Norski sjómaðurinn sem kom á óvart.

Fyrir um það bil 6-8 árum var ég á kvimyndatökuferð um Sognfjörð í Noregi í heiðskíru veðri og blankalogni.

Að bryggju í litlu friðsælu fiskiþorpi sem heitir Balaströnd, sama nafni og finnst í Strandasýslu, lagðist trilla og nokkrir sjómenn stukku í land. Ég hugsaði mér gott til glóðarinnar og greip einn þeirra glóðvolgan og byrjaði að taka við hann viðtal um gæftir og afla.

Furðu mikill munur getur verið á norskunni sem töluð er á vesturströnd Noregs, oft erfitt að skilja Björgvinjarbúa en mun skárra að skilja íbúana í innfjörðum norðar á ströndinni.

Reyndist þessi sjómaður tala skýrar en flestir þeirra sem ég hafði talað við sunnar.  

Þegar ég hafði talað við sjómanninn nokkra stund segir hann allt í einu upp úr þurru: "Blessaður hættu þessu babli, Óma minn, og talaðu bara íslensku!"

"Norski sjómaðurinn" reyndist vera frá Tálknafirði, vann sem sjúkraliði án þess að hafa lokið námi í þeirri grein.

Hann átti frí og notaði það til aðí róa með norskum vinum sínum og endurlifa stemninguna frá Tálknafirði.

Ég spurði hann hvort hann væri ekki á förum heim til Íslands, þar sem væri þensla og uppgangur í fjármálum. Hann tók því fjarri og sagðist ekki hafa neitt traust á flumbruganginum og æsingnum heima.

Hér væri miklu rólegra og betra líf án allrar streitunnar og hamagangsins heima,  auk þess sem hann væri með meira en tvöfalt meira kaup en heima og og kæmist því mun betur af.

Þetta var þegar krónan var skráð mun verðmeiri en innistæða var fyrir og er því ólíklegt að þessi íslenski sjúkraliði sem líkaði svona  vel í Noregi, sé frekar að hugsa um að flytja til Íslands nú en þá.

Nema hann hafi glapist til þess 2007, en þá er afar líklegt að hann hafi fengið nóg árið eftir og farið aftur til Noregs.    

Erfitt en alveg þess virði

Athugasemdir

[Þorsteinn Briem, 27.9.2012 kl. 04:28]

Gengi evrunnar gagnvart íslensku krónunni hefur HÆKKAÐ um 8,39% frá 7. ágúst síðastliðnum en breska sterlingspundsins um 8,35%, norsku krónunnar 8,14%, sænsku krónunnar 6,36%, svissneska frankans 7,78%, Bandaríkjadollars 4,68%, Kanadadollars 6,52% og japansks jens 5,69%.

[Haukur Kristinsson (IP-tala skráð) 27.9.2012 kl. 11:20]

Við megum ekki missa þetta fólk, þá eru í þessum hópi ósjaldan valmenni.

En skiljanlegt er samt, að þetta fólk sé ekki reiðubúið að vinna fyrir lág laun á meðan elítan græðir og grillar sem aldrei fyrr.

Það tekir kellingu eins og Steinunni Guðbjartsdóttur, með pungapróf í lögfræði, aðeins einn dag að hala inn mánaðarlaun hjúkrunarfræðinga, sem hafa þú mun lengra nám. Þetta gengur auðvitað ekki.