DRAUMURINN UM ÞJÓÐARSÁTT

Hlustaði á forseta vorn kalla á þjóðarsátt um orkumálin í Silfri Egils. Tek undir hvert orð. En slík sátt getur ekki byggst á þeirri draumsýn forsætisráðherra að hér á landi verði reist fjögur risaálver á næstu 13 árum sem þurfa muni alla vatns- og jarðvarmaorku landsins.

Slík sátt getur ekki byggst á því að fyrst verði nær allt virkjað með gamla laginu og síðan komi í ljós að hægt hefði verið að virkja jarðvarmann með nýrri djúpborunartækni með' margfalt minni umhverfisáhrifum.

Slík sátt getur ekki byggst á því að íslensk náttúruverðmæti verði áfram órannsökuð og gildi þeirra á heimsvísu ekki metin, heldur verði áfram verði anað í virkjanafíkninni án lágmarks þekkingar á þeim verðmætum sem um er að ræða.

Það á ekki að skjóta fyrst og spyrja svo. Það er ekki hægt að spila úr spilum sem menn vita ekki hver eru. Eftir 6- 15 ár fást væntanlega niðurstöður djúpborunartilraunanna. Grundvöllur þjóðarsáttarinnar verður að vera þekking á viðfangsefninu. Draumar mínir snúast um slíka þjóðarsátt.  

Athugasemdir

[Snæþór Halldórsson (IP-tala skráð) 18.2.2007 kl. 18:49]

Hvernig væri nú að þú hættir þessum viðbjóðslegu lygum sem þú reynir stöðugt að ýta að fólki.  Í þessum pistli læturðu þann þvætting úr þér að 4 álver muni þurfa alla vatns og jarðvarmaorku landsins.  Það væri svart maður.  Þá þyrftum við væntanlega að fara að finna okkur kerti til þess að hafa ljós í hýbýlum okkar, "Rollur á hvert heimili" yrði slagorðið því þær gefa okkur ylinn eftir að álverin fjögur tóku alla orkuna.

Svo leifðirðu þér að hreyta í okkur íslendinga annarri lygi um daginn sem snerist um það að ef álver yrði reist á Húsavík þá myndi öll náttúra á norð austurlandi deyja.  Hverskonar fáráðlings orðagjálfur er þetta í þér maður?  Það tekur ekki nokkur maður mark á svona kjaftæði, ef þú myndir nú reyna að taka þig saman í andlitinu, berjast með rökum þá myndirðu kannski ná árangri. 

Ég legg til að þú skoðir baráttuaðferðir Bellona félagsins.  Þar eru á ferð umhverfissinnar sem beita rökum, ekki sífelldum lygum og þvættingi!

[Ásthildur Cesil Þórðardóttir, 18.2.2007 kl. 18:56]

Láttu ekki skjóta þig niður Ómar.  Ég hef rætt við margt fólk af erlendu bergi brotið, sem kemur hér aftur og aftur til að njóta þess sem þeirra lönd hafa misst.  Stórkostlegrar náttúru og víðerni sem þetta fólk sækir í vegna þess í sjálfu sér, og að sækja orku í sálina.  Við eigum svo margt sem aðrir hafa misst.  Sumir halda að allt sé mælt í peningum og auðhyggju.  En það er einfaldlega rangt.  Og það á eftir að koma í ljós betur og betur á næstu árum.  Þess vegna þarf svona ljósamann eins og þig til að vekja fólk upp.  Stattu þig strákur segi ég nú bara. 

[Dofri Hermannsson, 18.2.2007 kl. 18:59]

Við höfum einstakt tækifæri til að ná breiðri samstöðu um náttúruverndarmálin í kosningunum í vor.

Það eiga allir að geta fallist á að nú verði staldrað við, náttúra landsins alls rannsökuð, verndun verðmætra svæða tryggð og útkoman lögð til grundvallar nýju landsskipulagi. Þegar sú niðurstaða liggur fyrir er hægt að ræða hvar má skipuleggja mannvirki af ýmsu tagi - utan þessa nets verndarsvæða.

