Hundrað ára man ekki annað eins sumar.

Böðvar í Butru í Fljótshlíð er minnugur vel, þótt aldurinn sé kominn í heila öld, og hann man ekki jafn mikið góðviðrissumar og þetta.

Minni hans nær aftur fyrir 1920 þegar veður fór hlýnandi hér á landi og í hönd fóru um 45 ár, sem voru hlýrri en árin og aldirnar á undan.

Böðvar ætti að muna vel hið einstæða góðviðrissumar 1939, enda var hann þá að nálgast þrítugt, en sumarið nú telur hann enn betra.

Það er því óhætt að segja að sumarið sé að verða það besta sem elstu menn muna.

Hiti yfir meðallagi um allt land

Athugasemdir

[Haukur Kristinsson (IP-tala skráð) 2.8.2012 kl. 18:08]

Ómar. "......en sumarið nú telur hann enn betra."

Er "betra" rétta orðið. Veðurfarið er að breytast og það af mannavöldum. Enginn spurning. En hvort það sé til batnaðar?   

[Sigurður Þór Guðjónsson, 2.8.2012 kl. 19:27]

Sumarið er ekki búið. En þegar menn minnast sumarsins 1939 var það allt sumarið en september var þá hlýrri en flestir júlímánuðir eru venjulega. Sumarið er bara hálfnað og auk þess má alveg færa rök fyrir því að fyrri hluti sumars ýmis síðari ár, hvað þá fyrri ára, hafi ekki staðið þessu að baki. Menn eru ansi fljótir að gleyma.

[Þorkell Guðbrandsson (IP-tala skráð) 2.8.2012 kl. 21:24]

Eitthvað held ég það sé misjafnt hvernig fólk túlkar hugtakið "gott sumar". Mig uggir að bændur á þeim landssvæðum, þar sem þurrkar hafa verið hvað ítækastir, tali ekki um gott sumar.  

[Ómar Ragnarsson, 2.8.2012 kl. 22:13]

Takið eftir orðinu "góðviðrissumar" hjá mér og ég hefði kannski frekar átt að nota orðið "blíðviðri".

Það er rétt að sumarið hefur víðast verið of þurrt fyrir sprettu hjá bændum og þurrkarnir hafa líka valdið sand- og leirfoki ef vind hefur hreyft.

En á móti kemur að meðalvindurinn hefur verið miklu minni en í meðalsumri.

Seint verður það sagt að rok og rigning séu "góðviðri" eða "blíðviðri" þótt vætan yrði vel þegin ef hún kæmi.

[Kristinn Pétursson, 2.8.2012 kl. 23:54]

Þetta er alveg rétt. Einstakt sumar og ótrúlega góð veðrátta.