Fyrirmyndin við Bolabás ?

Lengi vel var vegarslóðinn norður frá Þingvöllum um Bolabás og Hofmannaflöt til ama fyrir vegfarendur. Honum var illa haldið við, hann var holóttur og rykið frá honum byrgði ökumönnum sýn, smaug inn í bílana og settist á svæðið í kring, útivistarfólki til ama.

Rykmekkirnir sköpuðu auk þess sjónmengun. Slóðinn lá innan þjóðgarðsins og því var það álitamál, hvort og þá hvernig væri rétt að lagfæra hann.

Þetta gerbreyttist þegar slóðinn var lagfærður án þess að gera upphækkaðan trukkaveg, gerðan fyrir 90 kílómetra hraða með tilheyrandi hávaða, því að hávaðinn margfaldast með auknum hraða.  

Lagfæringarnar voru hafðar í lágmarki og vegarstæðinu breytt sem allra minnst. En úrslitum réði að malbikslag var sett ofan á gamla veginn.

Við það hurfu rykið, holurnar og aminn sem af því hafði verið.

Víða í þjóðgörðum erlendis má sjá svipaða malbikaða vegi sem eru lagðir þannig að umferðin verði sem hljóðlátust, fylgi landslaginu á sem minnst áberandi hátt og skapi sem minnsta mengun.

Nú þegar er búið að "eyðileggja" á stórum hluta Kjalvegar þá miklu "safari"upplifun sem fólst í því að smokra sér eftir hlykkjóttum vegarslóðanum sem lá alla leið frá Gullfossi og norður í Blöndudal.

Beinn malarvegur, fyrsti hlutinn raunar malbikaður, liggur nú frá Gullfossi norður að Hvítárvatni og beinn og upphækkaður malarvegur liggur frá Blöndudal langleiðina suður að Hveravöllum.

Lagðir voru nokkuð beinir malarvegir fyrir norðaustan Blöndulón þegar Blönduvirkjun var gerð.

Ég tel vel athugandi að lagfæra Kjalveg og leggja á hann bundið slitlag án þess að fara með hann úr núverandi vegarstæði. Við Blöndulón mætti athuga möguleika á "Bolabás"-vegi yfir í Skagafjörð.

En það þarf að vanda sérstaklega vel til svo að ekki sé sótt um of af töfrum og verðmæti íslenska hálendisins, sem er miklu meira en flestir gera sér grein fyrir. Ef bundið slitlag er lagt á kafla vegarins verður að gera það þannig, að að sé algerlega afturkræf framkvæmd.  

Ég tel höfuðatriði að reyna eftir föngum að viðhalda töfrum Kjalar og fráleitt að gera hann að "mannvirkjabelti" með tilheyrandi risaháspennulínum og jafnvel virkjunum eins og nú er búið að gera á skipulagi miðhálendisins.

Og baráttan fyrir verndun tignar og gildis Sprengisandsleiðar sem liggi óbreytt um sem ósnortnasta íslenska náttúru hálendisins er þegar hafin.

Því að nú er sótt hatrammt í að reisa virkjanir við Skrokköldu og Hágöngur, en þær myndu skapa meira en 60 kílómetra langt "mannvirkjabelti" risaháspennulína og virkjanamannvirkja frá Vatnsfelli við sunnanvert Þórisvatn langleiðina norður á öræfin og ekki þarf að spyrja að næsta áfanga, sem yrði sá að klára "mannvirkjabeltið", sem búið er að slá föstu alla leið norður og eyðileggja þannig gildi þessarar lengstu "safari"-leiðar miðhálendisins sem og það að gera heildstæðan þjóðgarð á miðhálendinu.

  

Hægt að laga Kjalveg fyrir 300 milljónir

Athugasemdir

[Sigurður Sunnanvindur (IP-tala skráð) 14.12.2012 kl. 19:39]

Fin hugmynd að gera núverandi kjalveg greiðfærari en með öllum þeim hlykkjum sem nú er þar að finna.

Samanburðurinn við Þingvallaslóðan er samt erfiður þar sem sá vegur liggur um frekar slétt og burðarmikið hraun og veðst ekki upp í drullu á vorin. Kjalvegur er samfeld jökulurð og þar er ekkert hægt að malbika nema að hafa jarðvegsskipti og flytja í veginn frostfría ármöl.

[Ómar Ragnarsson, 14.12.2012 kl. 21:38]

Eins og sést af orðum mínum, held ég því ekki fram að það þurfi að malbika alla leiðina, heldur geti það farið eftir aðstæðum.

Helst liggur það beint við að malbika þann helming leiðarinnar sem þegar er með upphækkuðum vegi og fara eftir aðstæðum með restina.

Til dæmis er talsverður munur á mismunandi köflum leiðarinnar frá Hvítárbrú norður fyrir Hveravelli. Norður með Skútunum eru víða jarðvegsleifar og fokmold í dældum, en á öðrum köflum, til dæmis utan í Skútunum tel ég einfalt að setja bundið slitlag ofan í núverandi slóða.

Víða eru malarkaflar norðar á leiðinni og á löngum kafla framhjá Hveravöllum er ekið um mela, enda er flugvöllur á því svæði og get ég ekki séð nein vandkvæði á bundnu slitlagi þar ofan á "frostfríu" mölinni, sem er reyndar nokkuð nýtt fyrirbrigði fyrir mér, því að ég hef hvergi séð slíkt á hálendinu, ekki einu sinni á besta flugvallarstæði þess norðan við Brúarjökul.

[Þorvaldur S (IP-tala skráð) 15.12.2012 kl. 15:44]

Ætli menn sem vit hafa á vegagerð myndu ekki seint ráðleggja bundið slitlag á veginn í kringum Hveravelli óbreyttan; veg sem er eitt drullusvað ef dropi kemur úr lofti.  Til að unnt sé að leggja svoleiðis þannig að endist meira en fyrsta sumarið verður nefnilega að hafa frostfrítt efni.  Það er ekki utan í Skútum eða á melunum við Dúfunefsfell.