neinum á óvart að þessi tankur hefði „týnst“ af ásetningi. Svo virðist sem óvenjuleg leynd hafi legið yfir þessu leyndarmáli.

Ýmsar spurningar koma upp. Hvernig var eftirlit með efnistöku háttað og hvernig gengið var frá áhættuþáttum sem gætu valdið tjóni á umhverfinu?

Þetta mál er skólabókadæmi um kæruleysi og léttúð gagnvart viðkvæmri náttúru landsins. Enginn virðist bera ábyrgð, þetta bara „gleymdist“ þarna einhvers staðar.

Með von um betri umhverfisvakningu allra landsmanna og að sem flestir átti sig á því að ekki dugar léttúð af neinu tagi.

Við eigum ekki að eyðileggja meira en þegar er orðið þrátt fyrir stórkarlalegar yfirlýsingar þeirra öfgamanna sem vilja eyðileggja sem mest í þágu stóriðjunnar.

Góðar stundir!

[Sigurður Sunnanvindur (IP-tala skráð) 10.5.2012 kl. 11:47]

Nú er olíuverð orðið það hátt að það er eins líklegt að einhver taki sig til og næli sér í olíu til 10.000 Km aksturs!

-Þó er eins víst að sá heppni lendi í útistöðum við e-h landeigandann sem telji sig eiga olíuna, - ef hún er á nýtilegu formi :)

[Sigurður Sunnanvindur (IP-tala skráð) 10.5.2012 kl. 11:52]

Grjótagjá er tær en er nú með blárri slikju sem ekki var til staðar fyrir áratug. Blái liturinn er vegna blöndunar djúpvatns úr borholum í Bjarnarflagi.

Hér felur hugtakið "blátær" í sér að vatnið er mengað af mannavöldum.

Þetta er í sjálfu sér ekki hættulegt enn sem komið er, -en er alvarleg áminning um óábyrga umgengni í Bjarnarflagi.

[Gísli Gunnar Pétursson (IP-tala skráð) 10.5.2012 kl. 12:55]

Við sem að þekkjum þarna til höfum allan tíman vitað að þessum tanki, hann datt af dráttarbátnum í slysi sem að varð á mývatni, það má seigja gott að bara tankurinn fór í vatnaði vegna þess að það lenntu menn í vatninu og voru orðini kaldir og hrakktir þegar að var komið.

Það hafa verið gerðir út leiðangrar til þess að finna þennan tank en ekkert gengið.

Þið þyrftuð að kynna ykkur þær grunnvats rannsóknir sem að hafa verið gerðar á svæðinu. Þetta svæði er undir mikilli smá sjá, ég man ekki alveg hversu margar sýna töku holur eru á svæðinu til þess einmitt að fylgjast með þessu.

Affalslónið í kröflu er búið að vera þarna í mörg ár og ekkert í felum. ég man ekki eftir þessu svæði án lóns.

Síðan er algjör snilld að sýna jarðböðin við mývatn sem lón :-)

[Ómar Ragnarsson, 10.5.2012 kl. 15:22]

Jarðböðin og Bláa lónið eru hið besta mál. En efná að velja á milli, annars vegar hreins Mývatns með óskert fuglarík og hins vegar 90 megavatta Bjarnarflagsvirkjunar ætti valið að liggja ljóst fyrir?  Eða er það ekki?  

[Stefán Stefánsson, 10.5.2012 kl. 20:00]

Já Ómar minn... þú talar um Bjarnarflagsvirkjun og affalsvatn frá henni, en birtir svo mynd af Jarðböðunum og kallar þau tjarnir sem sjást á yfirborðinu.. þú ert nú bara að mógða okkur mývetninga með því að gefa í skyn að þessi flotti baðstaður séu bara ómerkilegar tjarnir hahahaaa....

En reiknarðu í alvörunni aldrei með því að þeir sem lesi bloggið þitt þekki aðstæður og sjái rangfærslurnar hjá þér???

En þess má annars geta að Jarðböðin eru mjög fjölsóttur ferðamannastaður og ört vaxandi ferðamannastraumur þangað.

Er það ekki einmitt ferðamannaiðnaðurinn sem á að bjarga komandi kynslóðum?

[Þorvaldur S (IP-tala skráð) 10.5.2012 kl. 20:38]

Stefán.  En hvað með pollinn sem hefur myndast af affallinu frá Jarðböðunum?  Hvert stefnir hann?

[Gunnar Th. Gunnarsson, 11.5.2012 kl. 16:00]

Grjótagjá er ekki eitthvað fast fyrirbrigði sem aldrei breytist. Í mörg ár eftir síðustu Kröfluelda var ekki hægt að baða sig í gjánni vegna hita.

[Ómar Ragnarsson, 12.5.2012 kl. 00:22]

"Hvort eð er stefnan" lifandi komin. Vegna þess að "hvort eð er" verða breytingar í náttúrunni gefur það okkur leyfi til að gera hvað sem er.  Þessi hugsun gefur veiðileyfi á hvað sem er.

Dæmi:

Af því að Mývatn er hvort eð er svo grunnt að það mun fyllast um síðir, eigum við bara að gera hvað sem okkur sýnist þar og gefa skít í eitthvert lífríki sem hvort eð er mun breytast.

Af því að náttúran sjálf mun hvort eð er sjá til þess með tímanum að Þingvellir sökkvi í vatnið væri í góðu lagi að reisa 20 metra háa stíflu við suðurendann til að auka aflið í Steingrímsstöð og sökkva Völlunum.

Af því að stórgos mun hvort eð er breyta gríðarlega miklu í Friðlandi að Fjallabaki væri í góðu lagi að gefa frjálst að spóla á kraftmiklum jeppum út viðkvæmum gróðrinum þar og virkja allt sundur og saman.

[Gunnar Th. Gunnarsson, 12.5.2012 kl. 00:39]

Þú ert alltaf  "All in", Ómar.  Ég var ekki að nefna þetta með Grjótagjá í svona samhengi.