Út á þetta gengur Fagra Ísland með sinni Rammaáætlun um náttúruvernd. Að rannsaka, friða og skipuleggja út frá þeirri niðurstöðu. Það er skynsamleg og öfgalaus tillaga sem flestir ef ekki allir eiga að geta fallist á.

Það er ekki síst þetta síðasta atriði sem skiptir máli - við þurfum tillögu sem hægt er að ná samstöðu um. Tillaga sem ekki næst breið sátt um er gagnslaus. Náttúru Íslands er enginn greiði gerður með tillögum sem eru svo öfgafullar að það næst ekki samstaða um þær - þær eru bara ávísun á áframhaldandi píslarvætti náttúrunnar.

Látum það ekki gerast eina ferðina enn. Tökum höndum saman um skynsamlega leið til að leysa þetta stærsta ágreiningsmál þjóðarinnar.

Byrjum á að rannsaka náttúru landsins, tryggja friðun verðmætra svæða og festa þá niðurstöðu í landsskipulag. Svo má tala saman um framhaldið. Meirihluti landsmanna hlýtur að geta fallist á það.

[Sævar Sævarsson (IP-tala skráð) 18.2.2007 kl. 19:27]

Sæll vertu Ómar haltu áfram á þessari braut hún er rétt að byrja.  Eg er svo sammála þér í þessum efnum því ekki að gefa sér tíma til að anda með nefninu og sjá hvað djúpborunartækinn getur fært okkur. Eins og máltækið segir "Góðir hlutir gerast hægt"

 Varðandi 1. ræðumann þá er verið að tala um allavatns orku sem ekki hefur en verið beisluð en þá í virkjanir og komandi álver. Svo ég hend að við þurfun ekki að fara út um sveitir til að kaupa okkur varmagjafa á fótum. 

 Sjáfur er eg búsetur í Noregi núna sem stendur en filgist vel með því sem er að gerast á íslandi nú umstundir,  eins og mér kemur tæmið fyrir sjónir sem áhorfandi þá er það málið "annað hvort er það við sem viljum virkjanir og álver vinnum þetta ralí eða það verður ekki neitt við að vera á þessu skeri".  Góðar stundir

[Jóhann F Kristjánsson (IP-tala skráð) 18.2.2007 kl. 20:33]

Ómar.

Það hefur ætíð í gegnum aldirnar verið stundað að refsa boðbera innra tíðinda.

Láttu ekki deigan síga, eitt frægasta spakmæli allra tíma, "sannleikurinn mun gera yður frjálsa" á svo sannarlega við í dag þó svo að oft hafi valdhafar misnotað þennan frasa.

Jarðvarmi er orkubanki framtíðarinnar, nýtingin á núverandi svæðum er innan við 30% af því afli sem upp kemur, þetta þarf að bæta. Djúpborun er lúxus framtíðarinnar en því miður ekki alveg í hendi í dag. Ná þarf þjóðarsátt um þau svæði sem álitlegust eru til virkjana en að mínu mati eru þau Krafla, Bjarnarflag og Þeistareykir, allt svæði sem þegar hefur verið raskað og línumannvirki þaðan munu valda hverfandi sjónmengun amk ef lagt verður í áttina að Húsavík.

Ég vil benda áhugasömum virkjunarsinnum á nokkrar hugmyndir hvernig hægt væri að nýta raforku með betri hætti en að byggja álver:

1. Tölvu og gagnaver fyrir Microsoft og Google (allt að 30 MW)

2. Yfirbyggð skíðabrekka í Úlfars eða Skálafelli (4 MW)

3. Fullvinnsla á áli, vélarhlutir, felgur, plötur, osfr. (100 MW)

4. Framleiðsla á vetni (300+ MW)

5. Framleiðsla á spíritus á til íblöndunar á bíla (50 MW)

Sem sagt öll sú orka sem virkjanleg er á fyrrgeindum háhitasvæðum.

Þurfum við meira?

