"Þetta er Lufthansa 310, 20 mínútum of sein."

Ofangrein orð lét Eiríkur Árnason, bóndi í Knarranresi, falla, þegar hann leit á klukku sína þar sem við stóðum úti í eyjunni fyrir þrjátíu árum og leit til himins.

Knarrarnes var þá eina eyjan á Faxaflóa, sem var byggð, og Eiríkur einn fjögurra systkina sem bjó í eyjunni á einum afskekktasta stað á landinu, þótt ljósadýrð Reykjavíkur og skíðalyftnanna í Bláfjöllum blasti við á kvöldin.

Aðeins tvisvar á ári á vorin og haustin, fór Knarranesfólkið í land til Borgarness til að versla.

Þegar heiðskírt er verða gufurákir eftir stórar þotur áberandi á himni og einkum áberandi úti á landi. Þá getur jafnvel heyrst í þotunni í öræfakyrrðinni þótt hún fljúgi í 40 þúsund feta hæð, 12 kílómetra hæð, eins og ég hef upplifað nokkrum sinnum.

Airbus A 380 er stærsta farþegaþota heims og gufrákirnar frá hreyflum hennar því þær stærstu sem sjást.

Eiríkur bóndi varð smám saman forvitinn um það hvaða þotur hann væri að horfa á á góðviðrisdögum, og aflaði sér upplýsinga hjá Flugmálastjórn og flugfélögunum sjálfum um áætlanir þeirra.

Áður en Eiríkur sagði fyrrgreind orð hafði ég tekið eftir því að honum varð tíðlitið til himins þar sem við vorum á rölti um þær slóðir í Knarrarnesi, þar sem Skallagrímur kom á land í Skallagrímsvogi þegar hann kom til landsins í fyrsta sinn.

Það var ekki fyrr en við Eiríkur sáum gufurákir Lufthansaþotunnar koma upp á himinnin, að hann leit á klukkuna. Ég tók eftir því þegar hann leit á klukkuna og spurði hann af hverju hann gerði það.

Og þá kom þetta ógleymanlega svar: "Þettar er Lufthansa 310, 20 mínútum of sein."

Rákirnar fjórar eru ekki alltaf reglulegar og sjást oft misvel. Oft sjást þær greinilega hver fyrir sig og álíka langar, en stundum hafa birta og vindur þau áhrif á þær að þær verða bæði mislangar og misstórar.

Fyrir þá, sem oft hafa séð þetta fyrirbæri, þurfti ekki að líta nema snöggt á myndina, sem birt er með tengdri frétt mbl.is til að sjá að þetta eru rákir eftir stóra þotu vegna þess að þær eru tvískiptar, rákir hreyflanna á vinstri vængt aðskildar frá rákum hreyflanna á hægri væng.  

Stjörnuhrapið væntanlega þota

Athugasemdir

[Vilhjálmur Örn Vilhjálmsson, 20.11.2012 kl. 13:27]

Mér er nú næst að halda að þetta hafi verið Superman á leið heim til sín. Það er ekkert skrýtnara en að halda því fram að flugeldum sé skotið frá Gaza á Ísrael.

[Vilhjálmur Örn Vilhjálmsson, 20.11.2012 kl. 13:29]

Eiríkur bóndi hefur nú tæpast verið með tímáætlanir Clarks Kents.

[Jón Logi (IP-tala skráð) 20.11.2012 kl. 18:26]

"contrails" er það kallað og byrjar venjulega eftir 20.000 fet eða meira. Flugvél á leið niður "týnir" því slóðanum sem hún dró.
Hvar ég bý er gaman að fylgjast með Evrópufluginu frá Keflavík, og á heiðum morgni sér maður stundum þotuna áður en hún kemst upp í þá hæð að "strika".
Enda á leiðinni með flugelda til Gaza.....

[Benedikt Mewes (IP-tala skráð) 20.11.2012 kl. 18:39]

Kæri Ómar Ragnarsson.

Lufthansa Airbus 310 eru ekki lengur í notkun og flugnúmerið LH310 er leiðin Frankfurt - Florenz (Firence). Hvernig fékkstu að vita, að það væri Lufthansa ? Ég var á leiðinni í bænum og tók ég ekki eftir neinu flugvél eftir Emirates þangað til British Airways frá London til Calgary.

[Þorvaldur S (IP-tala skráð) 20.11.2012 kl. 21:03]

Fyrir þrjátíu árum stóðu þeir Ómar og Eiríkur og horfðu á Lufthansa 310 fljúga yfir.  Ertu alveg viss um að þann dag hafir þú horft á vél frá Emirates fljúga yfir, Benedikt?

[Benedikt Mewes (IP-tala skráð) 20.11.2012 kl. 21:19]

Sæll Þorvaldur.

Hann var að meina það. Hann skrifaði sem yfirskrift: "Þetta er Lufthansa 310, 20 mínútum of sein." Hvað á maður að hugsa nema "fyrir 30 árum síðan" ?

[Þorvaldur S (IP-tala skráð) 20.11.2012 kl. 22:00]

Fyrir þrjátíu árum var Emirates nefnilega ekki til; það var stofnað 1985 og fyrsta ferð undir merkjum þess var farin milli Dubai og Karachi þann 25. október það ár.  Ertu enn viss um að þeir hafi ekki verið að horfa á Lufthansa 310 sem var 20 mínútum of sein?

[Ómar Ragnarsson, 20.11.2012 kl. 22:30]

Það er orðið langt síðan þetta var og ég skal ekki segja hvað flugnúmerið var með vissu, en þetta gerðist oftar en einu sinni og í eitt skipti var það Lufthansavél sem var of sein.

Í bókinni "Fólk og firnindi" segi ég frá öðru atviki þegar hann taldi upp hvaða vélar væru að koma, frá KLM, Lufthansa 454 og SAS og það gekk nokkurn veginn eftir.

Fleiri en ég urðu vitni að þessu grúski Eiríks og það er aðalatriðið en ekki svikult minni um flugnúmer áratugum síðar.

[Arnór Baldvinsson, 22.11.2012 kl. 06:13]

Sæll Ómar,

Undanfarin tvö ár eða svo hef ég nokkrum sinnum séð nýju Boing 787 Dreamliner koma hérna yfir í reynsluflugi.  Stundum hefur hún verið lágt á lofti, stundum með fylgdarvél sem flýgur mjög nálægt ö þori ekki að segja til um það, en hún er ekki marga tugi metra frá þotunni.  Stundum hafa þeir verið að fljúga hérna vestan við okkur og þá mun hærra og hafa skilið eftir þoturákir í allskonar krákustigum.  Þegar vélin hefur komið hérna yfir í lágflugi hefur verið gaman að fylgjast með hversu lágvær hún er, mun lágværari en aðrar þotur sem ég hef séð og heyrt. 

Kveðja,