Senn byrgt fyrir sýn ökumanna á einstaka stað.

Það er gott til þess að vita að skógargróðri fer víðast fram á landinu og ekki hvað síst vekur aðdáun hvernig Skeiðarársandur er að gróa upp án þess að mannshöndin hafi komið þar nærri.

En til eru staðir þar sem neikvæð atriði geta fylgt nýjum skógi, svo sem lakara útsýni og breytt ásýnd landslags, sem nýtur sín best án skógar.

Sem dæmi um það siðastanefnda má nefna fallegt klettalandslag sem skógur myndi kaffæra, svo sem á ákveðnum stöðum í Borgarfirði til dæmis í Norðurárdal.

Einnig þarf að huga að því að lofa glæsilegu útsýni að njóta sín þar sem það á við.

Nú þegar er nýr skógur farinn að skerða útsýni ökumanna á einstökum vegarköflum, en það er sjálfsagt galli, sem menn munu sætta sig við og telja skóginn mikilvægari.

Hins vegar þarf að merkja slíka kafla vel ef talið er óhjákvæmilegt að skógurinn verði ekki skertur.

Víða úti á landi má sjá, að hávaxinn skógur hefur kaffært fallega sveitabæi og jafnvel sumar af fallegustu kirkjum landsins þar sem allt land í kring er hinsvegar skóglaust.

Verkefni í skógrækt eru ærin um allt land og því af nógu að taka fyrir öflugt skógræktarstarf sem ekki á að þurfa að líða neitt fyrir það þótt á einstaka stað sé hugað að því að skoða allar hliðar málsins vel áður en farið er af stað og trjátegundir valdar.  

  

Gróður byrgir hjólreiðamönnum sýn

Athugasemdir

[m.b. Rosinn (IP-tala skráð) 21.8.2012 kl. 14:15]

Af því þú nefndir Norðurárdalinn, þá datt mér í hug varðandi skógrækt, sem ég ætla ekki að hallmæla, síður en svo, en þar og í Stafholtstungum, á Fellsströnd og vafalaust víðar þar sem fyrir var okkar lágvaxna birkikjarr, hefur skógræktarfólki þótt þjóðráð að planta innfluttum trjám, svo sem barrtrjám. Einhvernveginn hefði manni þótt eðlilegra að fundnir yrðu fyrir þessa tré staðir og svæði, þar sem enginn trjágróður var fyrir og kannski lítið gróið land, og sótt fram gegn uppblæstri og ofbeit. Þessir tötrar sem eftir voru og eru af íslenskum gróðri fannst manni svo fáir og smáir að ástæða væri frekar til að varðveita þá en útrýma þeim.

[Birgir Gudjonsson (IP-tala skráð) 21.8.2012 kl. 16:08]

Er ekki einfaldari lausn á þessu í Elliðarárdal, að menn hjóli bara hægar ?

[Ari Egilsson (IP-tala skráð) 22.8.2012 kl. 16:12]

Það eina neikvæða sem ég fann við Skotland sem ég ferðaðist aðeins um í sumar var að trén byrgðu aðeins of oft útsýnið meðfram vegunum, ég hugsaði þeim þegjandi þörfina stundum í rútu þegar fallegt loch og fjöll voru handan þeirra. Eitt sem var sérstaklega pirrandi var þegar rútan keyrði framhjá kastalanum sem Monty Python notuðu í mynd sinni Holy Grail, þá sagði leiðsögumaðurinn frá kastalanum og við sáum hann vel yfir litla brú en þegar ég tók upp myndavélina úr hulstrinu þá vorum við komin yfir brúnna og þétt tré byrgðu sýn þannig að ég náði ekki mynd  ;)   

[Aðalsteinn Sigurgeirsson (IP-tala skráð) 22.8.2012 kl. 21:31]

Mýflugur óskast - Úlfaldagerðin.