[Kristján Pétursson, 18.2.2007 kl. 20:51]

Forsetinn fór á kostum í Silfri Egils.Sammála Samfylkingunni um Faga Ísland.Við stöndum með þér Ómar í náttúrverndarmálum,þú þekkir þau betur en nokkur annar Íslendingur.

[Stefán Stefánsson, 18.2.2007 kl. 21:45]

Ég vil bara taka það fram að ég ber mikla virðingu fyrir Ómari Ragnarssyni og hann er búinn að áorka mörgu um æfina og á allt gott skilið.

Öll þessi barátta verður dálítið ýkt og þar geta verið öfgar á báða bóga, en æskilegt að sem flest sjónarmið komi fram.
Því miður er stundum farið frjálslega með upplýsingar, oft aðeins sagður hálfur sannleikurinn og verða upplýsingarnar þar af leiðandi villandi, en þó án þess að um ósannindi sé að ræða.

Svo er ekki rétt að að íslendingar séu annaðhvort virkjunarsinnar eða umhverfissinnar. Verndun og skynsamleg nýting getur vel farið saman án allra öfga.

[Ómar Ragnarsson, 18.2.2007 kl. 23:03]

Staðreyndir: Fulltrúar allra álfyrirtækjanna hafa sagt að 5-600 þúsund tonna álver séu lágmark til að standast samkeppni. Stækkun Alcan í Straumsvík upp í 460 þúsund tonn er dæmi um þetta.

5-600 þúsund tonna álver á Húsavík mun þurfa sem svarar afli tveggja Kárahnjúkavirkjana. Talað er um að virkjanlegt jarðvarmaafl í Þingeyjarsýslu sé um 600 megavött. Þá vantar annað eins í viðbót. Árnar í Skagafirði og Skjálfandafljót anna aðeins helmingi þess, sem á vantar. 

Nauðsynleg stækkun álvers í Reyðarfirði mun síðan gera það nauðsynlegt að virkja Jökulsá á Fjöllum fyrir það og fullstórt álver á Húsavík enda útlokaði forsætisráðherra ekki slíka virkjun í Kryddsíld um daginn.

Þá eru  eftir álverin tvö í viðbót sem forsætisráðherra talaði um í Silfri Egils. Væntanlega í Helguvík og Þorlákshöfn. Þau munu krefjast allrar orku Reykjanesskagans, Torfajökulssvæðisins, Kerlingarfjalla og vatnsorku að auki.

Snæþór Halldórsson. Þessar orkutölur eru úr opinberum skýrslum og fyrrgreind ummæli liggja fyrir. Skoðaðu þessi gögn áður en þú talar um "viðbjóðslegar lygar." Þá gætu þessar "viðbjóðslegu lygar" breyst í "viðbjóðslegan sannleika."

[Gunnar Th. Gunnarsson, 18.2.2007 kl. 23:44]

Ég vil nú helst ekki að umræðan fari á mjög hátt svívirðingaplan með ljótum orðum.   En er nú ekki nóg komið af gífuryrðum og ýkjum.                                                           Staðreynd hjá þér Ómar; Álverið í Reyðarfirði er 240 þús tonn. Hefurðu séð einhversstaðr ummæli forsvarsmanna Alcoa að þetta sé óásættanleg stærð? Þeir hafa gert samning um orkukaup til 40 ára og umhverfismatið er miðað við þessa stærð. Hvernig má þá vera að fulltrúar álfyrirtækjanna segi eitthvað annað? Ég er farinn að halda að það hangi eitthvað annað á spýtunni en náttúruverndarhugsjón. Er þetta kannski bara inngróin andúð á erlendum stórfyrirtækjum. Ekki það að það þurfi ekki að vera allt naglfast í samningum við þessi fyrirtæki, því annars hlaupa þau útundan sér.   Einhvernvegin finnst mér þetta ekki ganga upp að allt sé einstakar náttúruperlur um leið og á að fara að nýta landið til raforkuframleiðslu. Það er allstaðr fallegt á Íslandi. Þegar ég horfi út um gluggan hjá mér hérna á Reyðarfirði þá sé ég ekkert nema fjallafegurðina og hugsa með mér að með fjölbreyttara mannlífi verði bara dásamlegt að búa hérna í framtíðinni.

