Gott mál.

Bann við flugi undir 3000 fetum yfir Þjórsárverum frá 10. maí til 10. ágúst hefur verið í gildi í marga áratugi og er það vel.

Ég veit ekki til þess að nokkur flugmaður hafi brotið þessa reglu, enda er í fyrsta lagi algerlega ástæðulaust að fara nálægt svæðinu fyrri helming þessa tíma fram undir júnílok, þegar það hefur ekki fengið sinn fagra græna lit.

Eftir það er alveg nægilegt að horfa yfir svæðið með því að fljúga meðfram mörkum bannsvæðisins, sem allir flugmenn eiga að hafa kort yfir.

Svæðið er í sínum fegursta skrúða eftir 10. ágúst þegar banninu hefur verið aflétt.

Fyrir 45 árum var flogið með vistir til vísindamanna á Piper Super Cub á stórum hjólbörðum og lent við Nautöldu og var þá aldrei flogið yfir varplöndin.

Ég flaug ferðir á þessari flugvél út í Surtsey í sama tilgangi og var þá lent á sandoddanum sem skagaði norður úr eynni og umhverfisáhrif engin.

Fllugbannsvæðið yfir Þjórsárverum hefur verið vel merkt alla tíð á þeim flugkortum sem flugmenn nota en enda þótt vel hafi tekist til um að viðhalda banninu er það hið besta mál að Umhverfisstofnun veki athygli á því og öðrum svipuðum.

Lágflug takmarkað yfir Þjórsárverum