Fullur réttur Einars.

Fjarskiptasamskipti Íslendinga líða að ýmsu leyti fyrir það hve mannasiðir eru hér um margt ófullkomnir.

Það er til dæmis lenska að enda þótt einhver sé í persónulegum samræðum, jafnvel við viðmælanda sem hefur haft mikið fyrir því að ná sambandi, þarf ekki annað en hringingu í farsíma til þess að viðmælandanum er sýnt það tillitsleysi og sú ókurteisi að hætta að ræða við hann og sökkva sér frekar ofan í símtal fjarstaddrar persónu.

Margir afsaka þetta með því að þeir sem hringja verði fúlir yfir því að ekki sé svarað og að sé ekki svarað umsvifalaust sé hætta á því að "koma sér út úr húsi" á einhvern hátt.

Annar hvimleiður ósiður er að fólk hringi frá fjölmennum vinnustað, jafnvel mörg hundruð manna vinnustað, og sá sem ekki svarar á engan möguleika síðar til að sjá hver hafi hringt, vegna þess að á birtinum á símanum sést aðeins skiptiborðsnúmer þess sem hringdi og af þessu geta þá jafnvel hlotist hin mestu vandræði.

Þegar farið er til dæmis að hringja í tíma og ótíma í mann eins og Einar Sveinbjörnsson og þá oft á þennan hátt hefur Einar að mínum dómi allan réttinn fram yfir þann sem hringir til þess að svara ekki og vera ekkert að hafa mikið fyrir því að reyna að komast að því hver hringdi og hvert erindi hans var, án þess að það bitni á Einars eða orðspori hans.

Það þarf að fara vel í gegnum það hvernig við högum svona samskiptum þannig að fyllstu tillitssemi sé gætt og skapa siðareglur sem byggjast á skynsemi og skilningi.

Sama gildir um tölvuskilaboð að það eru takmörk fyrir því hve mikið er hægt að heimta af fólki varðandi það að svara hverju sem er og helst öllu alltaf.

Það er synd að missa Einar út af blogginu, jafnvel þótt það vari ekki lengi, en það á að virða eðlilegan rétt hans.

Þetta mál og fleiri slík ætti að vekja okkur til umhugsunar um mannasiði, tillitssemi og skilning í samskiptum okkar.  

Tekur sér hlé vegna áreitis fjölmiðla

Athugasemdir

[Ari (IP-tala skráð) 15.8.2012 kl. 23:49]

af hverju fær hann sér ekki bara vinnusíma sem hann slekkur á ef hann vill ekki áreiti, hefur síðan annan síma fyrir vini og vandamenn(sem lofa að breiða vitneskju um nr. ekki út)?

[Grímur (IP-tala skráð) 16.8.2012 kl. 03:55]

Hjartanlega sammála þér Ómar