[Haukur Kristinsson (IP-tala skráð) 19.2.2007 kl. 00:01]

hvað er að því að virkja þessa læki sem renna óhindrað út í sjó? er mikið borgarbarn svo ekki er ég að menga landið með jeppaferðum um hálendið, en tel að við eigum að nýta okkar orkulindir til að skapa atvinnu um allt land. fatta ekki fólk sem nennir að standa yfir einhverjum læk og væla um að ekki megi virkja hann og fá einhver verðmæti úr honum. held það sé bara námsmenn og ellilífeyrisþegar eins og þú ert orðin. verðum að geta borgað ykkur sómasamlegt viðurværi, og það gerist ekki nema við getum nýtt okkar orkulindir og selt þær

[Siggi (IP-tala skráð) 19.2.2007 kl. 11:02]

Þú hlýtur að vera grínast Guðlaugur

Það eru einmitt miklar fréttir um það undanfarið að endurnýjanleg orka sé að verða verðlaus vegna þungs vatns NOT!!!!!!!!!

Hverskonar endalaust bull er verið að bera fram fyrir fólk.

Síðan er ekkert hlægilegra en þegar þú segir að fólk vilji flytja frá Mengandi umhverfi fyrir austan suður í hreinleikann.

Þú hlýtur að búa út á landi eða fastur í glugglausum kjallara. Ég flutti allavega sjálfur út á land í hreinna umhverfi enda er RVK að kafna í skít.

Komdu út á land Gulli minn og andaðu að þér hreinu lofti og upplifðu alvöru náttúru en ekki tilbuið grámygluumhverfi eins og í RVK

[Ómar Ragnarsson, 19.2.2007 kl. 11:42]

Fyrsta álverið sem reis í Straumsvík var 33 þúsund tonn og stækkaði síðar í 100 þúsund tonn. Um það var gerður samningur til nokkurra áratuga á svipaðan hátt og gert hefur verið á Reyðarfirði. Raunar minnir mig að álverið eystra sé 320 þúsund tonn.

Nú er álverið í Straumsvík 180 þúsund tonn og í hvert skipti sem álverið hefur verið stækkað hefur verið gerður nýr samningur. Næst á dagskrá er stækkun upp í 460 þúsund tonn með tilheyrandi nýjum samningum.

Ef það gengur ekki eftir hóta Alcan-menn að leggja álverið niður. Svona er þetta og svona gengur það.

[Haraldur Haraldsson, 19.2.2007 kl. 11:45]

Tek undir orð þin Ómar Forseti vor for á kostum i þessu viðtali hjá Aggli /Og þjóðarsátt þarf ,en ekki þetta sem Iðnaðaráherra er að boða!!!!!!

[Örn Jónasson (IP-tala skráð) 19.2.2007 kl. 12:31]

Einu sinni státuðum við Íslendingar okkar af að eiga mjög mikla ótakmarkaða og hreina orku.  Allt í einu eru þessi orka orðin umhverfisvandamál.  Er það vegna þess að þegar byrjað var að virkja fyrir utan Suð-Vesturhornið og Suðurlandið? 

Einu sinni þótti sjálfsagt að byggja stóriðju hér á landi.  En þegar farið var að tala um að byggja stóriðju á Reyðarfirði varð allt vitlaust.  Var það út af því að náttúrulögmálið um að stóriðjuver ættu að rísa á Faxaflóasvæðinu var brotið??

Afhverju djúpborun - er það af því að helstu háhitasvæði landsins eru að finna á Reykjanesi og Suð-Vesturhorninu?

Hvað gerist ef olía finnst í jörðu á eða við Ísland?  Á láta vera að vinna hana út af því að hún hefur ómetanlegt verndargildi?

