Gott ef þetta verður rannsakað almennilega.

Ég hef að minnsta kosti þrjú dæmi um það að unglingar undir lögaldri hafi komið blóðugir heim eftir svokallaðar busanir hjá íþróttafélögunum og hafi hvorki getað setið né legið í nokkra daga á eftir.

Fyrst svo er að ég hef fengið um þetta vitneskju úr ólíkum áttum má búast við að þetta sé mun algengara en flesta grunar.

Ég óttast að það sem ég veit, sé aðeins toppurinn á ísjakanum.

Ég fagna því ef íþróttahreyfingin og íþróttafélögin taka almennilega á þessu og taka áskorun mína alvarlega.

Þetta verður að rannsaka af festu og alvöru, þótt reynsla mín af fregnum af þessu sýni, að afar sterk þöggun hafi verið og sé í gangi í málinu.

Fórnarlömb þessara hýðinga bera harm sinn í hljóði og þora ekki að rjúfa þagnarmúrinn af ótta við að verða sett utangarðs meðal félaganna, lenda í einelti og koma slæmum stimpli á félagið sitt.

Þess vegna hafa allir þeir sem hafa greint mér frá þessu gert það að skilyrði að ég héldi algerri nafnleynd.

Ef ástandið heldur áfram að verða þannig er því miður hætt við að ekkert komi út úr rannsókn málsins, nema að almennilega verði tekið á málunum.

Það er til lítils að segja að "ég ætla svo sannarlega að vona að þetta viðgangist ekki".

Fyrir liggur opinber vitnisburður landsliðsmanns um hýðingar á þeim bæ, og blóðugu hýðingarnar á ungu drengjunum eru á of margra vitorði til þess að það eigi að láta sem ekkert sé.

Það er hastarlegt ef þessi nýi ófögnuður fær að aukast og fráleitt er að þetta þroski nokkurn dreng eða herði hann.

Ég veit ekki til þess að Albert Guðmundsson, Geir Hallssteinsson, Ríkarður Jónsson eða Ásgeir Sigurvinsson hafi þurft að sanna sig með því að ganga í gegnum pyntingar af þessu tagi.

Þeir sönnuðu sig á knattspyrnuvellinum og handboltavellinum þar sem í ljós kemur hverjir standa sig og hverjir ekki, - hverjir eru hlutgengir eða skara fram úr.

Ég á fimm afastráka á aldrinum 8-12 ára og sætti mig ekki við það, ef þeir fara út á íþróttabrautina, að þurfa að sæta því að hópur gangi í skrokk á þeim og misþyrmi þeim.  

ÍSÍ ekki borist kvartanir um grófar busanir

Athugasemdir

[Haukur Kristinsson (IP-tala skráð) 13.6.2012 kl. 22:39]

Það er hallærislegt hversu margt hjá okkur innbyggjurum þarf að enda með fíflagangi.

[Ómar Friðbergs Dabney (IP-tala skráð) 13.6.2012 kl. 23:41]

 Komdu sæll nafni. Ég verð að senda þér þessar línur og tek heilshugar undir hvert orð hjá þér. Þetta er ÍSÍ til háborinnar skammar og að sjálfsögðu á að fara fram lögreglurannsón á þessum málum, svo alvarleg tel ég þau vera. Þessa heimsku verður að stoppa.

Baráttukveðjur með allt það sem þú tekur þér fyrir hendur ,nú sem endranær.

Ómar F Dabney

[Ómar Bjarki Kristjánsson, 14.6.2012 kl. 10:08]

þeir íþróttaforkólfanireru eins og montnir af þessu. Eins og montnir hanar uppá hól.

Ja, þetta ætur nú þjóðin svokallaða Sjallaflokk rassskella sig reglulega - og líkar vel, að því er virðist.

[Sigrún Sigurðardóttir (IP-tala skráð) 14.6.2012 kl. 10:50]

Sæll Ómar og takk fyrir að taka upp þetta mál.

Máli þínu til stuðnings er hér háskóla ritgerð þar sem fjallað er um rassskellingar og typpahlaup í knattspyrnu á bls.4. Reyndar talað um að rassskella "aðeins einu sinni" ...en gætu verið 20 fullorðnir karlmenn. Mér finnst þetta algjört rugl en það er þekkt að karlmenn þora ekki að standa upp og segja frá ofbeldi, ég hef sjálf verið að rannsaka karlmenn sem þolendur ofbeldis og veit það

http://skemman.is/stream/get/1946/9594/20761/2/fr%C3%A6%C3%B0ilegur_kafli$002c_fullkl%C3%A1ra%C3%B0ur.pdf