Forkastanlegt !

"Mayday! Mayday! Við erum föst í bíl uppi á heiði!"

Þetta neyðarkall eitt og sér ber með sér að ekki sé allt með felldu, því að varla getur það talist alger neyð út af fyrir sig að hafa fest bíl í skafli uppi á heiðarvegi ef ekkert amar að fólkinu í honum.   

Bíll er ekki svo slæmur staður til að vera í, heldur má næstum því segja að hann sé "öruggur staður til að vera á" eins og það hefur verið orðað í alþekktri auglýsingu. Og fólki er raunar eindregið ráðlagt að halda kyrru fyrir í bíl ef hann hefur fest og hefur reynst vel, samanber útlendingana sem festu sig á norðurhálendinu í haust.

Því er það óþarfi að kalla "mayday!" í slíkum tilfellum á fyrstu klukkstundum festunnar, heldur aðeins að óska eftir aðstoð.

En ljóst er að til þess að "gabbið" virkaði var notað þetta neyðarkall til þess að tryggt væri að árangurslaus leit yrði hafin.  

Þar með liggur það ljóst fyrir hvílík forkastanleg ósvífni það var að kalla sem gabb "mayday! Mayday!, neyðarkall sem ekki á að nota nema í ítrustu neyð og má alls ekki misnota, því að þá veikist trúin á það að um raunverulega neyð sé að ræða, þegar kallið heyrist og það getur kostað mannslíf.

Hætta leit á heiðinni

Athugasemdir

[Ásthildur Cesil Þórðardóttir, 15.12.2012 kl. 23:42]

Málið er að vegurinn er LOKAÐUR ekki bara með tilkynningu heldur stór blokk á veginum með risaskilti.  Og það má ljóst vera að ef einhver hefði lagt á þann veg, þá væri nokkuð ljóst að þar væru ummerki um umferð, það þar fer hreinlega enginn ENGINN með fullu viti.

Það er því ljóst að þarna var um gabb gabb að ræða, ég ók þarna framhjá bara í fyrradag og það var alveg ljóst að þarna átti enginn neina leið.  Það er sorglegra en tárum taki að einhver sé svo mikill kæruleysingi að geta farið að kalla út hjálparsveit bara af gamni sínu.  Það verður bara til að skemma fyrir þeim sem raunverulega þurfa á hjálp að halda og verulegur dónaskapur við það góða fólk sem er alltaf tilbúið til bjargar.

[Hrólfur Þ Hraundal, 16.12.2012 kl. 10:15]

Hvað gerist ef næst í svona afglapa? Fær hann bara áminningu og getur síðan haldið áfram að vera afglapi?  5  ára fangelsi ætti að vera lágmark fyrir svona gabb, plús greiðsla fyrir allan kosnað.