Hvað gerist þegar hátæknistörf verða til úti á landi?  Á að mótmæla því vegna þess að slíkt hefur óæskileg umhverfisáhrif sökum meiri ferða og flutninga?

Ómar, viljið þið umhverfis-talíbanarnir ekki bara gera alla landsbyggðina af einum allsherjar þjóðgarði með tilheyrandi byggðasöfnum sem einungis eru opin 3 mánuði á ári?

Er tilgangur Fagra Íslands ekki að gera alla landsbyggðina einu allsherjar verndarsvæði og þar með taka landssvæði þar í gíslingu til að koma í veg fyrir framkvæmdir og þróun þar, svo að fólks sem býr þar verði 3. flokks þjóðfélagsþegnar í öllu tilliti m.a. efnahagslegu, tekjulegu og mennta- og menningarlegu?

Hvað með umhverfisvernd í nágrenni Höfuðborgarinnar?  Ofnotkun bíla og nagladekkja?  Eyðileggingu á Álafosshvos og Heiðmörk?  Eyðileggingu á hrauninu sunnan Garðabæjar?  Öllum nátturperlunum sem fara undir íbúðabyggð í Vatnsenda? Elliðavatnslandinu? - Norðlingaholtinu? - Úlfarsfellslandinu? - Geldingarnesið? - Grafarholtið og Reynisvatnssvæðið? - Hvað með Hvalfjörðinn, er hann ekki náttúruperla?  - þar er búið að byggja álver með tilheyrandi stækkunum auk þess að þar er járnblendiverksmiðja.   HVAR ERU UMHVERFISSINNAR SVOKALLAÐIR Í ÞESSUM MÁLUM?????  Stórt er spurt!

Svaraðu nú þessu Ómar og hinir umhverfis-talibanarnir!

[Haukur Nikulásson, 19.2.2007 kl. 14:46]

Nú er Elliðavatnslandið allt í einu orðið að "náttúruperlu". Örn Jónasson má kynna sér það aðeins betur.

[Gísli Tryggvason (IP-tala skráð) 19.2.2007 kl. 16:15]

Tek undir orð Arnar Jónassonar þó að orðinu "talibani" megi sleppa. Hvers vegna svara menn honum ekki efnislega? Hvað er náttúru- og umhverfisverndin á höfuðborgarsvæðinu? Varla til að mínu viti ! Hvers vegna var byggðin ekki þétt meira en að fara raska áður ósnortum svæðum umhverfis borgina? Af hverju mótmælti engin? Elliðavatnssvæðið var mikil náttúruperla áður þessar framkvæmdir urðu. Þar voru sumarbústaðir en síðan vildu menn fara að byggja stórhýsi við vatnið með tilheyrandi röskun á umhverfi. Hvers vegna halda menn alltaf að ferðamannaiðnaðurinn muni bjarga okkur. Sjá þeir ekki hversu mikið það þarf af ferðamönnum með tilheyrandi uppbyggingu (framkvæmdum) til að þetta borgi sig. Og hvar eru þá umhverfismálin með stóraukinni loftmengun vegna flutninga, aukinni uppbygginu hótela og dvalarstaða á kannski viðkæmum "ósnortum" svæðum. Að mínu viti yrði það mun meiri umhverfisröskun en nú er.

kveðja Gísli

[Örn Jónasson (Grrrr!) (IP-tala skráð) 19.2.2007 kl. 17:11]

Haukur, Elliðavatnslandið er VÍST náttúruperla, þangað fór í sumarbústað til frænda míns á árunum í kringum 1970 og veiddi þar fisk í vatninu.  Þarna eru nú risin mikil íbúðabyggð með háhýsum og tilheyrandi bílaumferð!  Kynnti þér landið þitt og nærumhverfi, Haukur!

