Hvíldardagurinn fyrir manninn, - ekki öfugt.

Kristur hafði sitthvað við það að athuga hvernig litið var á hvíldardaginn á hans tíma og er því ekki leiðum að líkjast þegar Róbert Marshall vill taka svipuð mál okkar tíðar og okkar lands til endurskoðunar.

Þegar nokkrir dagar voru til jóla 1952 var allsherjarverkfall í hnút, og þá lagði Sigurður Skjaldberg stórkaupmaður það til að jólunum yrði frestað þangað til vinnudeilan leystist.

Þetta varð bræðrunum Jónasi og Jóni Múla Árnasonum tilefni til söngleiksins "Delerium bubonis".

Mikið óskaplega eigum við Sigurði Skjaldberg mikið að þakka. Án uppástungu hans hefði þessi dýrlegi söngleikur og lög og textar bræðranna ekki orðið til.

Kastró mun hafa orðað það síðar að fresta jólunum en verði frumvarp Róberts Marshalls samþykkt í einu og öllu verður það kannski í fyrsta skipti sem hugmynd af þessu tagi kemst í framkvæmd.

Ég held að það megi færa eitthvað til en ekki allt. Sumardagurinn fyrsti er um svipað leyti og hin langa páskahelgi og vafasamur ávinningur af færslu hans.

Uppstigningardagur er nálægt hvítasunnunni en kannski í lagi að færa hann aftur um einn dag.

Það hljómar dálítið einkennilega að halda 1. maí hátíðlegan 2., 3.,4. eða 5. maí og veit ég ekki hvort slíkt sé gert  nokkurs staðar í öðrum löndum. En frídagur verkamanna yrði þá í svipuðum dúr og frídagur verslunarmanna, sem aldrei fellur niður af því að hann miðast við vikudag en ekki mánaðardag og kannski ætti Róbert að nota orðalagið "frídagur" í stað "..að halda hátíðlegan."

Samt dálítið skrýtið að heyra af hátíðarhöldum í öðrum löndum 1. maí en hér heima einhvern næstu daga. Minnir mig á söguna af ræðumanninum 1. maí, sem hóf ræðu sinni með því að segja: "Í dag er 1.maí um land allt."

"Nei, ekki á Hornafirði", kallaði einhver úr mannfjöldanum.

"Jú, líka á Hornafirði" svaraði þá ræðumaðurinn.

Ef tillaga Róberts Marshalls verður samþykkt gæti það gerst, til dæmis í Rússlandi, að einhver ræðumaður þar segði: "Í dag er 1. maí um allan heim".

"Nei, ekki á Íslandi" gæti þá einhver kallað úr mannfjöldanum.

"Nei, að vísu ekki en hann verður 4. maí þar" myndi þá ræðumaðurinn svara.

Ekki er mér kunnugt um að aðrar þjóðir bæti frídegi við ef þjóðhátíðardaga þeirra ber upp á helgi, og finnst vafasamt að gera það hér.  

Það er hins vegar hið besta mál að skoða hugsanlegar breytingar á frídögum eins og til dæmis uppstigningardegi og að jafna fjölda frídaga "yfir hátíðarnar" eins og hátíðahöld vegna jóla og nýjars eru jafnan kölluð.  

                   Eitt sem ég alls ekki skilið fæ

                   og þá hlæ

                   ef fyrsti maí rennur upp fjórða maí

                   eða fimmta maí.

 Eða kannski mætti orða þetta svona:

                   Að fyrsti mái sé annan mai, þriðja maí, fjórða maí eða fimmta maí

                   ei uppí næ,

                   ei skilið fæ,

                   æ, æ, æ !

Hátíðisdagar færðir að helgum

Athugasemdir

[Samúel Sigurjónsson (IP-tala skráð) 5.11.2012 kl. 23:52]

Fyrir c.a. 20 árum fékk Farmanna og fiskimannasambandið það inn í kjarasamninga sjómanna að 1 maí yrði færður aftur að sjómannadagshelginni, þannig að það yrði að lágmarki 72 klst. stopp um sjómannadagshelgina.

[Ragna Kristmundsdóttir (IP-tala skráð) 6.11.2012 kl. 13:46]

Mér finnst þetta frábærar tillögur! Í Bandaríkjunum fær fólk frí á móti ef hátíðisdag ber upp á helgi. T.d. ef þjóðhátíðardaginn 4. júlí ber upp á sunnudag, þá fær fólk frí á mánudeginum á eftir.

[DHH (IP-tala skráð) 8.11.2012 kl. 10:16]

Endurraða Marshall lætur maí,mánuðinn hann bæta vill og laga.Í stað þess gamla fyrsta nú ég fæfast að viku í kröfugöngudaga.