Íslands þúsund ár

1.8.2012 | 13:15

Bara að "Mallorcaveðrið" bregðist nú ekki!

Þegar hugurinn reikar aftur um nokkra áratugi varðandi áreiðanleika veðurspáa vaknar spurningin um það hvort framfarirnar hafi orðið svo miklar að nú sé hægt að treysta frekar en þá spám um "Mallorcaveður" nokkra daga fram í tímann.

Þetta er skrifað vegna þess að það hefur varla breyst mikið að á hafinu fyrir suðvestan Ísland er illræmdur fæðingarstaður óvæntra lægða, sem hafa oft sett strik í reikninginn hjá veðufræðingum.

Mér er einkum í huga verslunarmannahelgi á áttunda áratug síðustu aldar þegar Jónas heitinn Jakobsson tók svo djúpt í árinni á föstudagskvöldi að spá "Mallorcaveðri" um allt land um helgina.

Daginn eftir var allt annað hljóð komið í strokkinn með vaxandi vindi og úrkomu, að því er virtist upp úr þurru.

Áætlanir mínar um að fljúga frá Akureyri með Jón heitinn Gunnlaugsson eftirhermu sem samferðamann og flögra um fyrir sunnan á milli útihátíða voru nú í algeru uppnámi.

Ég hringdi í veðurstofuna og Jónas kom í símann, næstum því með grátstafinn í kverkunum.

"Það myndaðist óvænt lægð fyrir suðvestan land sem á eftir að kollvarpa allri veðurspánni fyrir helgina", sagði hann, næstum því snöktandi.

"Það var engin leið að sjá þetta fyrir" bætti hann við. "Ég hefði þó átt að vita að þegar nánast engin þrýstilína er yfir landinu og umhverfis það getur þetta gerst. Þetta er að vísu smálægð en hún nægir samt til að gerbreyta veðrinu."

Þetta gerðist á þeim tíma sem mikilvægt veðurdufl á hafinu, þar sem lægðin myndaðist, hafði verið lagt niður og Jónas sagði að það hefði verið misráðið.

Nú eru að sjálfsögðu mun fullkomnari athuganir og tölvubúnaður til að nota en þá var, en þó vaknar spurningin um það hvort "fæðingarstaðurinn" gamli geti enn átt það til að fæða af sér nýja og óvænta lægð eins og oft hefur gerst áður.

Á sínum tíma gerði þessi lægðarmyndun það að verkum að ég lenti í aldeilis mögnuðum hremmingum við að reyna að láta flókna flugáætlun mína ganga upp og væri það efni í marga pistla.

Vonandi gerist ekkert svipað um þessa verslunarmannahelgi.