Guðlaugur Hermannsson, vertu ekki svona barnalegur varðandi ferðamennsku og að hægt sé að lifa af henni!  Þú ert örugglega einhversstaðar af Mölinni, 101 Reykjavík kannski?  Viljum við fá 1.000.000 ferðamenn hingað á ári?  Það stafar mikil mengun og umhverfisröskun þegar vélsleðar og ofurjeppar fara að tæta upp landið okkar með þá.  Og hvenær fóru Talibanar að berjast fyrir réttlætti?  Kynntu þér heimsmálin drengur.  Talibanir stóðu fyrir bókstafstrú og öfgahyggju og vildu sprengja Afganistan aftur til steinaldar til að geta komið þjóðskipulagi sínu á fót byggt á Sharía-lögum Kóransins. 

Þú hefur greinilega ekki skoðað landið þitt mikið fyrir utan malbikið á Höfuðborgarsvæðinu, en hefur örugglega farið 100 sinnum til útlanda.  Af skrifum þínum virðist þú hafa farið Hringveginn á svona ca. 2 dögum fyrst þú nefnir að það séu einungis örfáar sjoppur - eða fórstu hann kannski fyrir 25 árum síðan??Ferðaiðnaðurinn getur einungis blómstrað á Suð-Vesturhorninu á ársgrundvelli.  Flestir ferðamenn sem koma til landsins koma um flugstöð Leifs Eiríkssonar og einugis 2% af þeim fóru t.d. til Austurlands.  Það er dýrt að ferðast um Ísland og ekkert sérlega spennandi um há vetur.  Dream on man, Guðlaugur! 

[Guðmundur Guðmundsson (IP-tala skráð) 19.2.2007 kl. 18:26]

Samkvæmt upplýsingum Alcoa verður framleiðslugeta álversins fyrir austan ekki 240 þúsund tonn heldur 346 þúsund tonn.

[Snæþór Halldórsson (IP-tala skráð) 19.2.2007 kl. 19:26]

Jæja Ómar, áfram í bullinu.

Já, ég kalla það viðbjóðslegar lygar þegar bróðurparturinn á þínum skoðunum virðist vera myndaður út frá ímynduðum tölum.

1. Álverið á Húsavík er áætlað 240þús tonn. Ekki 5-600þús tonn eins og þú segir.

2. Þú segir að jarðvarmi á NA-landi, auk vatnsorku úr jökulánum dugi ekki til.  Hvernig má það nú vera? Tómt kjaftæði eins og venjulega.

3. Nauðsynleg stækkun á Fjarðaáli...blablabla, aftur farinn að gefa þér eitthvað sem þú veist bara ekkert um.

4. Álverin tvö úr Kryddsíldinni. Enn og aftur ertu farinn að gefa þér eitthvað, bæði um staðsetningu og stærð já og þar með orkuþörf.

5. Ég dreg ekkert til baka um viðbjóðslegar lygar.  Þú og þitt fólk mokið frá ykkur endalausum getgátum og lygum því að þið vitið að ef þið tuðið nógu oft sömu lygina þá trúir fólk henni á endanum.

Ég er umhverfissinni.  Ég vil ekki virkja jökulárnar í Skagafirði, ég vil ekki virkja Jökulsá á Fjöllum, ég bíð spenntur eftir djúpborun.  Ég hef trú á vindmyllum sem gefa 3-5 mw stykkið.  Ég trúi á biomassa og jafnframt á sólarorku þar sem það á við já og svo vil ég fella niður öll vörugjöld á ökutækjum sem nota hreinni orku en bensín/dísel.

EN!! Ég þoli ekki umhverfislygasinna. Ef þú vilt fá minn stuðning og fjölda annarra þá skaltu fara að segja hlutina eins og þeir eru. Tala af heilindum og hætta bulli um jólasveinabyggð fyrir norðan Kárahnjúka eða maraþonhlaup eftir fúkkalegum aðrennslisgöngum.  Já og umfram allt annað, aldrei gleyma því að hér í þessu landi býr fólk, fólk sem þarf atvinnu, fólk sem lifir ekki á 3-4 mánaða ferðamannasumri.  Við verðum alltaf, ALLTAF, að blanda saman hag fólksins og landsins og finna jafnvægið. 

