Tuttugu stiga hiti í 660 metra hæð.

Þegar við Helga vorum við störf á Sauðárflugvelli um daginn var þar 15 stiga hiti, sólskin og hægviðri.

Myndirnar með pistlinum eru teknar í þeirri ferð og síðan í annarri ferð á FRÚnni skömmu síðar þar sem ég bætti um betur.

Ég byrja á tveimur myndum teknum á svonefndri Prestahæð fyrir norðan flugvöllinn; - á þeirri fyrri eru drottningarnar tvær á öræfunum við þetta tækifæri, en næsta mynd er tekin í hina áttina þar sem Snæfell trónir. Já, fjallahringurinn naut sýn með öll stórfjöllin sín, Herðubreið, Snæfell og Kverkfjöll.  

Raða síðan fleiri myndum inn. Í slíku veðri er ekki leiðinlegt að una í öræfakyrrðinni við hugðarefni sín. Við vorum þarna við að valta, mála og bæta merkingar vallarins.

Líklega er hann nú orðinn best merkti völlurinn af þessum toga á landinu, því að bæði er aðalbrautin merkt í samræmi við ströngustu kröfur Flugmálastjórnar um ákveðna stærð og fjölda af eftirgefanlegum rauðlituðum merkingum og auk þess áfram með hvít- og rauðmálaða steina, en þeir hvítu sjást vel þegar þá ber við dökkan melinn.

Sjálfur völlurinn sést hins vegar ekki af jörðu niðri nema af mjög litlu svæði, þegar menn koma alveg að honum.

Bæði í ferð okkar Helgu og ferð minni síðar komu gestir, bæði akandir og fljúgandi.

Flugvélin TF-CAS lenti á vellinum, og nágranni okkar, Völdundur Jóhannesson, kom frá Grágæsadal til að heilsa upp á okkur.

Bræðurnir Ólafur og Albert Sigurjónssynir frá Forsæti á TF-OLA, Piper-PA 28 Ólafs, og lítilli heimasmíðaðri tvíþekju Alberts.

Í síðari ferð minni komu þeir Arngrímur Jóhannsson og Húnn Snædal á Super Cub vél Arngríms og Gunnar Víðisson og Hörður Geirsson á Super Cub vélinni TF-LEO.  

Í seinni ferðinni fann ég fyrir tilviljun undirstöður af tveimur vörðum sem Agnar Koefoed-Hansen hefur vísast hlaðið þarna sumarið 1938 við fyrirhugaðan vestari brautarenda annarrar brautar af tveimur, austur-vestur-braut, sem hann hefur greinilega gert ráð fyrir, því að fyrir nokkrum árum fann ég sams konar undirstöður við báða brautarenda suðvestur-norðaustur-brautar.

Ferðir Agnars 1938 og 1939 á þýsku Klemm-vélinni, voru tímamótaferðir, því að það var í fyrsta sinn sem leitað var að stöðum, sem væru heppilegir fyrir landflugvelli hér á landi.

Agnar Koefoed ritaði Halldóri bónda á Brú bréf þetta haust þar sem fór fram á leyfi landeiganda fyrir því að þarna yrði útbúinn lendingarstaður fyrir flugvélar og eftir það nefndi fólk á Efri-Jökuldal þennan stað örnefninu "Flugvöllur" og var til dæmis sagt, þegar greint var því hvar þáverandi Brúardalaleið lægi, að hún "lægi um Flugvöll."

Er þetta elsta örnefnið á Íslandi sem fól í sér orðið "flugvöllur."  

Staðurinn hafði þann kost til að fara yfir Sauðá, að þarna hún, sem þá var nokkuð öflug jökulá, í tvær kvíslar sem runnu sitt hvorum megin við "Flugvöllinn" og því hægt að fara yfir hana í tveimur áföngum.

Í göngum í septemberlok 1940 rifu gangnamenn vörður Agnars niður af því að þeir óttuðust að hann og / eða  þýskur jarðfræðiprófessor, Emmy Todtmann, sem þarna hafði lika verið á ferð, hefðu merkt staðinn til afnota fyrir Þjóðverja ef þeir gerðu innrás í landið til að taka það af Bretum.

Öll þessi mynd af þessu máli hefur verið að skýrast í sumar og það gerir handrit mitt að kvikmynd eða heimildarsögu um þetta mál enn meira heillandi en áður.

Agnari Koefoed hefur sést yfir lengsta brautarstæðið, en vestur-austur-braut hans hefur greinilega verið vel valin, svo vel, að til heiðurs Agnari og gagns fyrir flugvöllinn er ég að hugsa um að merkja hana og valta og setja upplýsingaskilti við vörðuundirstöðurnar.

Nú sé ég af tölum frá veðurstöðinni "Brúaröræfi" sem er á hæð í aðeins tveggja kílómetra fjarlægð frá vellinum, að þar hafi verið ríflega 18 stiga hiti í gær,, en það þýðir að hitinn á flugvvellinum, sem liggur heldur lægra, hefur komist í 20 stig í 660 metra hæð yfir sjó. 

Þegar sólin sest í heiðskíru veðri getur myndast lágþoka, sem morgunsólin leysir síðan upp við dulúðug skilyrði. Þá er heillandi að vakna þarna í einstakri upplifun óbyggðanna.

Það er eins með þennan stað og ótal aðra á landinu, að meira hlýviðrissumar hefur varla komið þarna áður, - að minnsta kosti ekki síðan ég fór að vera þarna á sumrin að staðaldri. Læt mynd af Fagradal og Herðubreið verða endapunkt þessarar færslu.    

Veður best á Egilsstöðum um helgina

Athugasemdir

[Sigríður B Svavarsdóttir, 10.8.2012 kl. 22:34]

Takk fyrir þessar myndir og skemmtilega frásögn Ómar minn. Þetta hefur verið dásamleg ferð hjá ykkur hjónum, þið hafið hitt marga skemmtilega háloftafíkla hehe. 

þeir hafa rifið niður vörðurnar þegar þú vast aðeins nokkurra daga gamall :)

Lífið er skemmtilegt skilaðu kveðju til Helgu frá mér.. Við heyrumst á þriðjudaginn :)

[Ómar Ragnarsson, 10.8.2012 kl. 23:04]

Já, og tilbúið kvikmyndahandrit mitt undir formerkjum "alternate history" og nafninu "Brúarjökull og innrásirnar í Ísland" gerir ráð fyrir því að Þjóðverjar hefðu framkvæmt innrásina 6. október 1940, tíu dögum eftir að smalamennirnir rifu vörðurnar niður, og notað þennan stað sem lykilatriði í því að ná völdum í lofti yfir landinu og umhverfis það strax á innrásardaginn. Sjálfur hafði ég þá fæðst þremur vikum síðar, degi áður en Hitler aflýsti innrás inn í Bretland og tók Ísland í staðinn!

[Ómar Ragnarsson, 10.8.2012 kl. 23:06]

Afsakið innsláttarvillu, "...hafði fæðst þremur vikum fyrr..."

[Sigríður B Svavarsdóttir, 10.8.2012 kl. 23:11]

já því tók ég eftir.. það er margt merkilegt skráð í okkar sögu sem betur fer..

[Jón Logi (IP-tala skráð) 11.8.2012 kl. 06:59]

Flott hjá þér Ómar. Þú lætur vita ef þig vantar handleggi til framkvæmda ;)