 Kveðja

Snæþór Halldórsson

[Tryggvi L. Skjaldarson (IP-tala skráð) 19.2.2007 kl. 22:54]

Sæll Ómar Alcan hefur aldrei hótað að leggja álverið í Straumsvík niður.  Þú hefur gleymt að það var búið að benda þér á það.   Ef ekki verður stækkað þá er það upphafið af endi álversins í Straumsvík.  Álver eru einsog bílar eða flugvélar.  Taka breytingum í tímans rás.  Yfir 50% allra álvera í heiminum eru með lægri kostnað en álverið í Straumsvík á hvert framleitt  tonn af áli í dag.   Hversvegna beitir þú þér gegn stækkun í Straumsvík?  Það verður virkjað á Hellisheiði, þar sem VG og Samfylking stjórnuðu í 12 ár, hvort sem stækkað verður í Straumsvík eða ekki.  Neðri hluti Þjórsár verður virkjaður líka, enda langsótt að tala um náttúru spjöll þar. Reksturinn í Straumsvík hefur verið til fyrirmyndar.  Árangur í lágmörkun mengunar er á heimsmælikvarða. Til dæmis má nefna að losun flúorkolefna(sterkar gróðurhúsalofttegundir) er 95% lægri í Straumsvík en hún er að jafnaði við alla aðra álframleiðslu í heiminum. Er 47 kg á hvert framleitt tonn í Straumsvík en 1.100 kg að meðaltali í heiminum.Svo tala menn eins og að í Straumsvík séu umhverfissóðar.  Með kveðju Tryggvi L. SkjaldarsonStarfsmaður Alcan 

[Stefán Stefánsson, 20.2.2007 kl. 00:29]

Því miður er það háttur "svonefndra umhverfissinna" að ýkja og segja hálfan sannleikann og vona að fólk trúi bullinu.
Það sást vel á fundinum í Árnesi þar sem fólk af höfuðborgarsvæðinu var í miklum meirihluta og skýrt var tekið fram að engin sjónarmið mættu heyrast nema hjá þeim sem væru á móti virkjunum.
Það er passað að virkjunarandstæðingar fái ekki upplýsingar um báðar hliðar málsins og lítið um skynsemi.

Og að lokum Guðlaugur.......................  ég er orðlaus yfir þínum málflutningi. Hann er umhverfissinnum ekki til framdráttar.

[Guðmundur Guðmundsson (IP-tala skráð) 20.2.2007 kl. 00:40]

Í Viðskiptablaðinu 12. janúar má lesa viðtal við Rannveigu Rist. Þar spyr blaðamaðurinn: "Nú hafið þið sagt að álverinu verði lokað ef niðurstaða íbúakosningarinnar verði ykkur óhagstæð. Er raunveruleg hætta á að svo fari?"

Rannveig mótmælir ekki spurningunni heldur svarar: “Þetta er einfaldlega sá raunveruleiki sem við verðum að horfast í augu við og kosningin snýst í raun um hvort álverið verður hér til framtíðar eða ekki. "

[Stefán Stefánsson, 20.2.2007 kl. 00:50]

Þetta er ekki hótun hjá Rannveigu Rist eins og sumir vilja halda fram.
Málið er bara það að álver úreldast og ef ekki má endurnýja með fullkomnari búnaði er ekki nema eitt í stöðunni......... það er að loka þegar búnaðurinn er kominn á tíma. Svo einfalt er það.

[Óskar Helgi Helgason (IP-tala skráð) 20.2.2007 kl. 01:20]

Komið þið sæl !

Snæþór Halldórsson og Örn Jónasson ! Eitt skal ekki af Tryggva L. Skjaldarsyni skafið, að hann talar ekki í óþarfa umvöndunartón, til hugsjónamannsins Ómars.

Þó þarf ég aðeins, fyrir hönd bænda á Þjórsárbökkum, að vanda um við Tryggva.

''Neðri hluti Þjórsár verður virkjaður líka, enda langsótt að tala um náttúruspjöll þar'', Tryggvi; ekki einasta um náttúruspjöll þar að ræða, heldur og mannlífsspjöll, og búfénaðar; ef af yrði, á næstunni.!

Gætum að Tryggvi, treystir þú þér til, að dæma um hversu mikilvægara er; mannlíf Hafnfirðinga eða mannlíf Þjórsárbyggja ? A.m.k. treysti ég mér ekki til að setjast í það dómarasæti, hygg þó, að hvoru tveggja sé landi og þjóð mikilvægt, án frekari kostnaðar annars á hinum. Sjáðu til, Tryggvi, ég gat þess; í orðræðu við þann prúða mann Á. Örn Þórðarson, á spjallsíðu Rauða ljónsins, á dögunum, að svo mikilli raforku hefir verið dreift, um landsins byggðir, úr Sunnlendingafjórðungi, um áratuga skeið; og það það án þess, að við krefðumst nokkurra sérkjara á raforkuverði, Sunnanmenn. Ekki mótmælti Á. Örn Þórðarson, sá prúði maður; þeirri tilvísun minni. 

Tryggvi ! Eigum við, dauðlegir mennirnir ekki að hyggja að framtíðarmöguleikum barna okkar, jafnt á Hafnfirzka vísu, sem og Sunnlenzka ? Hvaða rétt höfum við, ég eða þú, að ráðskazt með hagsmuni afkomenda okkar, með einhverri sérgæzku og skammtíma hagnaðarvon ? Hvers virði er það okkur, 3 falt stærra álver í Straumsvík, eða þá nokkrum tuga hektara nýrækt, á Þjórsárbökkum, værum við dauðir, að kvöldi næsta dags ? Er það ekki purkunarlaus frekja, já og yfirlæti, að ráðskast með hagsmuni barna okkar, og þeirra afkomenda, já; og valda óafturkræfum spjöllum, með stundar hagnaðarvon okkar sjálfra, persónulega ?

Tryggvi ! Tökum ekki fram fyrir hendur komandi kynslóða, ekki víst, að miðlar þessa heims kæmu neitt hlýlegum kveðjum, til okkar, yfir þilið þunna. 

Með beztu kveðjum, úr Árnesþingi /

Óskar Helgi Helgason, frá Gamla Hrauni og Hvítárvöllum    

[Örn Jónasson (IP-tala skráð) 20.2.2007 kl. 09:10]

Sæll, Guðlaugur!

Ég er miklu verri þegar ég er yfir á heftinu eða öllu heldur á yfirdrættinum - (Það eru reyndar meira en 10 ár síðan fólk hætti að nota hefti til að borga með).  Grrrrrrr!!!!!

Þú hljómar hinsvegar eins og þú hafir fæðst í gær -

Ps. Ég er örugglega miklu meiri umhverfishugsjónarmaður en þessir svokölluðu umhverfissinar af Höfuðborgarsvæðinu sem þykjast vera umhverfissinnar, af því að þeir hafa svo slæma samvisku að vera umhverfissóðar, keyrandi um á ofurjeppum um götur og stræti borgarinnar.

[Vigfús Eyjólfsson (IP-tala skráð) 20.2.2007 kl. 09:15]

Á þessari blogsíðu er listi yfir álver í heiminum fyrir utan Kína. Álverin eru 119. Þar af eru 54 minni en álverið í Straumsvík. Þau eru á öllum aldri allt upp í 106 ára! Það virkar hæpið að álverið í Straumsvík verði tæknilega úrelt eða óhagstæð stærðareining á næstunni.
http://sas.blog.is/blog/sas/entry/126486/

[Örn Jónasson (IP-tala skráð) 22.2.2007 kl. 14:24]

Sæll Guðlaugur

Ég fyrirgef þér fyrir æsku þína.  Þú átt eftir að fræðast meira um lífið og tilveruna.  Þú ættir t.d. að kynna þér lífshætti úti á landi.  Þar ólst ég upp (á Eskifirði) og veit hversu efnahagurinn er brothættur þar.

Gangi þér allt í haginn og í lífinu.